រាជធានីភ្នំពេញ ៖ ខណៈជំងឺកូវីដ១៩ នៅតែបន្តរាលដាលក្នុងភូមិសាស្ត្ររាជធានីភ្នំពេញ និងត្រូវបានរកឃើញរាប់រយនាក់ក្នុងមួយថ្ងៃជាពិសេសអាជីវករតាមផ្សារនិងកម្មករកម្មការិនី រោងចក្រនៅភ្នំពេញផងនោះ អាជ្ញាធររាជធានីភ្នំពេញសម្រេចផ្អាកដំណើរការផ្សារជាច្រើនដើម្បីទប់ស្កាត់ការរាលដាលបន្តទៀត ។ រហូតមកដល់ថ្ងៃទី២១ មេសា២០២១នេះ…
រាជធានីភ្នំពេញ ៖ ខណៈជំងឺកូវីដ១៩ នៅតែបន្តរាលដាលក្នុងភូមិសាស្ត្ររាជធានីភ្នំពេញ និងត្រូវបានរកឃើញរាប់រយនាក់ក្នុងមួយថ្ងៃជាពិសេសអាជីវករតាមផ្សារនិងកម្មករកម្មការិនី រោងចក្រនៅភ្នំពេញផងនោះ អាជ្ញាធររាជធានីភ្នំពេញសម្រេចផ្អាកដំណើរការផ្សារជាច្រើនដើម្បីទប់ស្កាត់ការរាលដាលបន្តទៀត ។
រហូតមកដល់ថ្ងៃទី២១ មេសា២០២១នេះ មានផ្សារចំនួន១៤ហើយបានផ្អាកដំណើរការបណ្ដោះអាសន្ន ។នេះបើតាមលោកម៉េត មាសភក្ដី អ្នកនាំពាក្យសាលារាជធានីភ្នំពេញ បានសរសេរក្នុងបង្ហាញសង្គមរបស់លោកនៅថ្ងៃទី២២ មេសា ២០២១ ។
យោងតាមលោកម៉េត មាសភក្ដីឱ្យដឹងថាផ្សារទាំង១៤ ដែលបានផ្អាកដំណើរការអាជីវកម្មបណ្ដោះអាសន្ននោះរួមមាន ១. មជ្ឈមណ្ឌល
ពាណិជ្ជកម្មផ្សារអូរឫស្សី (ខណ្ឌ៧មករា) ២. ផ្សារដើមគរ និងផ្សារបន្លែ (ខណ្ឌទួលគោក និងខណ្ឌបឹងកេងកង) ៣. ផ្សារចាស់ (ខណ្ឌដូនពេញ) ៤. ផ្សារធំទួលសង្កែ (ខណ្ឌឫស្សីកែវ) ៥. ផ្សារបឹងត្របែកផ្លាហ្សា (ខណ្ឌចំការមន) ៦. ផ្សារត្រពាំងថ្លឹង (ខណ្ឌពោធិ៍សែនជ័យ) ៧. ផ្សារឯករាជ្យ១ (ខណ្ឌពោធិ៍សែនជ័យ) ៨. ផ្សារទួលពង្រ (ខណ្ឌពោធិ៍សែនជ័យ) ៩. ផ្សារសេនជូរីផ្លាហ្សា (ខណ្ឌពោធិ៍សែនជ័យ) ១០. ផ្សារពោធិ៍ចិនតុង (ខណ្ឌពោធិ៍សែនជ័យ) ១១. ផ្សារកណ្ដាល (ខណ្ឌដូនពេញ) ១២. ផ្សារដេប៉ូ (ខណ្ឌទួលគោក) ១៣. ផ្សារពិភពថ្មីឈូកមាស និងផ្សាររីករាយ (ខណ្ឌសែនសុខ)និង ១៤. ផ្សារអូឡាំពិក (ខណ្ឌបឹងកេងកង) ។
បើតាមអ្នកវិភាគសេដ្ឋកិច្ចជាច្រើនបាននិយាយស្រដៀងគ្នាថា ការបិទអាជីវកម្មផ្សារនានានៅក្នុងរាជធានីភ្នំពេញវាពិតជាប៉ះពាល់ដល់អាជីវកម្ម និងប្រាក់ចំណូលរបស់ប្រជាពលរដ្ឋដែលអាជីវករនៅតាមផ្សារទាំងនោះ តែនេះគឺជាវិធានការដែលរដ្ឋាភិបាលត្រូវទប់ស្កាត់ដើម្បីកុំឱ្យមានការចម្លងនិងឆ្លងកាន់តែច្រើនទៅកាន់ប្រជាពលរដ្ឋក្នុងរាជធានីភ្នំពេញ ។
លោកស្រូយ ឌីណាអាជីវករនៅផ្សារដើមគរបាននិយាយថា ចាប់តាំងពីផ្ទុះជំងឺកូវីដ១៩មក ក្រុមហ៊ុនអាជីវករផ្សេងទៀតក៏ដូចជារូបលោកផង បានបាត់បង់ប្រាក់ចំណូលគ្រប់គ្នា តែកាលមុននៅអាចរកប្រាក់ចំណូលបានខ្លះៗ តែបន្ទាប់ពីផ្សារត្រូវបានបិទ អាជីវករតាមផ្សារដែលបិទនោះ ត្រូវសំងំនៅក្នុងផ្ទះ និងមិនមានប្រភពចំណូលពីណាមកឡើយ ។ អាជីវករដែលប៉ះពាល់ដល់អាជីវកម្ម ដោយសារការបិទផ្សារនោះ គឺត្រូវយកប្រភព ធនធានដែលសន្សំទុកមកចាយវាយក្នុងអំឡុងពេលនេះការបាត់បង់ចំណូល ហើយត្រូវតែចូលរួមជាមួយរដ្ឋាភិបាលក្នុងការទប់ស្កាត់កុំឱ្យជំងឺកូវីដ១៩នេះកាន់តែរាលដាលបន្តទៀត ។
សូមរំលឹកថាចាប់តាំងពីផ្សារមួយចំនួនបានផ្អាកដំណើរការ ធ្វើឱ្យទំនិញមួយចំនួនជាពិសេសគ្រឿងឧបភោគបរិភោគដែលមានដូចជាបន្លែ ត្រីសាច់ ជាដើមនោះបានឡើងថ្លៃគុណជាពីរជាបី ធ្វើឱ្យពលរដ្ឋដែលប៉ះពាល់ប្រាក់ចំណូលស្រាប់នោះ កាន់តែពិបាកក្នុងការរកប្រាក់មកទិញទំនិញដែលត្រូវឡើងថ្លៃនេះ ។
យ៉ាងណាអាជ្ញាធរក៏បានស្រែកអំពាវនាវផង និងចាត់វិធានការផងសម្រាប់អាជីវករណាដែលលក់ទំនិញឡើងថ្លៃហួសហេតុផងដែរ ។ ក្រលេកទៅមើលកសិករនៅតាមខេត្តវិញ ក៏ពិបាកក្នុងការលក់កសិផលរបស់ខ្លួនដែរ ដូចជាបន្លែនិងសាច់សត្វជាដើម ពីព្រោះតែការរឹតត្បិតនូវការធ្វើដំណើរឆ្លងកាត់ពីខេត្តមួយទៅខេត្តមួយ ដែលធ្វើឱ្យកសិផលត្រូវចាល់លក់មិនចេញផងដែរ ៕
ចែករំលែកព័តមាននេះ