ខេត្តកំពង់ឆ្នាំង ៖ ពស់ថ្លាន់តូចធំចំនួន៦៣ក្បាល ត្រូវបានសមត្ថកិច្ចចម្រុះមានមន្ត្រីឧទ្យានុរក្សរដ្ឋបាលព្រៃឈើ ក្រុមអន្តរាគមន៍ មន្ត្រីបរិស្ថាន និងកងរាជអាវុធហត្ថ យកទៅព្រលែងនៅតំបន់បឹងអភិរក្សធម្មជាតិ ស្ថិតក្នុងឃុំផ្លូវទូក ស្រុកកំពង់លែង…
ខេត្តកំពង់ឆ្នាំង ៖ ពស់ថ្លាន់តូចធំចំនួន៦៣ក្បាល ត្រូវបានសមត្ថកិច្ចចម្រុះមានមន្ត្រីឧទ្យានុរក្សរដ្ឋបាលព្រៃឈើ ក្រុមអន្តរាគមន៍ មន្ត្រីបរិស្ថាន និងកងរាជអាវុធហត្ថ យកទៅព្រលែងនៅតំបន់បឹងអភិរក្សធម្មជាតិ ស្ថិតក្នុងឃុំផ្លូវទូក ស្រុកកំពង់លែង ក្នុងគោលបំណងថែរក្សាសត្វព្រៃទាំងនោះឲ្យគង់វង្សឡើងវិញ ធ្វើឡើងកាលពីរសៀលថ្ងៃទី០២ មេសា ។
មន្ត្រីនៃមន្ទីរបរិស្ថានខេត្តកំពង់ឆ្នាំង ប្រចាំស្នាក់ការឃុំឆ្នុកទ្រូ បានឲ្យដឹងថា សត្វពស់ថ្លាន់ទាំងនេះត្រូវបានសមត្ថកិច្ចចម្រុះចាប់ដកហូតពីឈ្មួញក្នុងរយៈកាលកន្លងមក ហើយក៏មានប្រជាពលរដ្ឋចាប់បានភ្ញាក់រលឹកយកមកប្រគល់ជូន និងត្រូវបានបានរក្សាទុក ក្នុងរយៈពេលបី.បួនថ្ងៃមកហើយ ព្រមទាំងមានការចាប់ យកពីរបទល្មើស ជាបន្តបន្ទាប់ទៀត សរុបចំនួន៦៣ក្បាល ទើបថ្ងៃនេះសមត្ថកិច្ចចម្រុះយកមកលេងនៅតំបន់បឹងអភិរក្ស ដែលជាតំបន់ព្រៃលិចទឹកស្ថិតនៅក្នុងភូមិសាស្ត្រ អតីតឡូត៏នេសាទលេខ 1 ក្នុងភូមិផ្លូវទូកឃុំផ្លូវទូកស្រុកកំពង់លែង ។
មន្ត្រីបរិស្ថានរូបនោះបានបញ្ជាក់ឲ្យដឹងទៀត ថា ក្នុងរយៈកាលកន្លងមក សមត្ថកិច្ចចម្រុះតែងតែយកសត្វព្រៃមានដូចជាពស់ថ្លាន់អណ្ដើក កន្ធាយ សត្វស្លាប ដែលចាប់បានពីក្រុមឈ្មួញទុច្ចរិតយកមកលេងនៅតំបន់អភិរក្សឡូត៍លេខមួយក្នុងឃុំផ្លូវទូកនេះជា ញឹកញាប់ ក្នុងគោលបំណងថែរក្សាការពារពូជសត្វព្រៃ ដូចជាសត្វល្មូនសត្វស្លាប ទាំងនេះឲ្យគង់វង្សបានយូរអង្វែងតទៅ ព្រោះថាតំបន់នេះមានការអភិរក្សនិងការពារបានល្អប្រសើរ ៕ ដោយ៖ ពៅ សុខហ៊ាន
ចែករំលែកព័តមាននេះ