រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាក់នៅថ្ងៃទី២១ មេសាថា ចាប់ពីខែឧសភា ដល់ខែតុលា កម្ពុជានឹងមានបាតុភូតធម្មជាតិកើតឡើង ។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយមស្ដីពីការព្យាករអាកាសធាតុលើកទី២ សម្រាប់ឆ្នាំ២០២១បានលើកឡើងថា បន្ទាប់ពីបានធ្វើការតាមដានការវិវត្តន៍ស្ថានភាពអាកាសធាតុជាបន្តបន្ទាប់ជាលក្ខណៈសកល និងតំបន់ ក្រសួងធនធានទឹក និងឧតុនិយម សូមជម្រាបជូនដំណឹងដល់សាធារណជនឲ្យបានជ្រាប អំពីការព្យាករអាកាសធាតុលើកទី២ សម្រាប់ឆ្នាំ ២០២១ ដូចខាងក្រោម បាតុភូតសកល ដោយផ្អែកទៅលើស្ថានភាពសីតុណ្ហភាពលើផ្ទៃមហាសមុទ្រប៉ាស៊ីហ្វិក តំបន់ជួរខ្សែអេក្វាទ័រ បានបង្ហាញឲ្យឃើញថា ក្នុងឆ្នាំ២០២១នេះ ព្រះរាជាណាចក្រកម្ពុជាទទួលរងនូវឥទ្ធិពលពីបាតុភូត (Neutral ) ដែលជាបាតុភូតអន្តរកាល ចន្លោះរវាងបាតុភូត El Nino (ក្ដៅ) និង La Nina (ត្រជាក់) ។
ពោល គឺចាប់ពីខែឧសភា រហូតដល់ខែតុលា ឆ្នាំ២០២១ (រយៈពេល០៥ ខែ) បាតុភូតធម្មជាតិ ដែលមានឥទ្ធិពលមកលើព្រះរាជាណាចក្រកម្ពុជាមានបាតុភូត _Neutral. មាន ៦០% បាតុភូត El Nino មាន ១០ % និងបាតុភូត La Nina មាន ៣០ % ។
ក្រសួងថា នៅរដូវវស្សាឆ្នាំ២០២១ វិញដើមរដូវវស្សា ៖ រដូវវស្សាឆ្នាំ២០២១ នឹងចូលមកដល់នៅសប្តាហ៍ទី១ នៃខែឧសភាជាមួយនឹងបរិមាណទឹកភ្លៀងពីមធ្យមទៅច្រើនបង្គួរនឹងអាចខ្ពស់ជាងមធ្យមភាគច្រើនឆ្នាំ និងរបាយទឹកភ្លៀងធ្លាក់រាយប៉ាយបានល្អ ។
នៅដើមរដូវវស្សានេះនឹងអាចមានភ្លៀងលាយឡំផ្គរ រន្ទះ និងខ្យល់កន្ត្រាក់កើតមានច្រើន ។ ពាក់កណ្តាលរដូវវស្សា ចាប់ពីខែសីហា ដល់ខែកញ្ញា ភ្លៀងនឹងអាចធ្លាក់រាយប៉ាយបានល្អលើផ្ទៃប្រទេស ជាមួយនឹងបរិមាណទឹកភ្លៀងពីបង្គួរទៅច្រើននឹងអាចខ្ពស់ជាងមធ្យមភាគច្រើនឆ្នាំ ។
នៅពាក់កណ្តាលរដូវវស្សានេះនឹងអាចមានភ្លៀងលាយ ឡំផ្គរ រន្ទះ និងខ្យល់កន្ត្រាក់ បន្តកើតមានច្រើន ក្នុងនោះនឹងអាចបណ្តាលឲ្យបណ្ត ខេត្តមួយចំនួនប្រឈមខ្ពស់នឹងជំនន់ទឹកភ្លៀង ។ ចុងរដូវវស្សា អាចនឹងបញ្ចប់នៅក្នុងសប្តាហ៍ទី៤ នៃខែវិច្ឆិកា ជាមួយនឹងបរិមាណទឹកភ្លៀងពីតិចទៅបង្គួរ ៕
ចែករំលែកព័តមាននេះ