ខេត្តតាកែវ ៖ កាលពីថ្ងៃថ្ងៃទី២៣ ខែមេសា ឆ្នាំ២០២១កន្លងទៅនេះ គេឃើញក្រុមមន្ត្រីភូមិបាលក្រុងដូនកែវ បានចុះទៅធ្វើការហាមឃាត់សំណង់ឃ្លាំងដ៏ធំមួយកន្លែង ស្ថិតនៅភូមិតាឌូ សង្កាត់រការក្រៅ ក្រុងដូនកែវ…
ខេត្តតាកែវ ៖ កាលពីថ្ងៃថ្ងៃទី២៣ ខែមេសា ឆ្នាំ២០២១កន្លងទៅនេះ គេឃើញក្រុមមន្ត្រីភូមិបាលក្រុងដូនកែវ បានចុះទៅធ្វើការហាមឃាត់សំណង់ឃ្លាំងដ៏ធំមួយកន្លែង ស្ថិតនៅភូមិតាឌូ សង្កាត់រការក្រៅ ក្រុងដូនកែវ ខេត្តតាកែវ ព្រោះតែការសាងសង់ឃ្លាំងនោះគ្មានលិខិតអនុញ្ញាតិ ហើយបានណែនាំឲ្យ ម្ចាស់សំណង់ទៅបំពេញបែបបទត្រឹមត្រូវតាមផ្លូវច្បាប់ ទើបអនុញ្ញាតិឲ្យសង់បន្ត។
លោក សាង មករា ដែលជាម្ចាស់ឃ្លាំងបានឲ្យដឹងថា លោកបានចំណាយលុយជាបន្ដបន្ទាប់ឲ្យមន្ត្រីសុំលាក់ឈ្មោះរត់ការឲ្យលោកដើម្បីបានសាងសង់ឃ្លាំងនេះ តែអ្នករត់ការនោះថា ធ្វើបណ្ដើរៗសិនទៅ ហើយលុយរបស់លោកក៏ចេញបណ្ដើរៗដែរ លុះលោកចេះតែសាងសង់ជាហូរហែមក ស្រាប់តែនៅថ្ងៃទី២៣ ខែមេសា ឆ្នាំ២០២១ ក៏មានក្រុមមន្ត្រីចុះមកឲ្យលោកផ្អាកការសាងសង់ ដោយតម្រូវឲ្យលោកទៅរត់ច្បាប់ពីថ្នាក់លើសិន ទើបអាចសាងសង់បន្តទៀតបាន។
លោក មករា បញ្ជាក់ថា លោកមិនបានស្គាល់ក្រុមមន្ត្រីនោះជានរណាទេ តែគេតម្រូវឲ្យលោកយកលុយចាប់៥ពាន់ដុល្លារទៅ៦ពាន់ដុល្លារ ដើម្បីរត់ការច្បាប់ទៅវាត្រឹមត្រូវតាមផ្លូវច្បាប់ ហើយបានសាងសង់ដោយរលូនហើយ។ លោកបន្ថែមទៀតថា លោកពិតជាលែងយល់មិនដឹងច្បាប់គេគិតយ៉ាងម៉េចទេ ព្រោះលោកសង់ឃ្លាំងស្តុបភេសជ្ជៈលក់ដូរទេ។
ជុំវិញករណីខាងលើនេះ យើងមិនអាចសុំការបំភ្លឺពីលោក កែវ សំណាង មន្ត្រីភូមិបាលក្រុងដូនកែវបានទេនៅថ្ងៃនេះ ចំណែកលោក នួន សុធា ប្រធានមន្ទីរសុរិយោដីសំណង់ និងនគរូបនីយកម្មខេត្តតាកែវ ក៏មិនអាចសុំការបំភ្លឺបានដែរ។
ករណីខាងលើនេះ គេកំពុងតែឆ្ងល់ថា ពេលឃ្លាំងនោះសាងសង់ ហេតុអ្វីមិនមានមន្ត្រីចុះទៅហាមឃាត់? ព្រោះឃ្លាំងនោះធំណាស់ រហូតដល់សង់ជិតរួចរាល់ហើយ ស្រាប់តែមានមន្ត្រីចុះហាម ដែលគេសង្ស័យថា ប្រហែលជាមន្ត្រីទាំងនោះបណ្តាក់គ្នា ដើម្បីស៊ីលុយពីម្ចាស់សំណង់ហើយ ឬមួយក៏ប្រហែលជាម្ចាស់សំណង់នោះសែនមិនត្រូវ ធ្វើអ្នកតាកាច់យ៉ាងនេះ៕
ចែករំលែកព័តមាននេះ