រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យទី៣ នៃមន្ទីរប្រឆាំងគ្រឿងញៀន កាលពីរសៀលថ្ងៃទី១០ ខែមេសា ឆ្នាំ២០២១ បានចាត់បញ្ជូនឈ្មួញគ្រឿងញៀន៣នាក់ទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរ នឹងចោទប្រកាន់ជាផ្លូវការ…
រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យទី៣ នៃមន្ទីរប្រឆាំងគ្រឿងញៀន កាលពីរសៀលថ្ងៃទី១០ ខែមេសា ឆ្នាំ២០២១ បានចាត់បញ្ជូនឈ្មួញគ្រឿងញៀន៣នាក់ទៅកាន់សាលាដំបូងរាជធានីភ្នំពេញ ដើម្បីធ្វើការសាកសួរ នឹងចោទប្រកាន់ជាផ្លូវការ ។
ជនសង្ស័យជាឈ្មួញគ្រឿងញៀនទាំង៣នាក់នោះ មាន ១.ឈ្មោះ អ៊ឹម ឈួន អាយុ៥១ឆ្នាំ ឋានន្ទរសក្ដិ ថ្នាក់ឧត្តមសេនីយ៍ត្រី និងមានតួនាទីជាស្នងការរងនគរបាលខេត្តកំពត ទទួលផែនអគ្គិភ័យ និងអាវុធជាតិផ្ទុះ (ជាមេក្លោង) ។ ២.ឈ្មោះ កែវ ទិត្យមេសា អាយុ២១ឆ្នាំ និង៣.ឈ្មោះ ហុង គា អាយុ៦១ឆ្នាំ ជាបក្ខពួក ។
សំណុំរឿងនេះ បានស្ថិតនៅលោក សេង គឹមឡាក់ ព្រះរាជអាជ្ញារងបើកការស៊ើបសួរ ប៉ុន្តែការសាកសួរនាររសៀលថ្ងៃនោះមិនទាន់ចប់សព្វគ្រប់ទេ ដូច្នោះទើបតំណាងអយ្យការបានផ្ញើឈ្មួញគ្រឿងញៀនទាំង៣នាក់នោះទៅសមត្ថកិច្ចវិញ នឹងតម្រូវឲ្យនាំមកសួរនៅព្រឹកថ្ងៃទី១១ ខែមេសា នេះបន្តទៀត ។
សូមរម្លឹកថា ប៉ុន្មានថ្ងៃមកនេះ បណ្តាញសង្គមហ្វេសប៊ុកបានបង្ហោះផ្សព្វផ្សាយព័ត៌មានព្រោងព្រាត ស្តីពីការឃាត់ខ្លួនស្នងការរងនគរបាលខេត្តកំពតម្នាក់ ជាមេក្លោងជួញដូរគ្រឿងញៀន និងបក្ខពួក២នាក់ដែលត្រូវបានកម្លាំងសមត្ថកិច្ចនគរបាលការិយាល័យទី៣ នៃមន្ទីរប្រឆាំងគ្រឿងញៀនចាប់ខ្លួន កាលពីថ្ងៃទី៦ ខែមេសា ឆ្នាំ២០២១ នេះ ដែលប្រតិបត្តិការនោះបានធ្វើឡើងនៅចំណតរថយន្តផ្សារខាលែនឌែលម៉ល ម្តុំបឹងកក់ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
ក្នុងនោះ សមត្ថកិច្ចក៏បានធ្វើការដកហូតវត្ថុតាងថ្នាំញៀន ប្រភេទម៉េតំហ្វេតាមីន (ICE) ចំនួន២កញ្ចប់ ស្មើ ទម្ងន់១.៧៣៨.៣៣ក្រាម (ជិត២គីឡូក្រាម) ផងដែរ ។ ជនសង្ស័យ និងវត្ថុតាង ត្រូវបានកម្លាំងសមត្ថកិច្ចនាំខ្លួនទៅកាន់មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ ដើម្បីបើកការស៊ើបអង្កេតបន្ត ដែលក្នុងនោះសមត្ថកិច្ចក៏បានតាមប្រមាញ់រកចាប់ខ្លួនបក្ខពួកបន្ថែមទៀត ប៉ុន្តែលទ្ធផលមិនមានចាប់ខ្លួនជនសង្ស័យណាបានម្នាក់នោះទេ ។
សរុបចុងក្រោយ សមត្ថកិច្ចក៏បានកសាងសំណុំរឿងបញ្ជូនជនសង្ស័យជាឈ្មួញគ្រឿងញៀន៣នាក់ ដែលមានម្នាក់ពាក់ផ្កាយ១ ស្នងការរងនគរបាលខេត្តកំពត ជាមក្លោង និងថ្នាំញៀនជិត២គីឡូក្រាមនោះទៅតុលាការ ដើម្បីចាត់ការតាមនីតិវិធី ។
យ៉ាងណាក្តី ជនសង្ស័យទាំង៣នាក់នេះ គឺមិនអាចគេចផុតពីការឃុំខ្លួន ដាក់ពន្ធនាគារជាបណ្តោះអាសន្ននោះទេ ដើម្បីរង់ចាំការផ្តន្ទាទោសតាមផ្លូវច្បាប់ ៕
ចែករំលែកព័តមាននេះ