រាជធានីភ្នំពេញ ៖ ទីបំផុត បុរសម្នាក់ដែលបើករថយន្តទំនើបមានពាក់ស្លាកលេខនគរបាលឡាយវីដេអូបង្ហោះថា«ខ្លួនជាឧត្តមសេនីយ៍ ដោយពុំមាននរណាម្នាក់ហ៊ានចាប់ខ្លួននោះ » ត្រូវបានសមត្ថកិច្ចនគរបាលខណ្ឌជ្រោយចង្វា ធ្វើការស្ទាក់ឃាត់ខ្លួនបានហើយ នៅវេលាម៉ោងជាង១១ព្រឹកថ្ងៃទី១៧ មេសា នេះ ដោយបានបញ្ជូនទៅស្នងការនគរបាលរាជធានីភ្នំពេញ ដើម្បីសាកសួរ ។
សេចក្តីរាយការណ៍បន្តថា ការឃាត់ខ្លួនបុរសខាងលើ គឺមានការសហការពីកម្លាំងនគរបាលគ្រប់ខណ្ឌទាំងអស់ ដោយចាំឃ្លាំមើលភិនភាគរថយន្ត និងចាំមើលបុគ្គលរូបនេះតែម្តង ។ សូមបញ្ជាក់ថា គាត់បានបង្ហោះវីដេអូនៅលើបណ្ដាញសង្គមពេលកំពុងបើកបររថយន្ដ និងបានប្រើប្រាស់ពាក្យសម្ដីមិនសមរម្យហើយតាំងខ្លួនថា ជាឧត្តមសេនីយ៍ មិនមាននរណាហ៊ានចាប់នោះទេ ទោះបីខ្លួនគ្មានភារកិច្ចក្នុងការធ្វើដំណើរចាំបាច់ក្នុងពេលរាជធានីភ្នំពេញ ត្រូវបានបិទខ្ទប់ក៏ដោយ ។
បុរសរូបនេះ បានបើករថយន្តធ្វើដំណើរតាមដងផ្លូវឡាយវីដេអូបង្ហោះជាសាធារណៈក្នុងសម្លៀកបំពាក់អាវយឺតស និងស្លៀកខោខ្លីតែប៉ុណ្ណោះ ។ បច្ចុប្បន្ន បុរសរូបនេះរង់ចាំការសួរនាំ និងពិនិត្យមើលជាក់ស្តែងសិន ដើម្បីចាត់ការបន្ត។ ព័ត៌មានបន្ថែមកោះសន្តិភាពនឹងមានផ្សាយជូនបន្ត ។ ដោយ៖ ម៉េង ធា
ចែករំលែកព័តមាននេះ