ឃើញ​ហើយ​ក្តុកក្តួល​! គ្រួសារ​១​រស់​ក្រោម​ដំបូល​ដាច់​ខ្ទេចខ្ទី​លើ​ដី​ចំណី​ផ្លូវ​រថភ្លើង​(​វី​ដេ​អូ​) – Koh Santepheap Daily

ADផ្ទាំងផ្សព្វផ្សាយពាណិជ្ជកម្ម

Picture

ឃើញ​ហើយ​ក្តុកក្តួល​! គ្រួសារ​១​រស់​ក្រោម​ដំបូល​ដាច់​ខ្ទេចខ្ទី​លើ​ដី​ចំណី​ផ្លូវ​រថភ្លើង​(​វី​ដេ​អូ​)

1 ខែ មុន
  • Banteay Meanchey

ខេត្តបន្ទាយមានជ័យ ៖ គ្រួសារ​មួយ​រស់​ក្រោម​ដំបូល​តង់​ដាច់​រខេករខាក​ប្រៀប​បាន​នឹង​ដំបូល​ប្រក់​មេឃ​ទៅ​ហើយ ហើយ​អះអាង​ថា​ឲ្យ​តែ​រដូវភ្លៀង​មិនសូវ​បាន​ដេក​ពួន​នោះ​ទេ សូ​ម្បី​តែ​សម្លៀក​បំពាក់​ក៏​ត្រូវ​សើម​អស់​ដែរ​។ គ្រួសារ​ក្រីក្រ​មួយ​នេះ រស់នៅ​លើ​ដី​ចំណី​ផ្លូវ​រថភ្លើង ស្ថិត​ក្នុងភូមិ​និង​សង្កាត់​ផ្សារ​កណ្តាល ក្រុង​ប៉ោយ​ប៉ែ​ត និង​រស់​អាស្រ័យ​លើ​ការ​ដើរ​រើស​អេត​ចាយ​លក់​២​នាក់​ប្តី​ប្រពន្ធ…

ខេត្តបន្ទាយមានជ័យ ៖ គ្រួសារ​មួយ​រស់​ក្រោម​ដំបូល​តង់​ដាច់​រខេករខាក​ប្រៀប​បាន​នឹង​ដំបូល​ប្រក់​មេឃ​ទៅ​ហើយ ហើយ​អះអាង​ថា​ឲ្យ​តែ​រដូវភ្លៀង​មិនសូវ​បាន​ដេក​ពួន​នោះ​ទេ សូ​ម្បី​តែ​សម្លៀក​បំពាក់​ក៏​ត្រូវ​សើម​អស់​ដែរ​។

គ្រួសារ​ក្រីក្រ​មួយ​នេះ រស់នៅ​លើ​ដី​ចំណី​ផ្លូវ​រថភ្លើង ស្ថិត​ក្នុងភូមិ​និង​សង្កាត់​ផ្សារ​កណ្តាល ក្រុង​ប៉ោយ​ប៉ែ​ត និង​រស់​អាស្រ័យ​លើ​ការ​ដើរ​រើស​អេត​ចាយ​លក់​២​នាក់​ប្តី​ប្រពន្ធ ដើម្បី​យក​ប្រាក់​មក​ចិញ្ចឹម​កូន​រៀន​។

Picture

គ្រួសារ​ខាងលើ​មាន​ប្តី​ឈ្មោះ ប៊ុ​ន មឿ​ត អាយុ​៤៧​ឆ្នាំ និង​ប្រពន្ធ​ឈ្មោះ រុំ យឿ​ត អាយុ​៤៦​ឆ្នាំ មានកូន​ស្រី​ម្នាក់​ក្នុង​បន្ទុក ខណៈ​កូន​៣​នាក់​ផ្សេង​ទៀត​បែក​គ្រួសារ ដោយ​ខ្លះ​រស់នៅ​ស្រុក​ថៃ ហើយ​ពួក​គេ​សុទ្ធតែ​ក្រីក្រ​មិន​អាច​ជួយ​អ្វី​គាត់​បាន​ឡើយ​។

ស្ត្រី​ខាងលើ​បាន​រៀបរាប់​ថា គាត់​រស់នៅ​ចំណុច​ខាងលើ​រយៈពេល​៣​ឆ្នាំ​មក​ហើយ ហើយ​គ្រួសារ​គាត់​រស់​អាស្រ័យ ដោយ​ប្តី​ប្រពន្ធ​នាំ​គ្នា​រើស​អេ​ត​ចាយ​ដោយ​ថ្មើ​ជើង​តាំងពី​ដើម​រៀង​មក សូ​ម្បី​តែ​ម៉ូតូ ឬ​កង់​ក៏​គ្មាន​ដែរ​។

Picture

ស្ត្រី​រូប​នេះ​ប្រាប់​បន្ត​ថា គាត់​រស់នៅ​ក្នុងភូមិ​ខាងលើ​នេះ​តាំងពី​កុមារភាព​១៩៩២​មក​ម្ល៉េះ ជាមួយ​ឪពុក​ម្តាយ លុះ​ប៉ុន្មាន​ឆ្នាំ​ចុង​ក្រោយ​នេះ ក៏​ចាកចេញ​មក​រស់នៅ​លើ​ដី​ចំណី​ផ្លូវ​រថភ្លើង​។

ស្ត្រី​រូប​នេះ​បន្ត​ថា គ្រួសារ​គាត់​មិន​ដែល​ទទួល​បាន​ប័ណ្ណ​ក្រីក្រ​ពី​អាជ្ញាធរ​ឡើយ ប៉ុន្តែ​ធ្លាប់​ទទួល​បាន​អំណោយ​ម្តងម្កាល​ដែរ​។ ហើយ​គ្រួសារ​គាត់​បាន​បោះ​តង់​រស់នៅ​ចំនួន​២​កន្លែង ដោយ​មួយ​កន្លែង​លើ​កំណល់​រថភ្លើង​របស់​រដ្ឋ​ដែល​គេ​គរ​ទុក​ចោល និង​មួយ​កន្លែង​ទៀត​លើ​ដី​ចំណី​ផ្លូវ​រថភ្លើង ប៉ុន្តែ​ជិត​ៗ​គ្នា​ទេ​។

គ្រួសារ​ខាងលើ​នេះ​បាន​ត្អូញត្អែរ​ថា ពួក​គាត់​មិន​មាន​ដី​សម្រាប់​រស់នៅ​ទេ ហើយ​ក៏​បាន​សូម​អំពាវនាវ​សុំ​សប្បុរសជន​ទាំង​ក្នុង និង​ក្រៅ​ប្រទេស មេត្តា​ជួយ​ដល់​ពួក​គាត់​ផង ព្រោះថា​ពេល​នេះ​ជា​សម័យ​កូ​វី​ដ ពួក​គាត់​ពិតជា​វេទនាណាស់​។

គួរ​បញ្ជាក់​ថា លុះ​នៅ​ពេល​សាកសួរ​ពី​សៀវភៅ​គ្រួសារ ឬ​សៀវភៅ​ស្នាក់​នៅ គ្រួសារ​មួយ​នេះ​ក៏​បាន​និយាយ​ថា មិន​ដែល​បាន​ធ្វើ​ទេ ព្រោះ​គិតតែ​ពី​រក​រើស​អេ​ត​ចាយ ដើម្បី​ចិញ្ចឹម​ក្រុម​គ្រួសារ​តែ​ប៉ុណ្ណោះ​៕

Picture
Picture
Picture