ខេត្តកំពង់ឆ្នាំង ៖ ជាទូទៅនៅទីអារាមមួយចំនួនក្នុងខេត្តកំពង់ឆ្នាំង គណៈកម្មការអាចារ្យវត្ត តែងតែដឹកនាំពុទ្ធបរិស័ទធ្វើពិធីសំពះព្រះខែ និងអកអំបុករៀងរាល់ឆ្នាំ នៅថ្ងៃ១៥ កើតខែកត្តិក ដែលនេះជាទំនៀមបុរាណតរហូតដល់បច្ចុប្បន្ន ។…
ខេត្តកំពង់ឆ្នាំង ៖ ជាទូទៅនៅទីអារាមមួយចំនួនក្នុងខេត្តកំពង់ឆ្នាំង គណៈកម្មការអាចារ្យវត្ត តែងតែដឹកនាំពុទ្ធបរិស័ទធ្វើពិធីសំពះព្រះខែ និងអកអំបុករៀងរាល់ឆ្នាំ នៅថ្ងៃ១៥ កើតខែកត្តិក ដែលនេះជាទំនៀមបុរាណតរហូតដល់បច្ចុប្បន្ន ។ នេះបើយោងតាមផេកមន្ទីរវប្បធម៌និងវិចិត្រសិល្បៈ ខេត្តកំពង់ឆ្នាំងបានប្រកាសនាយប់ថ្ងៃទី០៥ ខែវិច្ឆិកានេះ ។
បើតាមលោកយាយលោកតា ដែលមកចូលរួមពិធីនេះ ក្រៅពីអំបុក ទុំចេក និងផ្លែដូង គេត្រូវរៀបចំផ្លែឈើច្រើនមុខផ្សេងទៀត ប្រសិនបើមាននៅក្នុងពិធីនេះ ។ មុនពេលអកអំបុក គេត្រូវរង់ចាំរហូតដល់ព្រះខែរះនៅត្រង់ចំពីលើក្បាល ទើបនាំគ្នាក្តាប់អំបុកយកទៅបង្អកចាស់ព្រឹទ្ធាចារ្យ អ្នកមានគុណ មិត្តភក្ដិ ឬអ្នកដទៃទៀត ដែលមកចូលរួមក្នុងពិធីនេះ ។
ដោយឡែក ពីប្រពៃណីដាល់អំបុកខ្មែរវិញ ប្រជាពលរដ្ឋតែងយកស្រូវស្រស់មកលីងក្នុងអំបែង ឬខ្ទះរហូតដល់ស្រូវចាប់ផ្ទុះមួយៗ រួចចាក់ស្រូវដែលបានលីងរួច ចូលក្នុងត្បាល់ហើយដាល់ដោយប្រើគ្នា១នាក់ ឬ២នាក់ ។ នៅពេលអំបុកពៀចសំប៉ែត និងខ្ចាត់សម្បកស្រូវចេញអស់ទើបឈប់ ហើយបារដាក់ចង្អេរយកទៅអុំយកសំបកស្រូវចេញ ។ ជាទូទៅ គេជ្រើសរើសទទួលទានអំបុកដោយការអក ឬញាំ ជាមួយចេកទុំ និងទឹកដូងខ្ចី។
និយាយពីពិធីអកអំបុកនេះទៀតសោត គឺប្រជាជនខ្មែរតែងប្រារព្ធធ្វើក្នុងឱកាសព្រះរាជពិធីបុណ្យនេះ បើយោងតាមគេហទំព័រទ្រឹស្តី ពុទ្ធចក្រ ចំពោះពិធីអកអំបុក និងសំពះព្រះខែ ត្រូវបានប្រជាពលរដ្ឋខ្មែរធ្វើឡើង ដើម្បីរម្លឹកដល់ព្រះពោធិសត្វ ដែលយកកំណើតជាទន្សាយបានលះបង់អាយុសង្ខារក្នុងការបំពេញ បារមីទានដល់ឥន្ទ្រព្រាហ្មណ៍៕
ចែករំលែកព័តមាននេះ