រាជធានីភ្នំពេញ ៖ ករណីសន្តិសុខធនាគារ ABA សាខាស្ពានអាកាសផ្សារដីហុយ ដែលបានបា.ញ់ស្លា.ប់បុរសម្នាក់ភ្លាមៗ នៅនឹងកន្លែងកើតហេតុ ត្រូវបានមន្ត្រីនគរបាល បាននិងកំពុងកសាងសំណុំរឿង នឹងបញ្ជូនខ្លួនសន្តិសុខរូបនេះ ទៅកាន់សាលាដំបូងរាជធានីភ្នំពេញ នាថ្ងៃទី៨ មេសានេះហើយ ។
ហេតុការណ៍ផ្ទុះអាវុធនេះ បង្កអោយមានការភ្ញាកផ្អើលឡើង កាលពីវេលាម៉ោងប្រមាណ០៩និង១០នាទីយប់ថ្ងៃទី០៦ ខែមេសា ឆ្នាំ២០២១ នៅចំណុចមុខធានាគារABA សាខាទឹកថ្លា ក្រោមស្ពានអាកាសផ្សារដីហុយ ស្ថិតនៅតាមបណ្ដោយមហាវិថី សហព័ន្ធរុស្ស៊ី ក្នុងភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
លោកវរសេនីយ៍ឯក ហួរ ម៉េងវ៉ាង អធិការនគរបាលខណ្ឌសែនសុខ បានប្រាប់អោយដឹងថា ក្នុងនាមជាមន្ត្រីអនុវត្តច្បាប់ យើងត្រូវតែចាប់ខ្លួនជនដៃដល់ ហើយកសាងសំណុំរឿងបញ្ជូនទៅតុលាការហើយ ។ ចំពោះការចោទប្រកាន់ ឬមិនចោទប្រកាន់ ឬមួយក៏បន្ធូរបន្ថយទោសយ៉ាងណានោះ គឺជាការសម្រេចរបស់តុលាការ ព្រោះថា មានភស្តុតាងស្រាប់ថតជាប់ក្នុងកាមេរ៉ាសុវត្ថិភាពរបស់ធានាគារ ABA ។
បើតាមរបាយការណ៍បានបង្ហាញថា យុវជនដែលស្លា.ប់ មានឈ្មោះ អ៊ូ សុផារ៉ាត់ អាយុ២៨ឆ្នាំ មុខរបរមិនពិតប្រាកដ ស្នាក់នៅបន្ទប់ជួលលេខ១០៤ ក្នុងភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ជនបង្កការផ្ទុះអាវុធ ជាសន្តិសុខធនាគារ ABA ឈ្មោះ ភឿន ភិរៈ ភេទប្រុស អាយុ ៣៦ឆ្នាំ ជាមន្ត្រីនគរបាល នៅអង្គភាពតម្រួតបទបញ្ជា ស្នាក់នៅក្នុងអង្គភាព ប្រើប្រាស់កាំភ្លើងម៉ាក រ៉ូឡូ មួយដើម បានផ្ទុះចំនួន ៤គ្រាប់ លើជនរងគ្រោះ ខណៈពេលដែលជនរងគ្រោះប្រើប្រាស់កាំបិតចុងស្រួច រត់ចូលទៅចាក់មន្ត្រីនគរបាល ដែលការពារយាមធានាគារ ដោយសារតែខឹង ជួយការពារគូទំនាស់ ។
សកម្មភាពថតនៅក្នុងកាមេរ៉ាសុវត្ថិភាព បង្ហាញច្បាស់ថា នៅវេលាយប់នោះ ខណៈពេលដែលសន្តិសុខ កំពុងតែអង្គុយយាម ស្រាប់តែមានយុវជនម្នាក់ ត្រូវបានគេដេញវាយ ហើយរត់ទៅជួបសន្តិសុខរូបនោះ អោយជួយ ។ ភ្លាមៗ យុវជនទំនើងមួយរូប ក៏មកដល់ ហើយដើរចូលទៅដេញវាយជនម្នាក់នោះ ព្រមទាំងរុញ និងវាយទៅលើសន្តិសុខ ដែលជាមន្ត្រីនគរបាលរូបនោះ ថែមទៀត សកម្មភាពដេញវាយគេឯងនោះ ហាក់ដូចកំរោលចូល ពុំខ្លាចអ្វីនោះទេ ដោយបានទាំងលោតធាក់ និងព្យាយាមដេញវាយសន្តិសុខថែមទៀតផង ។
ក្រោយមក យុវជនទំនើងនោះ ក៏ចេញទៅបាត់ ទើបសន្តិសុខយាមធនាគារ ក៏បានទៅយកកាំភ្លើង ក្នុងកាបូបនៅម៉ូតូ កាន់នៅដៃ និងដកកាំភ្លើងសៀតក្រវ៉ាត់នៅចង្កេះ ។ មួយសន្ទុះ យុវជនទំនើងម្នាក់នោះ ក៏ធ្វើដំណើរមកវិញ ដោយកាន់កូនកាំបិតនៅក្នុងដៃ មករករឿងម្តងទៀត ហើយស្ទុះចូលទៅប្រុងចាក់សន្តិសុខ ដែលជាមន្ត្រីនគរបាល ។ មុននឹងផ្ទុះអាវុធ សន្តិសុខរូបនោះ ដកកាំភ្លើងភ្ជង់គំរាម ប៉ុន្តែយុវជននោះ មិនខ្លាច នៅតែស្ទុះចូល ក៏ត្រូវសន្តិសុខនោះ បាញ់ចំនួន៤គ្រាប់ បណ្តាលអោយត្រូវចំនួន២គ្រាប់ ១គ្រាប់ចំទ្រូងលើដោះស្តាំ និង១គ្រាប់ទៀតចំចង្កេះខាងស្តាំ ដួលស្លា.ប់តែម្តង ។
សន្តិសុខរូបនោះ ពុំបានរត់ទៅណានោះទេ បន្ទាប់មក កម្លាំងនគរបាលខណ្ឌសែនសុខ ចុះទៅកន្លែងកើតហេតុ ព្រមទាំងយកខ្សែមកហ៊ុំព័ន្ធ នៅទីតាំងកើតហេតុផងដែរ ក៏បានឃាត់ខ្លួនសន្តិសុខរូបនោះ បញ្ជូនទៅកាន់អធិការដ្ឋាន ដើម្បីសាកសួរ និងកសាងសំណុំរឿងចាត់ការតាមច្បាប់ ។
ករណីខាងលើនេះ ធ្វើអោយមានមតិរបស់មហាជនជាច្រើន សំណូមពរ និងស្នើឲ្យច្បាប់បន្ធូរបន្ថយដល់ខ្មាន់កាំភ្លើងជាសន្តិសុខធនាគារ ABA ពួកគេលើកឡើងថា ករណីនេះ គ្រាន់តែជាការការពារខ្លួនប៉ុណ្ណោះ ក្នុងនោះ មហាជនក៏ដូចជាអ្នកនិយមលេងនៅលើបណ្ដាញសង្គមហ្វេសប៊ុក មិនបានថ្កោសទោសទៅលើបុរសជាសន្តិសុខនោះទេ បែរជានាំគ្នា រិះគន់ទៅលើទង្វើរបស់បុរសដែលបានកាន់កាំបិតរត់ មកចាក់សន្តិសុខនោះវិញ ទំនងដូចជាអ្នកមានសារធាតុញៀនក្នុងខ្លួន ។
នៅលើហ្វេសប៊ុកនៅកម្ពុជា មានមតិជាច្រើនគាំទ្រ ទង្វើរបស់សន្តិសុខ ហើយលើកឡើងនូវមាត្រា៣៣ នៃក្រមព្រហ្មទណ្ឌ មកបញ្ជាក់ថា ការការពារស្របច្បាប់ បុគ្គលណា ដែលប្រព្រឹត្តបទល្មើស ក្នុងសភាពការពារស្របច្បាប់ មិនទទួលខុសត្រូវព្រហ្មទណ្ឌទេ ។ ការការពារស្របច្បាប់ ត្រូវមានលក្ខណ្ឌដូចខាងក្រោម ៖ បទល្មើសត្រូវចាត់ទុកថា ត្រឹមត្រូវដោយការចាំបាច់ ដើម្បីការពារខ្លួន ការពារអ្នកដទៃ ឬការពារទ្រព្យសម្បត្តិ ប្រឈមមុខនឹងការឈ្លានពានមួយ ដែលមិនត្រឹមត្រូវ ។ បទល្មើស និងការឈ្លានពាន ត្រូវតែកើតឡើងក្នុងពេលជាមួយគ្នា និងគ្មានវិសមាមាត្រ រវាងមធ្យោបាយការពារ ដែលប្រើប្រាស់ និងទម្ងន់នៃការឈ្លានពាន ។
បើតាមប្រភពហ្វេសប៊ុកឈ្មោះ កុលាប ក្រហម បានបង្ហាញប្រវត្តិរូបសង្ខេបរបស់សន្តិសុខធនាគារ ABA ដោយយោងតាមមិត្តភក្តិរបស់សន្តិសុខរូបនេះ អ្នកបកប្រែភាសា បានប្រាប់ថា គាត់ជាមនុស្សស្លូតបូត សុភាពរាបសា មិនសូវនិយាយស្តី ស្រគត់ស្រគំ គាត់គឺជាកូនកំព្រាឱពុក រស់នៅជាមួយម្តាយជាស្ត្រីមេម៉ាយ និងមានបងប្រុសជាមនុស្ស វិកលចរិក ហើយគាត់ជាបង្គោលក្នុងគ្រួសារ ។ គាត់គឺជាសិស្សពូកែ ផ្នែកភាសាបារាំង និងបញ្ចប់ថ្នាក់អនុបណ្ឌិតបរិញ្ញាបត្រជាន់ខ្ពស់ នៃសាកលវិទ្យាល័យភូមិន្ទភ្នំពេញ ។ គាត់បានក្លាយជាអ្នកបកប្រែ អោយស្ថានទូតបារាំងដ៏ឆ្នើមម្នាក់ ពិសេសពាក់ព័ន្ធកិច្ចការទូត ការងារស៊ើបអង្កេត ទាក់ទងជនជាតិ និងភាសាបារាំង ។ ក្រោយមកបានក្លាយទៅជាអ្នកបកប្រែ អោយអគ្គស្នងការស្នងការនគរបាលជាតិ ដោយមើលឃើញពីសមត្ថភាពពិតៗរបស់គាត់ ថ្នាក់លើ ក៏បានបញ្ជូនគាត់ទៅហ្វឹកហ្វឺន ក្លាយជាមន្ត្រីនគរបាលក្របខណ្ឌ ។ ដោយសារតែវិបត្តិកូវីដ-១៩ ទើបធ្វើអោយគាត់ មិនសូវមានការងារផ្នែកបកប្រែភាសា ។ ជីវភាពខ្វះខាតថែមទៀត បានជំរុញអោយគាត់បោះបង់ការងារជាអ្នកបកប្រែភាសាបារាំង ហើយងាកមកធ្វើសន្តិសុខ យាមអោយធនាគា ABA រហូតកើតរឿងបែបនេះ ៕
ចែករំលែកព័តមាននេះ