ខេត្តកំពង់ឆ្នាំង ៖ «យីអ៊ុនដាក់ អារ័ក្សជាន់ទៀត» នេះជាពាក្យដែលចាស់ៗបាននិយាយតៗគ្នា នៅពេលនរណាម្នាក់ ឬគ្រួសារណាមួយជួបគ្រោះស្ទួនលើគ្រោះ ។ យ៉ាងណាមិញ គ្រួសារក្រីក្រមួយដែលមានតែស្រីៗ៣នាក់ ក្នុងនោះ ជីដូនចាស់ជរា ម្តាយជាស្ត្រីមេម៉ាយ និងកូនស្រីអាយុ១៧ឆ្នាំ ដោយសារតែជីវភាពក្រីក្រធ្វើឱ្យនាងគ្មានលទ្ឋភាពបន្តការសិក្សា និងបានទៅប្រឡងសញ្ញាបត្រមធ្យមសិក្សាទុតិយភូមិនឹងគេ ក្នុងពេលថ្មីៗកន្លងមកនេះ បើទោះបីជាពិន្ទុរៀនថ្នាក់ទី១២ បានល្អបង្គួរក្តី ហើយអ្វីដែលជាគ្រោះអកុសលនោះ កូនផ្ទះស្លឹកដ៏តូចមួយនេះត្រូវព្រះអគ្គីបំផ្លាញអស់ជញ្ជាំង និងដំបូលទៀត កាលពីវេលាទៀបភ្លឺថ្ងៃទី២១ កញ្ញា ២០១៥ ខណៈជីដូនជរាងងឹតភ្នែកដុតចង្កៀងសូត្រធម៌ថ្វាយបង្ខំព្រះពេលព្រលឹមស្រាងៗនោះ ។ គ្រួសារដ៏កម្សត់ខាងលើ មានទីលំនៅភូមិស្នោ ឃុំខុនរ៉ង ស្រុកបរិបូរណ៏ ។
លោក លន់ គង់ មេភូមិស្នោ ដែលបានជួយឧបត្ថម្ភប្រាក់ចំនួន១០ម៉ឺនរៀល ដល់គ្រួសាររងគ្រោះដោយភ្លើងឆេះផ្ទះខាងលើនេះ បានឱ្យដឹងថា គ្រួសារនេះមានគ្នា៣នាក់ មាន ជីដូន ឈ្មោះ ជូ អៀន អាយុ៧៦ឆ្នាំ កូនស្រីឈ្មោះ តេង ស៊ីនួន អាយុ៤៦ឆ្នាំ និងចៅស្រីដែលជាកូនស្ត្រី តេង ស៊ីនួន ឈ្មោះ ប៉ិច ស្រីណា អាយុ១៧ឆ្នាំ រៀនថ្នាក់ទី១២ នៃវិទ្យាល័យបរិបូរណ៏ជើង តែនាងមិនបានទៅប្រឡងបាក់ឌុបឆ្នាំ២០១៥ កាលពីពេលថ្មីៗនេះទេ ដោយសារតែជីវភាពក្រីក្រខ្លាំងពេក ។
លោកមេភូមិ បានបន្តថា សព្វថ្ងៃ បានស្ត្រីឈ្មោះ តេង ស៊ីនួន ដែលជាស្ត្រីមេម៉ាយ ដើរស៊ីឈ្នួលដកស្ទួងឱ្យគេ បានប្រាក់ចិញ្ចឹមម្តាយ និងកូនឱ្យរៀនសូត្រ តែពេលខ្លះក៏ដាច់បាយម្តងៗដែរ គាត់បានឱ្យអង្ករខ្លះៗយកទៅដាំបាយហូបដើម្បីរស់មួយពេលៗទៅ ។ ចំណែកឯលំនៅឋានដែលត្រូវភ្លើងឆេះអស់ជញ្ជាំង និងដំបូលនោះមានទំហំ៤ម៉ែត្រគុណ៥ម៉ែត្រ ធ្វើពីឈើប្រក់និងបាំងជញ្ជាំងស្លឹកក្រាលរនាបឫស្សី ។
មូលហេតុដែលបង្កឱ្យមានអគ្គិភ័យកើតឡើងនេះ ដោយសារតែជីដូនចាស់ងងឹតភ្នែកងើបដុតភ្លើងចង្កៀងសូត្រធម៌ថ្វាយបង្គំព្រះ ប៉ះចំចង្កៀងដួលកំពប់ប្រេងទើបបណ្តាលឱ្យឆេះតែម្តង ហើយបានអ្នកស្រុកនាំគ្នាទៅជួយពន្លត់ទាន់ពេល ។
លោកមេភូមិដែលយកចិត្តទុកដាក់ខាងលើ បានបញ្ជាក់ថា កេ្មងស្រី ប៉ិច ស្រីណា រៀនបានពិន្ទុល្អគ្រាន់បើ លោកគ្រូ អ្នកគ្រូ តែងតែសរសើរប្រាប់គាត់ជានិច្ច ប្រការដែលគួរឱ្យសោកស្តាយនោះ មិនដឹងថាយ៉ាងម៉េចនាងមិនបានទៅប្រឡង ហើយគាត់ទើបតែដឹងពេលនេះទេ ។
យុវតី ប៉ិច ស្រីណា បានរៀបរាប់ទាំងក្តីក្តុកក្តួរក្នុងចិត្តថា នាងចង់រៀនបន្ត នាងមានការសោកស្តាយខ្លាំងណាស់ដោយមិនបានទៅប្រឡងសញ្ញាបត្រមធ្យមសិក្សាទុតិយភូមិឆ្នាំ២០១៥ នឹងគេ ដោយសារតែជីវភាពក្រុមគ្រួសារបានព្រឹកខ្វះលា្ងច បានល្ងាចខ្វះព្រឹក ទើបបង្ខំចិត្តឱ្យនាងបញ្ឈប់ការសិក្សាទាំងក្តីសោកស្តាយបំផុត នាងសូមអំពាវនាវដល់សប្បុរសជនទាំងអស់ ពិសេស ឯកឧត្តម លោកជំទាវ សូមមេត្តាជួយដល់ក្រុមគ្រួសារនាងផង ហើយបើអាច សូមជួយឱ្យរូបនាងបានបន្តការសិក្សា ឬអាចជួយរកការងារណាមួយឱ្យធ្វើតាមលទ្ឋភាពរបស់នាង ដើម្បីបានប្រាក់ជួយចិញ្ចឹមជីដូនចាស់ជរាងងឹតភ្នែក និងម្តាយជាស្ត្រីមេម៉ាយនេះផង ៕
ចែករំលែកព័តមាននេះ