រាជធានីភ្នំពេញ ៖ រោងចក្រកាត់ដេរម៉េង អៀង ហ្គាមេន ហ្វាក់តូរីអិលធីឌី និងផ្ទះជួលរបស់កម្មករចំនួន ៧ទីតាំង ត្រូវបានគណៈបញ្ជាការឯកភាពរដ្ឋបាលខណ្ឌទួលគោក ចុះបិទ…
រាជធានីភ្នំពេញ ៖ រោងចក្រកាត់ដេរម៉េង អៀង ហ្គាមេន ហ្វាក់តូរីអិលធីឌី និងផ្ទះជួលរបស់កម្មករចំនួន ៧ទីតាំង ត្រូវបានគណៈបញ្ជាការឯកភាពរដ្ឋបាលខណ្ឌទួលគោក ចុះបិទ បន្ទាប់ពីរកឃើញកម្មករ កម្មការីនីចំនួន៩នាក់ មានវិជ្ជមានកូវីដ១៩ ។
ការចុះបិទផ្ទះ និងរោងចក្រនេះ បានធ្វើឡើងជាបន្តបន្ទាប់តាំងពីម៉ោងប្រមាណ១រសៀល រហូតដល់ម៉ោងប្រមាណ៥ល្ងាច ថ្ងៃទី១០ ខែមេសា ឆ្នាំ២០២១ ដែលដឹកនាំដោយលោក ឯក ឃុនដឿន អភិបាល នៃគណៈអភិបាលខណ្ឌទួលគោក។ រោងចក្រកាត់ដេរ ម៉េង អៀង ហ្គាមេន ហ្វាក់តូរីអិលធីឌី ត្រូវបានគេដឹងថា ស្ថិតនៅតាមផ្លូវលេខ ៥២៨ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ដែលមានកម្មករប្រមាណ១៤៨១នាក់។
តាមលោកឯក ឃុនដឿន ដែលបានបង្ហោះនៅក្នុងផេករបស់សាលាខណ្ឌទួលគោក បានអោយដឹងថា ផ្ទះជួលរបស់កម្មករ-កម្មការិនីរោងចក្រ ម៉េង អៀង មានវិជ្ជមានកូវីដ-១៩ នៅក្នុងសង្កាត់បឹងកក់ទី១ ខណ្ឌទួលគោក ដែលកម្លាំងចុះបិទចំនួន០៧គោលដៅ ៖
១-ផ្ទះលេខ៥ ផ្លូវ៣៥១ ភូមិ២ សង្កាក់បឹងកក់ទី១ មានចំនួន០២នាក់ ជាកម្មការិនីរោងចក្រ ម៉េង អៀង,
២-ផ្ទះលេខ២៤ ផ្លូវ៣៤៩ ភូមិ៣ មានចំនួន០២នាក់ ជាកម្មការិនីរោងចក្រ ម៉េង អៀង,
៣-ផ្ទះលេខ៩ ផ្លូវ៣៤៩ ភូមិ២ មានចំនួន០១នាក់ (ស្រី),
៤-ផ្ទះលេខ៧ ផ្លូវ៣៤៧ ភូមិ៣ មានចំនួន០១នាក់ (ស្រី),
៥-ផ្ទះលេខ៣៤ ផ្លូវលេខ៥២៨ ភូមិ៥ មានចំនួន០១នាក់ ជាកម្មការិនីម៉េង អៀង,
៦-ផ្ទះលេខ៨ ផ្លូវលេខ៣៣៩ ភូមិ៤ មានចំនួន០១នាក់ (ស្រី) ជាកម្មការនីម៉េង អៀង,
និង៧-ផ្ទះលេខ៤២ ផ្លូវលេខ៣៤៥ ភូមិ៣ មានចំនួន០១នាក់ ជាកម្មការិនីម៉េង អៀង។
តាមអាជ្ញាធរអោយដឹងទៀតថា ចំពោះទីតាំងខាងលើ គណៈបញ្ជាការឯកភាពរដ្ឋបាលខណ្ឌទួលគោក បានបិទហ៊ុមព័ទ្ធទីតាំង ដោយហាមចេញ-ចូល ហើយឲ្យអ្នកជំងឺទាំង០៩នាក់ រង់ចាំក្រុមគ្រូពេទ្យមកទទួលពួកគាត់ទៅព្យាបាល។ ដោយឡែក អ្នករងផលប៉ះពាល់ចំនួន២០៥នាក់ ក្នុងស្រី១១៥នាក់ ឱ្យធ្វើចត្តាឡីស័កនៅនឹងផ្ទះដែលបានបិទ ដើម្បីរង់ចាំសហការជាមួយក្រុមគ្រូពេទ្យ ចុះមកវិភាគ និងយកសំណាកទៅធ្វើតេស្ត។
គួររំលឹកថា កម្មករ កម្មាការីនី របស់រោងចក្រកាត់ដេរម៉េង អៀង ហ្គាមេន ហ្វាក់តូរីអិលធីឌី ប្រមាណជាង៧០០នាក់ ត្រូវបានក្រុមគ្រូពេទ្យចុះយកសំណាកជាបន្តបន្ទាប់ និងណែនាំឱ្យធ្វើចត្តាឡីស័ក បន្ទាប់ពីកម្មករម្នាក់រកឃើញវិជ្ជមានកូវីដ១៩ ហើយត្រូវបានក្រុមគ្រូពេទ្យចុះយកទៅព្យាបាលកាលពីវេលាម៉ោង៥និង៤០នាទី ថ្ងៃទី០៤ ខែមេសា ឆ្នាំ២០២១។
កម្មករដែលវិជ្ជមានកូវីដ១៩រូបនោះជាបុរសអាយុ២៦ឆ្នាំ ជនជាតិខ្មែរ ជាបុគ្គលិកក្រុមហ៊ុនរោងចក្រម៉េង អៀងហ្គាមេន ហ្វាក់តូរីអិលធីឌី ស្នាក់នៅបន្ទប់ជួលក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ។ ដោយឡែកបន្ទប់ផ្ទះជួលចំនួន៥៣បន្ទប់ចេញ-ចូលផ្លូវតែមួយ ក្នុងនោះមានកម្មករ កម្មការីនីស្ទើរតែទាំងអស់ស្នាក់នៅ ត្រូវបានអាជ្ញាធរ និងសមត្ថកិច្ចធ្វើការឡោមព័ទ្ធដើម្បីឱ្យធ្វើចត្តាឡីស័កចំនួន១៤ថ្ងៃ ។
ទន្ទឹមនោះ នៅក្នុងរោងចក្រ ក៏ត្រូវបានអាជ្ញាធរ និងក្រុមគ្រូពេទ្យ រកឃើញ អ្នកពាក់ព័ន្ធផ្ទាល់ និងប្រយោលត្រូវបានក្រុមគ្រូពេទ្យចុះយកសំណាកជាង៧០០នាក់ ក្នុងចំណោមកម្មករទាំងអស់១៤៨១នាក់ ហើយរកឃើញវិជ្ជមានកូវីដ១៩ ចំនួន៩នាក់ និងអាចនៅមានបន្តបន្ទាប់ទៀត ទើបអាជ្ញាធរ សម្រេចបិទរោងចក្រ ហើយធ្វើការណែនាំឱ្យកម្មករ កម្មការីនី ធ្វើចត្តាឡីស័កតែម្តង៕
ចែករំលែកព័តមាននេះ