ខេត្តកំពង់ឆ្នាំង៖ គិតត្រឹមព្រឹកថ្ងៃទី៦ ខែមេសា ឆ្នាំ២០២១ អ្នកដែលបានពាក់ព័ន្ធនឹងអ្នកមានវិជ្ជមានកូវីត១៩ ដែលបានទៅពិនិត្យព្យាបាល នៅគ្លីនិកឯកជនមួយកន្លែង ក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង កាលពីថ្ងៃទី២៩ និងថ្ងៃទី៣០ ខែមីនា បានកើនឡើងរហូត ៦៣នាក់ហើយ។ នេះបើតាមការបញ្ជាក់របស់ប្រធានការិយាល័យបង្ការ និងគ្រប់គ្រងជំងឺឆ្លងនៃមន្ទីរសុខាភិបាលខេត្ត។ អាជ្ញាធរកំពង់ឆ្នាំង ក៏បានចេញវិធានការពង្រឹងការការពារនៃជំងឺឆ្លងដ៏កាចសាហាវមួយនេះដែរ។
លោកវេជ្ជបណ្ឌិត គង់ ចាន់ធា ប្រធានការិយាល័យបង្ការ និងគ្រប់គ្រងជំងឺឆ្លង នៃមន្ទីរសុខាភិបាលខេត្តកំពង់ឆ្នាំង បានឱ្យដឹងថា អ្នកពាក់ព័ន្ធដោយផ្ទាល់ និងប្រយោល ជាមួយឈ្មោះ សោម ឡូ មានទីលំនៅភូមិម៉ុងបារាំង សង្កាត់ប្អេរ ក្រុងកំពង់ឆ្នាំង ដែលបានរកឃើញ មានវិជ្ជមានកូវីដ១៩ កាលពីរសៀលថ្ងៃទី៤ ខែមេសា បានកើនឡើងចំនួន ៦៣ នាក់។ ក្នុងនោះ មាន លោកវេជ្ជបណ្ឌិត ប៉ុល ប៊ូ ម្ចាស់គ្លីនីក ព្យាបាលជំងឺ និងក្រុមគ្រួសារ ឈ្មោះ ពិន ប៉ូ ជាអ្នករត់ម៉ូតូកង់បី ជាអ្នកដឹកអ្នកជំងឺ និងក្រុមគ្រួសារ, ព្រមទាំងប្រជាពលរដ្ឋ ដែលបានមកព្យាបាលជំងឺនៅឃ្លីនិក វិជ្ជបណ្ឌិត ប៉ុល ប៊ូ ភាគច្រើន មកពីស្រុកកំពង់លែងផងដែរ។
លោកវេជ្ជបណ្ឌិត បានបញ្ជាក់ថា អ្នកពាក់ព័ន្ធទាំងអស់ បានយកសំណាក ទៅពិនិត្យអស់ហើយ ប៉ុន្តែលទ្ធផលនៅមិនទាន់ទទួលបាននៅឡើយទេ និងកំពុងតែធ្វើចត្តាឡីស័ក នៅតាមផ្ទះ។ ដោយឡែកលោក វេជ្ជបណ្ឌិត ប៉ុល ប៊ូ លទ្ធផលពិនិត្យសំណាក លើកទី១ គឺអវិជ្ជមាន។
គួររំលឹកថា ឈ្មោះ សោម ឡូ កាលពីថ្ងៃទី២៩ ខែមីនា បានត្រឡប់ពីធ្វើការ នៅរាជធានីភ្នំពេញវិញ ពេលមកដល់ផ្ទះ នៅភូមិម៉ុង បារាំង សង្កាត់ប្អេរ ក្រុងកំពង់ឆ្នាំង មានការៈមិនស្រួលខ្លួន និងបានទៅព្យាលបាល នៅមន្ទីរពេទ្យបង្អែកខេត្តកំពង់ឆ្នាំង និងទៅគ្លីនិក វេជ្ជបណ្ឌិត ប៉ុល ប៊ូ។ ក្រោយមក នៅថ្ងៃទី៤ ខែមេសា ក៏បានឃើញវិជ្ជមាន Covid-19 ទើបមន្ត្រី នៃមន្ទីរសុខាភិបាល ខេត្តកំពង់ឆ្នាំង ខ្នះខ្នែង ក្នុងការស្រាវជ្រាវរកអ្នកពាក់ព័ន្ធ ដើម្បីយកសំណាក និងយកទៅធ្វើចត្តាឡីស័ក។
ពាក់ព័ន្ធនឹងបញ្ហាមានអ្នកវិជ្ជមានកូវីត-១៩ តែងតែមករាលដាល ក្នុងខេត្តកំពង់ឆ្នាំងច្រើនករណីនេះ រដ្ឋបាលសាលាខេត្តកំពង់ឆ្នាំង បានចេញសេចក្តីជូនដំណឹង ដល់អាជ្ញាធរភូមិឃុំ ទាំងអស់ ត្រូវអនុវត្តនូវគោលការណ៍ ១៩ចំណុច ដើម្បីទប់ទល់ការរីករាលដាលនៃកូវីត១៩ ដែលវិធានការសំខាន់ៗ មានដូចជា អាជ្ញាធរភូមិឃុំ ត្រូវក្តាប់ចំនួនសមាជិក ក្នុងគ្រួសារនិមួយៗ ក្នុងដែនដីរបស់ខ្លួនឲ្យបានច្បាស់លាស់ ប្រសិនបើមានសមាជិកគ្រួសារណាម្នាក់ មកដល់ភ្លាម ត្រូវឱ្យគាត់ធ្វើចត្តាឡីស័ក ១៤ថ្ងៃ និងឱ្យមន្ត្រីសុខាភិបាល យកសំណាក ទៅពិនិត្យភ្លាម។ ត្រូវណែនាំដល់បងប្អូនប្រជាពលរដ្ឋ ក្នុងមូលដ្ឋានរបស់ខ្លួនជួយពន្យល់ដល់សមាជិកនៅខាងក្រៅ ដែលចង់មកធ្វើបុណ្យទាន សូមធ្វើបុណ្យនៅវត្ត ដែលខ្លួនរស់នៅសិនទៅ មិនបាច់មកទេ។ ពិធីជួបជុំផឹកស៊ី រាំលេងកំសាន្ត ជប់លៀងខារ៉ាអូខេ ក្លឹបប្រគុំតន្ត្រី ការលេងល្បែងកំសាន្ត ការចល័តការតាំងដាក់លក់ទំនិញ ការលក់គ្រឿងស្រវឹងគ្រប់ប្រភេទ ត្រូវហាមឃាត់ជាដាច់ខាត ទោះក្រោមរូបភាពណាក៏ដោយ៕ ដោយ៖ ពៅ សុខហ៊ាន
ចែករំលែកព័តមាននេះ