រាជធានីភ្នំពេញ ៖ ការរាលដាលនៃ ជំងឺកូវីដ១៩នៅក្នុងប្រទេសកម្ពុជាកាន់តែមានទ្រង់ទ្រាយធំទៅៗ និងបានរកឃើញអ្នកឆ្លងថ្មីៗកាន់តែច្រើន ដែលជាព្រួយបារម្ភ ហើយវិបត្តិនៃជំងឺនេះដែរ វាបានធ្វើឱ្យប៉ះពាល់ដល់ប្រាក់ចំណូលរបស់ប្រជាពលរដ្ឋជាច្រើន និងជួបហានិភ័យកាន់តែខ្លាំងទៅលើហិរញ្ញវត្ថុទាំងសម្រាប់ផ្គត់ផ្គង់គ្រួសារផង និងសម្រាប់បង់សងទៅធនាគារផង ។ចុះបើសិនជាអ្នកជំពាក់ធនាគារហើយចៃដន្យក៏បានឆ្លងជំងឺកូវីដ១៩នេះ តើនឹងទទួលបានការអនុគ្រោះយ៉ាងណាពីធនាគារឬមីក្រូហិរញ្ញវត្ថុដែលខ្លួនជំពាក់នោះ ?
បើតាមលោកបណ្ឌិតអ៊ិន ចាន់នីប្រធានសមាគមធនាគារនិងជាប្រធាននាយកប្រតិបត្តិធនាគារអេស៊ីលីដា ភីអិលស៊ី បានឱ្យដឹងថាមិនថាអតិថិជនដែឆ្លងកូវីដ១៩ ឬអតិថិជនផ្សេងទៀតទេ ឱ្យតែប៉ះពាល់ពីវិបត្តិកូវីដ១៩នេះ នឹងទទួលបានការអនុគ្រោះស្មើៗគ្នា ពីព្រោះក្នុងដំណាក់កាលនេះ អតិថិជនជាច្រើនបានបាត់បង់ប្រាក់ចំណូល ប៉ះពាល់លើអាជីវកម្មរបស់ខ្លួន ។
លោកបន្តថា តាសេចក្តីណែនាំរបស់ធនាគារជាតិនៃកម្ពុជាបានណែនាំឱ្យគ្រឹះស្ថានធនាគារនិងមីក្រូហិរញ្ញវត្ថុទាំងអស់ត្រូវយោគយល់ដល់អតិថិជន អំឡុងពេលវិបត្តិនៃជំងឺកូវីដ១៩នេះ ដូចជាការរៀបចំ កញ្ចប់ឥណទានឡើងវិញ ពន្យារការសងត្រលប់ប្រាក់ដើមដែលខ្ចី បន្ធូរបន្ថយមួយចំនួន ។ សារាចរណ៍នេះណែនាំ គឺបានចាប់ផ្ដើមឡើងតាំងពីដើមឆ្នាំ ២០២០មកម្ល៉េះ ហើយវានៅតែមានសុពលភាព សម្រាប់អនុវត្តន៍មកដល់ពេលនេះ ។ លោកថា៖« ការរៀបចំឥណទានឡើងវិញចំពោះអតិថិជន គឺមានសារសំខាន់ណាស់ ឧទាហរណ៍ថាពីមុនជួបវិបត្តិគាត់ធ្លាប់១០០០ដុល្លារដល់ពេលគាត់ជួបវិបត្តិ រកស៊ីលែងបាន ហើយប៉ះពាល់ចំណូល យើងនឹងរៀបចំឥណទានឡើងវិញ ដូច្នេះគាត់អាចបង់សងត្រលប់ទៅវិញក្នុងចំនួនមួយតិចទៀតទៅតាមលទ្ធភាព ១០០ដុល្លារឬ២០ ក៏៣០ដុល្លារតាមស្ថានភាពជាក់ស្ដែង » ។
លោកបន្តថា សម្រាប់ការរៀបចំឥណទានឡើងវិញនៅឆ្នាំ២០២១នេះ អាចច្រើនជាងឆ្នាំ២០២០កន្លងទៅ ជាក់ស្ដែងធនាគារអេស៊ីលីដាផ្ទាល់គ្រាន់តែត្រីមាសទី១នេះ អាចច្រើនជាងឆ្នាំ២០២០ទាំងមូលបន្តិចទៅហើ យដែលមានជាង១៥០លានដុល្លារអាមេរិក ។
ស្ថានភាពវិបត្តិកូវីដ១៩នៅក្នុងប្រទេសកម្ពុជាក្នុងឆ្នាំ ២០២១នេះ កាន់តែមានភាពអាក្រក់ឡើង ដោយចំនួនអ្នកឆ្លងកូវីដ១៩បានហក់ឡើងដល់២៤៧៧នាក់ក្នុងនោះរាប់ចាប់តាំងពីថ្ងៃទី២០ កុម្ភៈ ២០២១ ដែលជាព្រឹត្តិការណ៍ឆ្លងសហគមន៍លើទី៣ មានចំនួន១៩៤៩នាក់ ក្នុងនោះក៏មានអ្នកស្លាប់ចំនួន១៤នាក់ហើយផងដែរ ៕
ចែករំលែកព័តមាននេះ