ខេត្តកំពង់ឆ្នាំង ៖ បុរសម្នាក់សុខចិត្តធ្វើដំណើរដោយថ្មើរជើងចេញពីរាជធានីភ្នំពេញមកកាន់ស្រុកកំណើតនៅស្រុកកំពង់ត្រឡាច ខេត្តកំពង់ឆ្នាំង ទាំងផ្ទុកមេរោគកូវីដ១៩ ។យ៉ាងណាក្តី នៅរសៀលថ្ងៃទី១៧ ខែមេសា ឆ្នាំ២០២១ បុរសរូបនោះត្រូវបានមន្ទីរជំនាញសហការជាមួយអាជ្ញាធរមូលដ្ឋានយកទៅដាក់កន្លែងព្យាបាលក្នុងមន្ទីរពេទ្យបង្អែកខេត្តកំពង់ឆ្នាំងរួចហើយ មិនបញ្ជូនទៅរាជធានីភ្នំពេញវិញទេ។
បើតាមការបញ្ជាក់របស់អធិការស្រុកកំពង់ត្រឡាច លោកវរសេនីយ៍ឯក នន ស៊ីណាត បានឲ្យដឹងថា បុរសដែលវិជ្ជមានកូវីដ១៩ ខាងលើមានឈ្មោះ អ៊ុន មុន្នីរតនៈ អាយុ៣១ឆ្នាំ មានទីលំនៅសង្កាត់បឹងកក់២ ខណ្ឌទួលគោក រាជធានីភ្នំពេញ។ ហើយកាលពីថ្ងៃទី១៧ ខែមេសា បុរសរូបនោះបានធ្វើដំណើរពីរាជធានីភ្នំពេញមកស្រុកកំពង់ត្រឡាច ដោយដើរថ្មើជើង (ដើម្បីគេចសមត្ថកិច្ចយាមតាមដងផ្លូវ )។
ប្រភពដដែលបន្តថា លុះមកដល់ផ្សារត្រាច ក្នុងភូមិសាស្ត្រស្រុកកំពង់ត្រឡាច ក៏បានហៅម៉ូតូកង់បីឥណ្ឌាជិះ ដើម្បីបន្តដំណើរមកដល់ភូមិស្នាពេជ្រ ឃុំឈូកស ស្រុកកំពង់ត្រឡាច។ គ្រាន់តែចូលមកដល់របងភូមិភ្លាម ក៏មានឈ្មោះ កង ទិត ដែលត្រូវជាបងប្អូនមិនឲ្យឈ្មោះ អ៊ុន មុន្នីរតនៈ ចូលផ្ទះទេ ព្រោះបានទទួលព័ត៌មានពីក្រុមគ្រួសារនៅភ្នំពេញថា គាត់មានវិជ្ជមានកូវីដ១៩ ដោយបានឲ្យឈរនៅខាងក្រៅផ្ទះ ហើយក៏បានរាយការណ៍ប្រាប់សមត្ថកិច្ច និងមន្ទីរជំនាញ រួចក៏បានយកទៅព្យាបាលនៅស្រុកកំពង់ត្រឡាចតែម្ដងទៅ ។
ជាមួយគ្នានេះ លោកវិជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង នៅរសៀលថ្ងៃទី១៨ ខែមេសានេះ ក៏បានបញ្ជាក់ថា បុរសឈ្មោះ អ៊ុន មុន្នីរតនៈ ពិតជារកឃើញមានវិជ្ជមានកូវីដ១៩ ប្រាកដមែន ប៉ុន្តែដោយសារតែនៅភ្នំពេញ មានអ្នកជំងឺច្រើនទើបសម្រេចយកបុរសរូបនោះមកដាក់នៅមន្ទីរពេទ្យបង្អែកខេត្តកំពង់ឆ្នាំង ដើម្បីព្យាបាលតែម្ដង ។
ជាមួយគ្នានេះផងដែរ លោកក៏បានអំពាវនាវដល់អ្នករត់កង់បីឥណ្ឌា ដែលបានដឹកបុរសខាងលើ សូមរួសរាន់ទៅយកសំណាក ដើម្បីពិនិត្យ និងធ្វើចត្តាឡីស័កនៅផ្ទះ តាមការណែនាំរបស់ក្រសួងសុខាភិបាលជាបន្ទាន់ផងដែរ ។
គួរបញ្ជាក់ផងដែរថា ក្រោយពីមានការអំពាវនាវឱ្យអ្នករត់ម៉ូតូកង់បីឥណ្ឌាដែលបានដឹកបុរសខាងលើ ឱ្យរួសរាល់ទៅយកសំណាកដើម្បីពិនិត្យនោះ ម្ចាស់ម៉ូតូកង់បីឥណ្ឌាដែលបានដឹកបុរសមានផ្ទុកកូវីដ១៩នោះ ក៏បានមកដល់មន្ទីរពេទ្យដើម្បីយកសំណាកទៅធ្វើតេស្តុរកវីរុសកូវីដ១៩ និងធ្វើចត្តាឡីស័កនៅផ្ទះរយៈពេល១៤ថ្ងៃផងដែរ ៕
ចែករំលែកព័តមាននេះ