រាជធានីភ្នំពេញ ៖ ជនសង្ស័យ២នាក់បានធ្វើសកម្មភាពឆក់កាបូបដៃពីស្ត្រីម្នាក់បានសម្រេចទៅហើយ ខណៈដែលស្ត្រីខាងលើកំពុងជិះម៉ូតូទៅផ្សារ ដើម្បីរកទិញសម្ភារៈប្រើប្រាស់ បន្ទាប់មកក្រុមជនសង្ស័យទាំងនេះបានព្យាយាមជិះម៉ូតូរត់គេចខ្លួន ចំណែកស្ត្រីរងគ្រោះបានស្រែកថា«ចោរៗ»បង្កឲ្យមានការភ្ញាក់ផ្អើល ជាហេតុធ្វើឲ្យជនសង្ស័យភ័យស្លន់ស្លោរជ្រុលទៅបុកប៉ារ៉ាស់គោលដៅបិទ (Lockdown) ។
ភ្លាមៗនោះក៏ត្រូវបានកម្លាំងសមត្ថកិច្ចឃាត់ខ្លួនបាននាំយកទៅសួរនាំ ហើយជនសង្ស័យបានសារភាពថា ខ្លួនធ្លាប់ធ្វើសកម្មភាពបានសម្រេច២លើករួចមកហើយ លុះលើកទី៣នេះ មកពីពួកខ្លួនគ្មានលុយទិញបាយហូប ទើបចេញឆក់ទៀតហើយ ក៏ត្រូវអស់លក្ខណ៍បែបនេះតែម្ដង ។
ហេតុការណ៍នេះកើតឡើងនៅវេលាម៉ោង ១និង១០នាទីរសៀលថ្ងៃទី១៦ មេសា ឆ្នាំ២០២១ នៅតាមផ្លូវបេតុងចូលវត្តតាំងកសាង ស្ថិតនៅក្នុងភូមិក្បាលដំរីទី១ សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យខាងលើនោះម្នាក់ឈ្មោះ រ៉េត ដេវិត ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅភូមិប៉ប្រកខាងជើង សង្កាត់កាកាបទី១ ខណ្ឌពោធិ៍សែនជ័យ។និងម្នាក់ទៀតឈ្មោះ សារ៉ន សក្កិ ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅភូមិដីថ្មី សង្កាត់គោកឃ្លាង សែនសុខ ។
ដោយឡែកស្ត្រីរងគ្រោះមានឈ្មោះ ឈុន លាង អាយុ៤១ឆ្នាំ មុខរបរមេផ្ទះ ស្នាក់នៅក្នុងភូមិកើតហេតុខាងលើ ហើយនៅក្នុងកាបូបមានលុយ២០០ដុល្លារ និងទូរស័ព្ទដៃ១គ្រឿង ត្រូវបានដកហូតយកមកវិញ ។
តាមប្រភពបានដឹងថា មុនពេលកើតហេតុ ជនរងគ្រោះបានជិះម៉ូតូចេញពីផ្ទះក្នុងគោលបំណងទៅរកទិញសម្ភារៈប្រើប្រាស់ នៅផ្សារតាំងកសាង ដោយធ្វើដំណើរតាមផ្លូវបេតុង ក្នុងទិសដៅពីត្បូងទៅជើង ។ លុះចេញពីផ្ទះបានបន្តិច ក៏ស្រាប់តែមានជនសង្ស័យ២នាក់ខាងលើជិះម៉ូតូម៉ាកស៊ុយហ្ស៊ុយគីនិច ពណ៌សលាយលឿង ពាក់ស្លាកលេខ1W-6630 ទៅពីក្រោយធ្វើសកម្មភាពឆក់កាបូបដែលស្ត្រីរងគ្រោះដាក់នៅឃ្លុបម៉ូតូខាងឆ្វេងដៃ ។
ប្រភពដដែលបានបន្តទៀតថា បន្ទាប់មកជនសង្ស័យបានបើកម៉ូតូរត់គេចខ្លួន ហើយត្រូវស្តីរងគ្រោះស្រែកឆោឡោ ថា«ចោរៗ»បង្កឲ្យមានការភ្ញាក់ផ្អើលដល់កម្លាំងសមត្ថកិច្ច ជួយប្រកាសតាមវិទ្យុទាក់ទង ជាហេតុធ្វើឲ្យជនសង្ស័យភ័យក៏បានជិះម៉ូតូជ្រុលទៅបុកប៉ារ៉ាស់បិតខ្ទប់ផ្លូវ (Lockdown) ហើយក៏ត្រូវឃាត់ខ្លួនបានភ្លាមៗតែម្តង ។
បន្ទាប់មកសមត្ថកិច្ចបានដកហូតយកកាបូបប្រគល់ជូនជនរងគ្រោះវិញ ព្រមទាំងនាំយកជនសង្ស័យទៅធ្វើការសួរនាំ ហើយជននេះបានសារភាពថា ពួកខ្លួនពិតជាបានធ្វើសកម្មភាពឆក់កាបូបពីស្ត្រីរងគ្រោះពិតប្រាកដមែន ។
កន្លងមកពួកខ្លួនធ្លាប់ធ្វើសកម្មភាពឆក់បានសម្រេច២ដងរួចមកហើយ គឺលើទី១ឆក់នៅម្តុំផ្សារដីហុយ ខណ្ឌសែនសុខ និងលើទី២ ឆក់នៅម្តុំវត្តអង្គតាម៉ិញ លុះលើកទី៣នេះក៏ត្រូវចាប់ខ្លួនតែម្តង មូលហេតុដែលពួកខ្លួនចេញធ្វើសកម្មភាពលើកទី៣នេះព្រោះពួកខ្លួនដាច់លុយគ្មានលុយទិញបាយហូប៕
ចែករំលែកព័តមាននេះ