រាជធានីភ្នំពេញ ៖ នៅលើសង្វៀនស៊ីអិនស៊ីថ្ងៃសៅរ៍ ទី២៧ មីនា ចុងសប្ដាហ៍នេះ ការប្រកួតប្រដាល់ដណ្ដើមប្រាក់លាននៅតែត្រូវធ្វើឡើងបើទោះជាមានការរីករាលដាលជំងឺកូវីដ-១៩ចូលក្នុងសហគមន៍គួរឱ្យបារម្ភក្ដី ។ ប្រឈមមុខនឹងបញ្ហានេះ ស្ថាប័នទូរទស្សន៍មួយនេះក៏មានការប្រយ័ត្នប្រយែងខ្លាំងណាស់ដែរ ដោយរក្សាបានវិធានការសុវត្ថិភាពដែលដាក់ចេញដោយក្រសួងសុខាភិបាលគឺការប្រកួតបិទទ្វារដោយគ្មានអ្នកទស្សនាផ្ទាល់ ។ មិនតែប៉ុណ្ណោះដើម្បីឱ្យកម្មវិធីប្រដាល់របស់ខ្លួនទទួលការទាក់ទាញពីសំណាក់អ្នកទស្សនាតាមកញ្ចក់ទូរទស្សន៍នោះ សុីអិនសុីបានជ្រើសរើសសុទ្ធតែតែជាកីឡាករជើងខ្លាំងនិងជាគូសងសឹកទៀតផងឱ្យឡើងសង្វៀនប្រកួតដណ្ដើមប្រាក់លាន។
ជាក់ស្ដែងនៅថ្ងៃសៅរ៍សប្ដាហ៍នេះសុីអិនសុីបានជ្រើសរើសសមាសភាពកីឡាករ៤រូបដែលមានប្រវត្តិប៉ះគ្នានាពេលកន្លងមកដូចជាកីឡាករខេម ចាន់ មកពីក្លិបប្រដាល់បញ្ជាការដ្ឋានទ័ពពិសេស ត្រូវប៉ះជាមួយកីឡាករអេ ណារ័ត្ន មកពីក្លិបអេភូថងកីឡា និងកីឡាករ លន បញ្ញាមកពីសមាគមកីឡាប្រដាល់កងយោធពលខេរភូមិន្ទ ប៉ះជាមួយកីឡាករ សួន ចាន់នីមកពីក្លិបបក្សីស្លាបដែក។
រវាងខេម ចាន់ និងអេ ណារ័ត្ន ធ្លាប់ប៉ះគ្នារួចម្ដងមកហើយកាលពីចុងឆ្នាំ២០២០ក្នុងការប្រកួតដណ្ដើមជើងឯកខ្សែក្រវាត់កម្ពុជាសង្វៀនគុនខ្មែរ ដែលកាលណោះខេម ចាន់ បានចាញ់ពិន្ទុអេ ណារ័ត្ន ទាំងមិនអស់ចិត្ត ។ លើកនេះគេបានណាត់ជួបជាមួយអេ ណារ័ត្នម្ដងទៀតដោយសន្យាថា មិនធ្វើឱ្យអ្នកគាំទ្ររបស់ខ្លួនអស់សង្ឃឹមនោះទេ ។ តាមពិតទៅគូនេះមានថ្វិដៃប្រកួតនៅលើសង្វៀនប្រហាក់ប្រហែលគ្នា ទាំងស្នៀតកណ្ដាប់ដៃនិងស្នៀតជើងសុទ្ធតែអាចប្រើការបានយ៉ាងល្អ ។
ជាក់ស្ដែងការប្រកួតកាលពីលើកមុន ខេម ចាន់ ចាញ់ពិន្ទុទាំងប្រផិតប្រផើយដោយសារតែគេធ្វេសប្រហែសនៅចុងទឹកទី៥បន្តិចប៉ុណ្ណោះ បណ្ដោយឱ្យអេ ណារ័ត្នវាយចូលច្រើនជាង ដែលជាហេតុធ្វើឱ្យគេចាញ់ទាំងមិនអស់ចិត្ត។
រីឯលន បញ្ញា និងសួន ចាន់នីវិញធ្លាប់ប៉ះគ្នាជាច្រើនលើករួចមកហើយដោយមានឈ្នះចាញ់គ្នាទៅវិញទៅមក ។ ទោះបីលន បញ្ញា
ធ្លាប់ឈ្នះសួន ចាន់នីក៏ពិតមែន តែក្នុងការប្រកួតដណ្ដើមប្រាក់លានកន្លងមក កីឡាកររូបនេះតែងតែជួបនូវរឿងខកចិត្តជាច្រើនលើក។
ដូច្នេះនៅក្នុងការប៉ះគ្នាសាជាថ្មីលើកនេះ គេក៏កំពុងតែរង់ចាំមើលថាតើលន បញ្ញាអាចប្រជែងតំណែងជាម្ចាស់ប្រាក់លានជាមួយសួន ចាន់នីបានឬអត់ ៕
ចែករំលែកព័តមាននេះ