ខេត្តប៉ៃលិន ៖ មានសត្វគោញី១ក្បាលក្នុងចំណោមសត្វគោជាច្រើនក្បាលរបស់អ្នកភូមិ បានដើរជាន់មីនស្គរដែលកប់នៅក្នុងដីសេសសល់ពីសម័យសង្គ្រាម បណ្តាលឱ្យរងរបួសជើងឆ្វេងផ្នែកខាងក្រោយ ត្រូវបានអ្នកភូមិឃើញក៏ប្រាប់ម្ចាស់ឱ្យដឹកយកទៅផ្ទះ ខណៈគេព្រលែងឱ្យដើរស៊ីស្មៅនៅជាប់មាត់អូរក្បែរជើងភ្នំ ជារៀងរាល់ថ្ងៃមិនមានអ្វីកើតឡើង ។ តែក្រោយពីឃើញសត្វគោផ្ទុះមីនរងរបួស១ក្បាល…
ខេត្តប៉ៃលិន ៖ មានសត្វគោញី១ក្បាលក្នុងចំណោមសត្វគោជាច្រើនក្បាលរបស់អ្នកភូមិ បានដើរជាន់មីនស្គរដែលកប់នៅក្នុងដីសេសសល់ពីសម័យសង្គ្រាម បណ្តាលឱ្យរងរបួសជើងឆ្វេងផ្នែកខាងក្រោយ ត្រូវបានអ្នកភូមិឃើញក៏ប្រាប់ម្ចាស់ឱ្យដឹកយកទៅផ្ទះ ខណៈគេព្រលែងឱ្យដើរស៊ីស្មៅនៅជាប់មាត់អូរក្បែរជើងភ្នំ ជារៀងរាល់ថ្ងៃមិនមានអ្វីកើតឡើង ។
តែក្រោយពីឃើញសត្វគោផ្ទុះមីនរងរបួស១ក្បាល អ្នកភូមិម្នាក់ៗ ដែលធ្លាប់ដើរឃ្វាលគោនៅចំណុចខាងលើ ព្រលឹងចុងសក់ ។ ហេតុការណ៍ សត្វគោញី១ក្បាល ដើរស៊ីស្មៅក្បែរជើងភ្នំជាប់មាត់អូរ បណ្តាលឱ្យផ្ទុះដាច់ជើងឆ្វេងផ្នែកខាងក្រោយនេះបានកើតឡើង កាលពីវេលាម៉ោង៩និង៣០នាទីព្រឹក ថ្ងៃទី១០ ខែមេសា ឆ្នាំ២០២១ ស្ថិតនៅក្នុងភូមិថ្នល់កែង ឃុំសាលាក្រៅ ខេត្តប៉ៃលិន ។
ប្រភពព័ត៌មានពីសមត្ថកិច្ចនគរបាលនៃអធិការស្រុកសាលាក្រៅបានឱ្យដឹងថា ៖ មានអ្នកភូមិម្នាក់បានឃ្វាលហ្វូងគោជាច្រើនក្បាលរបស់ខ្លួនដោយព្រលែងឱ្យដើរស៊ីស្មៅក្បែរមាត់អូរ ជាប់នឹងជើងភ្នំដោះក្រមុំ ដូចសព្វមួយដង ។ តែតាំងពីយូរមកហើយ មិនមានបញ្ហាអ្វីកើតឡើងនោះទេ ខណៈនៅចំណុចខាងលើក៏មិនទាន់មានអង្គភាពកំចាត់មីនណាមួយចូលទៅរាវរកគ្រាប់មីននោះដែរ ។
ប្រភពបន្តទៀតថា ស្របពេលដែលមេឃបានបង្អុរភ្លៀង ជោកជាំជាច្រើនមេ ធ្វើឱ្យដីនៅក្បែរជើងភ្នំ ជាប់មាត់អូរខាងលើ ទៅជាទន់ជ្រាយ លុះសត្វគោដើរស៊ីស្មៅនៅទីនោះចុះឡើងៗ ក៏ជាន់ទៅលើគ្រាប់មីនស្គរដែលសេសសល់ ពីសម័យសង្គ្រាម បណ្តាលឱ្យផ្ទុះរងរបួសជើងឆ្វេងតែម្តង ។
ក្រោយពេលកើតហេតុ ម្ចាស់គោខាងលើបានដឹកសត្វគោរបស់ខ្លួនឆ្លងទឹកអូរបម្រុងទៅផ្ទះ តែដោយសាររបួសធ្ងន់ មិនដឹងបន្តដើរឆ្លងបាន ក៏ដេកនៅក្នុងអូរ រហូតដល់ម្ចាស់ហៅអ្នកភូមិឱ្យជួយគាស់ ដឹកតាមរថយន្តយកទៅផ្ទះ ដើម្បីលក់ឱ្យខាងទីសត្វឃាតនៅព្រឹកថ្ងៃដដែល ។
បន្ទាប់ពីឃើញសត្វគោ១ក្បាលដើរជាន់លើមីនស្គរផ្ទុះរងរបួសបែបនេះ អ្នកភូមិជាច្រើនមានការ ព្រួយបារម្ភពីសុវត្ថិភាព ដោយម្នាក់ៗ មិនចង់ដើរតាមមាន់អូរត្រង់កន្លែងកើតហេតុនោះទេ ក្រែងមានគ្រាប់មីនសេសសល់នៅទីនោះច្រើនទៀត បង្កគ្រោះថ្នាក់ដល់ពួកគាត់ ។
អ្នកភូមិក៏សំណូមពរឱ្យអាជ្ញាធរមូលដ្ឋានផ្តល់ដំណឹងនេះដល់ខាងអង្គភាពកំចាត់មីន ដើម្បីចូលទៅរាវរកគ្រាប់មីន និងគ្រាប់មិនទាន់ផ្ទុះនៅចំណុចខាងលើ ដើម្បីឱ្យពួកគាត់ អាចប្រកបរបរចំការ ដោយមិនខ្លាចញញើតផងដែរ ។
សូមបញ្ជាក់ថា ៖ កាលពីដើមខែមេសា ឆ្នាំ២០២១នេះ បន្ទាប់ពីមានករណីផ្ទុះគ្រាប់មីនតោន រងរបួសម្ចាស់ត្រាក់ទ័រម្នាក់ នៅឃុំសាលាក្រៅ ខាងអង្គភាពកំចាត់មីន បានរាវរកឃើញគ្រាប់មីនតោនមិន ទាន់ផ្ទុះដាក់នៅក្បែរគ្នា ចំនួន២គ្រាប់ ដែលធ្វើឱ្យកសិករម្នាក់ៗ មានអារម្មណ៍គួរឱ្យញាក់សាច់ ៕
ចែករំលែកព័តមាននេះ