អន្តរជាតិ ៖ កាលយប់ពីថ្ងៃទី ១៨ ខែ មេសា ម្សិលមិញនេះ សង្គ្រាមបាល់ទាត់ក្នុងតំបន់អឺរ៉ុបបានផ្ទុះឡើង ក្រោយពេលដែលក្លិបកំពូលៗប្រចាំតំបន់អឺរ៉ុបជាច្រើន បានប្រកាសយល់ព្រមរួមគ្នាក្នុងការបង្កើតការប្រកួតប្រជែងពានរង្វាន់ថ្មីមួយ ដែលមានឈ្មោះថា European Super League (ESL) ។
ការប្រកាសខាងលើនេះ បានកំពុងធ្វើឱ្យរំជើបរំជួលយ៉ាងខ្លាំងនៅក្នុងវិស័យបាល់ទាត់។ ខណៈមកទល់ពេលនេះ ក្លិបដែលបានយល់ព្រមចូលរួមប្រកួតប្រជែងពានរង្វាន់ថ្មីនេះ ដែលជាការផ្តួចផ្តើមគំនិតក្នុងការបង្កើតឡើងដោយលោក Florentino Perez ម្ចាស់ក្លិប Real Madrid រួមមាន Barcelona, Atletico Madrid, Manchester United, Manchester City, Chelsea, Arsenal, Tottenham Hotspur, Liverpool, Juventus, Inter Milan និង A.C. Milan និងក្លិបមួយចំនួនផ្សេងទៀត ក៏បង្ហាញពីបំណងចង់ចូលរួមផងដែរ។
សូមរំលឹកថា កាលពីថ្ងៃទី ៤ ខែ កក្កដា ឆ្នាំ ២០០៩ លោក Florentino Perez បានរិះគន់ចំៗ ព្រមទាំងសម្តែងការមិនពេញចិត្តចំពោះការប្រកួតប្រជែងក្នុងពានរង្វាន់ Champions League ដោយលោកបានលើកឡើងថា «យើងត្រូវតែយល់ព្រមរួមគ្នាដើម្បីបង្កើតពានរង្វាន់ European Super League ថ្មីមួយ ដែលអាចធានាថាវាល្អបំផុត និងមានអ្វីៗថ្មីដែល Champions League គ្មាន»។
សហព័ន្ធបាល់ទាត់ពិភពលោក FIFA រួមនិងសហព័ន្ធបាល់ទាត់ទ្វីបអឺរ៉ុប UEFA បានព្រមានភ្លាមៗកាលពីយប់ថ្ងៃអាទិត្យថា កីឡាករដែលចូលរួមការប្រកួតពានរង្វាន់ European Super League នឹងត្រូវបានហាមឃាត់មិនឱ្យចូលរួមការប្រកួតពានរង្វាន់ផ្សេងទៀតទាំងក្នុងស្រុក និងទ្វីបអឺរ៉ុប។ ហើយកីឡាករទាំងនោះថែមទាំងអាចត្រូវកាត់ឈ្មោះចេញពីក្រុមជម្រើសជាតិរបស់ពួកគេ សម្រាប់ការប្រកួតពានរង្វាន់ World Cup ផងដែរ។
ចែករំលែកព័តមាននេះ