ក្រសួងព័ត៌មាន សម្រេចលុបអាជ្ញាបណ្ណ គេហទំព័រ K01 ក្រោយផ្សាយបែបញុះញង់
រាជធានីភ្នំពេញ ៖ លិខិតប្រកាសរបស់លោក ខៀវ កាញារីទ្ធ រដ្ឋមន្ដ្រីក្រសួងព័ត៌មាន ចុះថ្ងៃទី១០ មេសា ២០២១នេះ បានសម្រេចលុបអាជ្ញាបណ្ណគេហទំព័រឈ្មោះ…
រាជធានីភ្នំពេញ ៖ លិខិតប្រកាសរបស់លោក ខៀវ កាញារីទ្ធ រដ្ឋមន្ដ្រីក្រសួងព័ត៌មាន ចុះថ្ងៃទី១០ មេសា ២០២១នេះ បានសម្រេចលុបអាជ្ញាបណ្ណគេហទំព័រឈ្មោះ K01 ធីវីអនឡាញ ដោយម្ចាស់អាជ្ញាបណ្ណបានផ្សព្វផ្សាយ ព័ត៌មានញុះញង់ មានចេតនាទុច្ចរិតបង្កចលាចលក្នុងសង្គម ដែលបំពានលើវិជ្ជាជីវៈសារព័ត៌មាន និងកិច្ចសន្យាអាជីវកម្ម ។
ក្រសួងព័ត៌មាន សម្រេចលុបអាជ្ញាបណ្ណ គេហទំព័រ K01 ធីវីអនឡាញ បន្ទាប់ពីមានប្រតិកម្មពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងឱកាសសម្តេចតេជោ ថ្លែងសារពិសេសជូនជនរួមជាតិ ពាក់ព័ន្ធស្ថានភាពជំងឺកូវីដ១៩ នៅកម្ពុជា នៅព្រឹកថ្ងៃទី១០ មេសា ដដែលនេះ ។
សម្តេចតេជោ ហ៊ុន សែន ថ្លែងថា «អាអន្ទិត K01 ស្រែកសុទ្ធតែប៉ុន្មាន.. អីប៉ុន្មាន ។ ក្មួយ K01 ពូផ្តាំទៅអាក្មួយ ដកវីដេអូឯង ក្រវាត់ចោលទៅ ប្រយ័ត្នណា បើថាក្បាលរឹង គឺគ្មានជម្រើសទេ ម្សិលមិញយកមួយនៅ(ខេត្តកំពង់ស្ពឺ) អាហ្នឹងនិយាយស្អី ញុះញ៉ង់ បង្កើតចលាចល (រឿងចាក់វ៉ាក់សាំង) អ៊ីចឹងមានតែគេវ៉ៃខ្នោះ តែប៉ុណ្ណឹង ។ អាហ្នឹងគេហៅថា ជាប់គុក ដូចបំណងហើយ បើចង់ជាប់គុក» ។ ដោយសារហេតុផលនេះហើយ ទើបគេមិនបិទជិតឈឹងនោះ គឺអនុញ្ញាត ឲ្យចេញនៅក្រោយម៉ោង ៥ភ្លឺ ។
សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានព្រមានថា «ប៉ុន្តែ សម្តីនិយាយឲ្យប្រយ័ត្នប្រយែង ពេលវេលានេះ មិនមែនជាពេលវេលា លោកឯង.. ព្រោះសម្តី K01 ធ្ងន់ណាស់ តែមិនដឹងថា K01 ដកចេញហើយ ឬនៅ ? ហើយរដ្ឋមន្ត្រីក្រសួងព័ត៌មានដឹងឬ អត់ទេ ? ទៅមើលឲ្យច្បាស់!» ។
ទោះជាយ៉ាងណា លោក ឃឿន សូឡា ហៅ K01 ក៏បានលុបវីដេអូចោលដែរ រួចហើយក៏បានចេញវីដេអូ វេលាម៉ោង១រសៀលថ្ងៃទី១០ មេសានេះ ធ្វើការសុំទោសដល់ សម្តេចតេជោ ហ៊ុន សែន និងរដ្ឋមន្ដ្រីក្រសួងព័ត៌មាន ផងដែរ៕
ចែករំលែកព័តមាននេះ