ស្វីស ៖ អគ្គនាយកអង្គការពាណិជ្ជកម្មពិភពលោក (WTO) ថ្មីលោកស្រី Ngozi Okonjo-Iweala បាននិយាយថាក្រុមហ៊ុនផលិតវ៉ាក់សាំងកូវីដ១៩ គួរតែមានគ្រប់គ្រាន់សម្រាប់មនុស្សគ្រប់គ្នានៅលើពិភពលោក ឬស្ម័គ្រចិត្តផ្តល់បច្ចេកវិទ្យារបស់ពួកគេដល់ប្រទេសដែលកំពុងអភិវឌ្ឍន៍។
លោកស្រីបាននិយាយថា វាមិនអាចទទួលយកបានទេ ក្នុងការដាក់ប្រទេសក្រីក្រនៅចុងបញ្ចប់នៃជួរសម្រាប់ទទួលបានការចាក់វ៉ាក់សាំង។ ហើយលោកស្រីក៏បានចង្អុលបង្ហាញពីកិច្ចព្រមព្រៀងរបស់ក្រុមហ៊ុន AstraZeneca របស់ចក្រភពអង់គ្លេស ក្នុងការផ្ទេរបច្ចេកវិទ្យារបស់ខ្លួនទៅឱ្យក្រុមហ៊ុនផលិតវ៉ាក់សាំងដ៏ធំមួយរបស់ប្រទេសឥណ្ឌា។
លោកស្រីបានមានប្រសាសន៍ថា ការផ្តល់អាជ្ញាប័ណ្ណផលិតវ៉ាក់សាំងដោយស្ម័គ្រចិត្តអាចជួយសង្គ្រោះជីវិតមនុស្សជាច្រើនផ្សេងទៀតនៅលើពិភពលោក។ ខណៈដែលនៅក្នុងប្រទេសកំពុងអភិវឌ្ឍន៍ខ្លះ នៅមិនទាន់បានប្រើប្រាស់វ៉ាក់សាំងភ្លាមៗនៅឡើយទេ។ លោកស្រីចង់ឱ្យមានការរៀបចំដូចគ្នាទៅនឹងក្រុមហ៊ុន AstraZeneca ដែលបានសហការជាមួយវិទ្យាស្ថាន Serum របស់ប្រទេសឥណ្ឌា។
ការលើកឡើងរបស់លោកស្រី Ngozi Okonjo-Iweala អាយុ៦៦ឆ្នាំដែលជាស្ត្រីទី១ និងជាជនជាតិអាហ្វ្រិកដំបូងបំផុត ដែលក្លាយជាអគ្គនាយកអង្គការពាណិជ្ជកម្មពិភពលោក (WTO) កាលពីដើមខែមីនា គឺចង់សំដៅជារួមដល់ក្រុមហ៊ុនផលិតវ៉ាក់សាំងផ្សេងទៀតនៅលើពិភពលោកគួរតែយកគំរូតាមក្រុមហ៊ុន AstraZeneca ក្នុងការផ្តល់អាជ្ញាប័ណ្ណផលិតវ៉ាក់សាំង៕ (ដកស្រង់ចេញពី BBC)
ចែករំលែកព័តមាននេះ