ផលិតករដ៏ល្បីល្បាញក្នុងរឿង នេសាទក្រពើ ទទួលមរណភាពដោយសារ ជំងឺកូវីដ-១៩
រាជធានីភ្នំពេញ ៖ លោក ម៉ៅ អាយុទ្ធ រដ្ឋលេខាធិការក្រសួងព័ត៌មាន បានទទួលមរណភាពហើយ នៅមន្ទីរពេទ្យមិត្តភាពខ្មែរ-សូវៀត នាវេលាម៉ោង៦ល្ងាច ថ្ងៃទី១៥…
រាជធានីភ្នំពេញ ៖ លោក ម៉ៅ អាយុទ្ធ រដ្ឋលេខាធិការក្រសួងព័ត៌មាន បានទទួលមរណភាពហើយ នៅមន្ទីរពេទ្យមិត្តភាពខ្មែរ-សូវៀត នាវេលាម៉ោង៦ល្ងាច ថ្ងៃទី១៥ ខែមេសា ឆ្នាំ២០២១ ។
ផលិករភាពយន្ត និងជារដ្ឋលេខាធិការក្រសួងព័ត៌មាន លោក ម៉ៅ អាយុទ្ធ រកឃើញវិជ្ជមានកូវីដ-១៩ កាលពីយប់ថ្ងៃទី០៦ ខែមេសា ឆ្នាំ២០២១ និងត្រូវបានក្រុមគ្រូពេទ្យ យកទៅសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀត ឬមន្ទីរពេទ្យរុស្ស៊ី ។
គិតមកដល់ពេលនេះ លោក ម៉ៅ អាយុទ្ធ មានអាយុ៧៧ឆ្នាំ រស់នៅភូមិ០៧ សង្កាត់បឹងរាំង ខណ្ឌដូនពេញ ។ លោកត្រូវបានចាត់ថា ជាមន្ត្រីជាន់ខ្ពស់ម្នាក់ និងជាផលិតករភាពយន្តដ៏ល្បីល្បាញមួយរូប ក្នុងចំណោមផលិតករជើងខ្លាំងៗដ៏ទៃទៀត ។ លោកមានស្នាដៃជាច្រើនក្នុងវិស័យសិល្បៈខ្មែរ ក្នុងនោះមានស្នាដៃផលិតខ្សែភាពយន្តខ្សែវីដេអូចម្រៀងកាយវិការកំណាព្យប្រលោមលោកជាដើម ។
បើយោងតាមលោក កឹម គុណវឌ្ឍន៍ បានអោយដឹងថា រៀមច្បងដ៏ល្បី ដ៏សំខាន់ក្នុងវិស័យទូរទស្សន៍ជាតិ និងភាពយន្តរបស់ខ្មែរ គឺ ឯកឧត្តម ព្រឹទ្ធាចារ្យ ម៉ៅ អាយុទ្ធ ដែលរូបលោកជាគ្រូបាធ្យាយដ៏ច្បងមួយរូប លោកបានបណ្តុះដល់អ្នកបន្តវេនយ៉ាងច្រើនលើសលប់ នៅក្នុងវិស័យនេះ រួមមានទាំងរូបលោក និងលោក-លោកស្រី ជាតារាភាពយន្ត, អ្នកអត្ថាធិប្បាយ, អ្នកថតវីដេអូ កាម៉េរ៉ាថ្នាក់អន្តរជាតិ, អ្នកសម្តែង និងអ្នកកវីនិពន្ធ រាប់រយ រាប់ពាន់នាក់ ។
លោក កឹម គុណវឌ្ឍន៍ បន្តថា លោកចងចាំនូវកំណាព្យរបស់លោក ម៉ៅ អាយុទ្ធ «ប្រភេទលុយ» និងស្នាដៃ វណ្ណកម្មភាពយន្តខ្មែរ មានដូចជា៖ រឿង ទឹករាំផ្ការាំ, រឿង បិទភ្នែក ហែកទ្រូង, រឿង ចិត្តចងចាំ, រឿង ឆ្អឹងអណ្តែត, រឿង នេសាទក្រពើ, រឿង ហ្លួងព្រះស្តេចកន និងខ្សែភាពយន្តប្រចាំស.វ «កូនប្រុស ក្រោមពន្លឺចន្ទ» ដែលលោកកំពុងតែដឹកនាំថត គឺជាមរតកអរូបី ដែលខ្មែរសូមចងចាំជានិច្ច ។
លោក កឹម គុណវឌ្ឍន៍ ក៏សូមគោរពឧទ្ទិសដល់ឥន្ទព្រហ្ម ទេវតា សូមយាងចុះយកវិញ្ញាណក្ខន្ធ រៀមច្បងឯកឧត្តម ម៉ៅ អាយុទ្ធ ទៅតម្កល់នៅឯឋានបរមសុខ ជាទីស្ងប់ដ៏សុខសាន្ត ។ ខ្ញុំបាទ កឹម គុណវឌ្ឍន៍ ជាកូនចៅ ជាសិស្ស សូមគោរពសព និងវិញ្ញាណក្ខន្ធព្រឹទ្ធាចារ្យ ម៉ៅ អាយុទ្ធ ពីចម្ងាយ ដោយក្តីសោកសៅជាទីបំផុត ៕
ចែករំលែកព័តមាននេះ