រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាក់នៅថ្ងៃទី២៧ មេសាថា ចាប់ពីថ្ងៃទី២៨ មេសា ដល់ថ្ងៃទី៤ ឧសភាតំបន់មួយចំនួននឹងមានភ្លៀងធ្លាក់ពីមធ្យមនៅច្រើន ហើយមានផ្គរ រន្ទះ និងខ្យល់កន្ត្រាក់ ។
យោងតាមសេចក្តីជូនដំណឹងរបស់ក្រសួងធនធានទឹក នៅថ្ងៃទី២៧ មេសា ស្ដីពីស្ថានភាពធាតុអាកាសបានលើកឡើងថា ចាប់ពីថ្ងៃទី២៨ ខែមេសា ដល់ថ្ងៃទី៤ ខែឧសភា ឆ្នាំ២០២១ ជ្រលងសម្ពាធទាបឥណ្ឌកាន់តែបង្កើនឥទ្ធិពលគ្របដណ្តប់មកលើព្រះរាជាណាចក្រកម្ពុជាជាមួយនឹងខ្យល់ប្តូរទិសជាបណ្តើរៗ មកពីនិរតីដែលជាសញ្ញាបង្ហាញថា រដូវវស្សានឹងចាប់ផ្ដើមនៅសប្តាហ៍ទី១ នៃខឧសភា ខាងមុខ ។
ក្រសួងថា ផ្អែកលើស្ថានភាពវិវត្តនៃអាកាសធាតុនេះ និងធ្វើឲ្យបណ្តាខេត្តនៅតំបន់វាលទំនាបកណ្ដាល មានសីតុណ្ហភាពអប្បបរមា មានពី២៤-២៦ អង្សាសេ និងសីតុណ្ហភាពអតិបរមាមានពី៣១-៣៣ អង្សាសេ ។ នឹងអាចមានភ្លៀងធ្លាក់រាយប៉ាយក្នុងកម្រិតពីមធ្យមទៅច្រើន ។
ក្នុងនោះក៏អាចមានផ្នែកមួយចំនួន បណ្តាខេត្តនៃភាគខាងត្បូង និងភាគពាយ័ព្យមានភ្លៀងមានកម្រិតបរិមាណទឹកភ្លៀងច្រើន ។ ចំណែកបណ្តាខេត្តដាប់ជួរភ្នំដងរែក និងខ្ពង់រាបឦសាន មានសីតុណ្ហភាពអប្បបរមាមានពី២៣-២៥ អង្សាសេនឹងសីតុណ្ហភាពអតិបរមា មានពី ៣១-៣៣អង្សាសេ នឹងអាចមានភ្លៀងធ្លាក់ក្នុងកម្រិតពីមធ្យមទៅបង្គួរ ។
ចំណែកតំបន់មាត់សមុទ្រមាន សីតុណ្ហភាពអប្បបរមា មានពី ២៤-២៦អង្សាសេ នឹងសីតុណ្ហភាពអតិបរមា មានពី ៣០-៣២អង្សាសេ នឹងអាចមានភ្លៀងធ្លាក់ពីបង្គួរទៅច្រើន ។
ស្ថានភាពធាតុអាកាសដូចបានជម្រាបជូនខាងលើ ក្រសួងបានសូមសាធារណជនជ្រាបជាព័ត៌មាន និងសូមបន្តប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ដែលអាចកើតមានជាពិសេសនៅបណ្តាខេត្ត តំបន់វាលទំនាបកណ្តាល ៕
ចែករំលែកព័តមាននេះ