ខេត្តពោធិ៍សាត់ ៖ មេបញ្ជាការកងរាជអាវុធហត្ថខេត្តពោធិ៍សាត់ លោកឧត្តមសេនីយ៍ត្រី សូ សុវណ្ណឌី បានទទួលមរណភាពកាលពីវេលាម៉ោង២និង២០នាទីឈានចូលព្រឹកថ្ងៃទី៤ ខែមេសា ឆ្នាំ២០២១ ដោយសារជំងឺគាំងបេះដូង…
ខេត្តពោធិ៍សាត់ ៖ មេបញ្ជាការកងរាជអាវុធហត្ថខេត្តពោធិ៍សាត់ លោកឧត្តមសេនីយ៍ត្រី សូ សុវណ្ណឌី បានទទួលមរណភាពកាលពីវេលាម៉ោង២និង២០នាទីឈានចូលព្រឹកថ្ងៃទី៤ ខែមេសា ឆ្នាំ២០២១ ដោយសារជំងឺគាំងបេះដូង ក្នុងជន្មាយុ៥៩ឆ្នាំ ពេលបញ្ជូនទៅសង្គ្រោះបន្ទាន់នៅមន្ទីរពេទ្យកាល់ម៉ែត រាជធានីភ្នំពេញ។
គួររំលឹកថា លោកឧត្តមសេនីយ៍ត្រី សូ សុវណ្ណឌី ទើបតែប្រកាសចូលកាន់តំណែងជាមេបញ្ជាការកងរាជអាវុធហត្ថខេត្តពោធិ៍សាត់ បានប្រហែលកន្លះឆ្នាំប៉ុណ្ណោះ រហូតមកដល់ថ្ងៃទី៤ ខែមេសា ឆ្នាំ២០២១នេះ ក៏ទទួលមរណភាពដោយសារជំងឺគាំងបេះដូង។
មរណភាពរបស់លោកឧត្តមសេនីយ៍ត្រី សូ សុវណ្ណឌី ពិតជាបាត់បង់នូវថ្នាក់ដឹកនាំដ៍ល្អមួយរូប និងជាធនធានមនុស្សមួយដ៏សំខាន់ ក្នុងជួរកងយោធពលខេមរៈភូមិន្ទ ដែលរូបលោកបានតស៊ូលះបង់នូវអ្វីៗគ្រប់យ៉ាងដើម្បីជាតិមាតុភូមិនិងប្រជាជន។ លោកមានចរិតស្លូតបូត ម៉ឺងម៉ាត់ ច្បាស់លាស់ ទទួលខុសត្រូវនឹងការងារ ដែលធ្វើឲ្យថ្នាក់ដឹកនាំគ្រប់លំដាប់ថ្នាក់ ពិសេសថ្នាក់ដឹកនាំក្រុមការងាររាជរដ្ឋាភិបាលចុះមូលដ្ឋានខេត្តពោធិ៍សាត់ ថ្នាក់ដឹកនាំខេត្ត នាយទាហាន នាយទាហានរង និងពលទាហាន គោរពស្រលាញ់លោកគ្រប់ៗគ្នា។
សូមបញ្ជាក់ថា ស.ពលោកឧត្តមសេនីយ៍ត្រី សូ សុវណ្ណឌី បានតម្កល់ធ្វើបុណ្យតាមប្រពៃណីនៅគេហដ្ឋាននៃស.ព ដែលស្ថិតនៅខាងកើតសាលាទួលស្វាយព្រៃ សង្កាត់ទួលស្វាយព្រៃ ខណ្ឌចំការមន រាជធានីភ្នំពេញ ។ ដំណឹងនេះចាត់ទុកជាការគោរពអញ្ជើញដល់សាច់ញាតិមិត្តជិតឆ្ងាយចូលរួមក្នុងពិធីបុណ្យផងដែរ ៕
ចែករំលែកព័តមាននេះ