ទីក្រុងព្យុងយ៉ាង ៖ សាធារណរដ្ឋប្រជាមានិតប្រជាធិបតេយ្យកូរ៉េ តាមរយៈក្រសួងកីឡាបានប្រកាសថាប្រទេសខ្លួននឹងមិនចូលរួមក្នុងព្រឹត្តិការណ៍កីឡាអូឡាំពិកទីក្រុងតូក្យូឆ្នាំ ២០២០ ដែលលើកពេលមកប្រារព្ធធ្វើនៅក្នុងឆ្នាំ ២០២១ នេះទេ។ មូលហេតុគឺដើម្បីការពារអត្តពលិករបស់ខ្លួនពីការឆ្លងវីរុសកូវីដ១៩។ នេះបើតាមការចេញពីផ្សាយសារព័ត៌មាន BBC។
សេចក្តីសម្រេចចិត្តចុងក្រោយនេះ បានបញ្ចប់ក្តីសង្ឃឹមរបស់ប្រទេសកូរ៉េខាងត្បូងក្នុងការប្រើប្រាស់ព្រឹត្តិការណ៍នេះ ដើម្បីចូលរួមឱ្យកាន់តែជិតស្និតជាមួយកូរ៉េខាងជើង ចំពេលដែលមានកិច្ចចរចាលើបញ្ហាព្រំដែន ដែលកំពុងជាប់គាំងរវាងភាគីទាំង២។
សូមរំលឹកថាកាលពីឆ្នាំ ២០១៨ កន្លងទៅ ប្រទេសកូរ៉េខាងជើងបានចូលរួមក្នុងព្រឹត្តិការណ៍កីឡាអូឡាំពិករដូវរងាទីក្រុង PyeongChang ដែលប្រទេសកូរ៉ខាងត្បូងទទួលសិទ្ធិធ្វើជាម្ចាស់ផ្ទះ។ ដែលបង្កើតឱ្យមានកិច្ចប្រជុំកំពូលជាប្រវត្តិសាស្ត្រជាបន្តបន្ទាប់រវាងភាគីទាំងសងខាង។
សូមបញ្ជាក់ថាជាមួយសេចក្តីប្រកាសខាងលើនេះ បានធ្វើឱ្យកូរ៉េខាងជើងក្លាយជាប្រទេសធំដំបូងគេ ដែលមិនចូលរួមការប្រកួតនៅក្នុងឆ្នាំនេះ ដោយសារតែការរាតត្បាតនៃវីរុសកូវីដ១៩។ ខណៈដែលព្រឹត្តិការណ៍កីឡាអូឡាំពិកទីក្រុងតូក្យូនឹងចាប់ផ្តើមនាថ្ងៃទី២៣ ខែកក្កដា រហូតដល់ថ្ងៃទី៨ ខែសីហា ឆ្នាំ២០២១ ខាងមុខនេះ៕
ចែករំលែកព័តមាននេះ