រាជធានីភ្នំពេញ ៖ ចាប់តាំងពីមានការរឹតបន្តឹងការធ្វើដំណើរឆ្លងពីខេត្តមួយទៅខេត្តមួយ និងឈានដល់ការបិទខ្ទប់រាជធានីភ្នំពេញ ក្រុងតាខ្មៅ និងផ្នែកខ្លះនៃខេត្តព្រះសីហនុ ធ្វើឱ្យការដឹកជញ្ជូនទំនិញ ជាពិសេសកសិផលរបស់កសិករនៅតាមខេត្តជួបបញ្ហារាំងស្ទះនិងមិនអាចលក់ចេញបាន ។ បើតាមលោកទិព្វ…
រាជធានីភ្នំពេញ ៖ ចាប់តាំងពីមានការរឹតបន្តឹងការធ្វើដំណើរឆ្លងពីខេត្តមួយទៅខេត្តមួយ និងឈានដល់ការបិទខ្ទប់រាជធានីភ្នំពេញ ក្រុងតាខ្មៅ និងផ្នែកខ្លះនៃខេត្តព្រះសីហនុ ធ្វើឱ្យការដឹកជញ្ជូនទំនិញ ជាពិសេសកសិផលរបស់កសិករនៅតាមខេត្តជួបបញ្ហារាំងស្ទះនិងមិនអាចលក់ចេញបាន ។
បើតាមលោកទិព្វ ផាកសិករដាំបន្លែមួយខេត្តកំពតបាននិយាយថា បន្លែបង្ការបស់លោកក៏ដូចជា របស់កសិករដាំបន្លែផ្សេងទៀត នៅចាល់លក់មិនចេញទេ ក្រោយពេលដែលមានការបិទខ្ទប់ភ្នំពេញ និងខេត្តព្រះសីហនុ ។ សូម្បីតែរករថយន្តដឹកទំនិញផ្ញើអីវ៉ាន់ជូនបងប្អូនដែលត្រូវប៉ះពាល់ដោយសារការបិទខ្ទប់ក៏មិនមានរថយន្តទទួលដែរ ហើយការផ្ញើក្រុមហ៊ុនដឹកជញ្ជូនក៏ពិបាក ដោយសារតែបន្លែខ្លះត្រូវការភាពស្រស់ ដូច្នេះបើតាមក្រុមហ៊ុនដឹកជញ្ជូនទំរាំតែទៅដល់ដៃអ្នកទទួលវាខូចអស់ទៅហើយ ។
លោកបន្តថា នៅរដូវប្រាំងនេះនឹកឃើញថាមានតម្រូវការបន្លែច្រើន ទើបកសិករនិងរូបលោកផ្ទាល់បានបន្ថែមការដាំដុះដើម្បីផ្គត់ផ្គង់ទៅកាន់ទីផ្សារ ដូចជាកំពង់សោម និងភ្នំពេញ តែនៅពេលបន្លែបានផលនិងខ្លះទៀតជិតបានផលស្រាប់តែមានវិបត្តិដោយសារតែកូវីដ១៩ ធ្វើឱ្យបិទខ្ទប់និងបិទនូវការធ្វើដំណើរ និងការឆ្លងកាត់ខេត្ត ដែលជំរុញឱ្យផលិតទទួលបានលក់មិនចេញ គឺលក់បានតែក្នុងតំបន់ហើយវាលើសពីតម្រូវការក្នុងតំបន់ទៅទៀត ។
ចំណែកកសិករចិញ្ចឹមមាន់ស្រែឯណោះវិញក៏បានឱ្យដឹងថា កាលពីមុនកូវីដ១៩ឆ្លងក្នុងសហគមន៍ឱ្យតែមានមាន់លក់មិនខ្វះអ្នកទិញទេ ព្រោះកាលនោះ មានបុណ្យផងការផង តែក្រោយមកបុណ្យការក៏បិទ ហើយបិទដល់តំបន់ដែលមានតម្រូវការខ្ពស់ទៀត ទើបធ្វើឱ្យមាន់ស្រែលក់មិនចេញនៅសល់ពេញកសិដ្ឋាននិងទ្រុង បាត់បង់ចំណូលបង្កើនការចំណាយទៅលើចំណីមាន់រាល់ថ្ងៃ ។
ក្រឡេកមកមើលឯតំបន់ដែលបិទខ្ទប់និងរងផលប៉ះពាល់ធ្ងន់ធ្ងរដោយសារតែកូវីដ១៩ដូចជាភ្នំពេញ និងខេត្តព្រះសីហនុផ្នែកខ្លះ ឃើញថាទំនិញចាំបាច់មានការឡើងថ្លៃខ្ពស់ហួសប្រមាណ ជាពិសេសទំនិញសម្រាប់បរិភោគប្រចាំថ្ងៃ ដូចជាបន្លែ ត្រីសាច់ និងគ្រឿងឧបភោគបរិភោគដទៃទៀត ។ នៅតំបន់បិទខ្ទប់មួយចំនួនមិនទាំងអាចអនុញ្ញាតឱ្យអាជីវករលក់ដូរបានដូចមុនទៀតឡើយដោយផ្សាររដ្ឋនិងឯកជនត្រូវបិទរយៈ១៤ថ្ងៃ ដើម្បីទប់ស្កាត់ការឆ្លងរាលដាលកាន់តែធំ ។ តែសម្រាប់ទំនិញលក់តាមអនឡាញនិងការដឹកជញ្ជូននៅរក្សាធម្មតា គ្រាន់តែទំនិញខ្លះត្រូវឡើងថ្លៃជាងមុន ។
គួរបញ្ជាក់ថាដើម្បីដោះស្រាយបញ្ហាស្បៀងរបស់ប្រជាពលរដ្ឋក្នុងតំបន់បិទខ្ទប់ក្រសួងពាណិជ្ជកម្មក៏បានបញ្ចេញរថយន្តចល័តដើម្បីលក់ស្បៀងជូនពលរដ្ឋក្នុងតំបន់ក្រហមដែលមានការរាលខ្លាំង ដែលជាសម្រួលសម្រាប់បញ្ហាខ្វះខាតមួយចំនួនរបស់ពលរដ្ឋដែលរងគ្រោះដោយសារតែការរាលដាលនេះ ៕
ចែករំលែកព័តមាននេះ