បំណែកនាវាមុជទឹកដែលបាត់ រកឃើញនៅកន្លែងមួយ
ឥណ្ឌូនេស៊ី ៖ មេបញ្ជាការយោធាឥណ្ឌូនេស៊ីបាននិយាយកាលពីថ្ងៃទី២៤ ខែមេសា ថា នាវាមុជទឹក KRI Nanggala 402 ដែលបានបាត់កាលពីថ្ងៃទី២១…
ឥណ្ឌូនេស៊ី ៖ មេបញ្ជាការយោធាឥណ្ឌូនេស៊ីបាននិយាយកាលពីថ្ងៃទី២៤ ខែមេសា ថា នាវាមុជទឹក KRI Nanggala 402 ដែលបានបាត់កាលពីថ្ងៃទី២១ ខែមេសា អំឡុងពេលធ្វើសមយុទ្ធនៅភាគខាងជើងកោះបាលីដែលមាននាវិក ៥៣នាក់នៅលើនាវានោះត្រូវបានសន្និដ្ឋានថា បានលិចហើយ។ បន្ទាប់ពីក្រុមអ្នករុករកបានរកឃើញបំណែក និងកម្ទេចកម្ទីរបស់នាវានៅជិតកន្លែងដែលបាត់ខ្លួនជាបន្តបន្ទាប់។ គួររំលឹកថា នាវិក៥៣នាក់បាត់ខ្លួនជាមួយនាវាមុជទឹក១គ្រឿង ពេលធ្វើសមយុទ្ធនៅភាគខាងជើងកោះបាលី
លោក Hadi Tjahjanto មេបញ្ជាការយោធាឥណ្ឌូនេស៊ីបាននិយាយថា ការរកឃើញប្រេងដែលធ្លាយចេញ ក៏ដូចជាកម្ទេចកម្ទីនៅក្បែរកន្លែងដែលនាវាមុជទឹកបាត់ បានបង្ហាញភស្តុតាងយ៉ាងច្បាស់ថា KRI Nanggala 402 បានលិចហើយ។
ជាមួយគ្នានេះផងដែរ បើតាមសម្តីពីមន្ត្រីឥណ្ឌូនេស៊ីក៏បាននិយាយដែរថា ការផ្គត់ផ្គង់អុកស៊ីសែនទាំងមូលនៅក្នុងនាវាមុជទឹក នឹងអស់នៅថ្ងៃសៅរ៍ម្សិលមិញនេះ។
ទោះបីយ៉ាងណា មូលហេតុនៃការបាត់នាវាមុជទឹក KRI Nanggala 402 នៅតែមិនទាន់អាចបញ្ជាក់ជាផ្លូវការនៅឡើយទេ។ ខណៈកងទ័ពជើងទឹកធ្លាប់បាននិយាយថា ការដាច់ចរន្តអគ្គិសនីអាចបណ្តាលឱ្យនាវាមុជទឹកមិនអាចអនុវត្តនីតិវិធីគ្រាអាសន្នបាន។
សូមរំលឹកថា ក្រោយទទួលដំណឹងការបាត់នាវាមុជទឹក KRI Nanggala-402 ប្រទេសជាច្រើនដូចជា សិង្ហបុរី, ម៉ាឡេស៊ី, សហរដ្ឋអាមេរិក, អូស្ត្រាលី, បារាំង និងអាល្លឺម៉ង់ ក៏បានចូលរួមក្នុងដំណើរការរុករកយ៉ាងជិតស្និទជាមួយរដ្ឋាភិបាលឥណ្ឌូនេស៊ីផងដែរ៕ (ដកស្រង់ចេញពី Toronto Star)
ចែករំលែកព័តមាននេះ