រាជធានីភ្នំពេញ ៖ រវាងកីឡាករឃឹម បូរ៉ាមកពីក្លិបរស្មីភូមិគាបខេត្តបន្ទាយមានជ័យ ដែលត្រូវបានគេរៀបចំឱ្យជួបប្រកួតជាមួយកីឡាករសោម វិឆ័យមកពីក្លិបកីឡាប្រដាល់បញ្ជាការដ្ឋានទ័ពពិសេសនៅលើសង្វៀនស៊ីអិនស៊ីថ្ងៃសៅរ៍ ទី២៧ មិនាខាងមុខនេះ គេនៅតែមានការព្រួយបារម្ភយ៉ាងខ្លាំងថាគូប្រកួតរបស់គេគឺជាជើងខ្លាំងមួយរូបដែលពីបាកទប់ទល់បំផុត។
បើតាមតែគេធ្លាប់ដឹងគូនេះធ្លាប់ប៉ះគ្នាចំនួន៣លើករួចមកហើយ ៗគេថែមទាំងបានយកឈ្នះទាំង៣លើកជាប់គ្នាតែម្ដង។នេះជាលើកទី៤ហើយដែលគេទាំងពីរត្រូវបានគណៈកម្មការរៀបចំការប្រកួតធ្វើការផ្គូផ្គងឱ្យជួបប្រកួតគ្នាម្ដងទៀត។ហើយអ្វីដែលសំខាន់នោះគេក៏មានបំណងចង់ឱ្យសោម វិឆ័យមានឱកាសបានជួបប្រកួតសងសឹកផងដែរ។ជាមួយនឹងការប៉ះគ្នាលើកនេះ ឃឹម បូរ៉ាបានឱ្យដឹងថាគេនៅតែគិតថា សោម វិឆ័យ គឺជាដៃគូប្រកួតមួយរូបដែលសមត្ថភាពបច្ចេកទេសប្រកួតនៅលើសង្វៀនល្អបំផុត។
ម្យ៉ាងវិញទៀត បូរ៉ា ទើបតែចាក់វ៉ាក់ការពារជម្ងឺកូវីដ-១៩បានតែប៉ុន្មានថ្ងៃនេះប៉ុណ្ណោះ មិនសូវមានឱកាសក្នុងកាហ្វឹកហាត់ឱ្យបានពេញដៃពេញជើងនោះទេ។កត្តាទាំងនេះហើយដែលជាក្ដីបារម្ភរបស់គេ មិនដឹងថាអាចទប់ទល់ជាមួយវិឆ័យបានឬអត់នោះទេ។បូរ៉ា បានឱ្យដឹងទៀតថា សម្រាប់ការប្រកួតទាំង៣លើកមុនៗទោះបីជាគេធ្លាប់យកឈ្នះមែនតែឈ្នះទាំងវេទនាបំផុត។
ទោះជាយ៉ាងណាក៏ដោយឃឹម បូរ៉ាគេបានតាំងចិត្តរួចហើយ ត្រូវតែប្រឹងប្រែងឱ្យអស់ពីសមត្ថភាព មិនឱ្យអ្នកគាំទ្ររបស់ខ្លួនខកបំណងនោះទេ។តាមតែគេធ្លាប់ដឹង សោម វិឆ័យគឺជាកីឡាករប្រដាល់ជើងចាស់មានឈ្មោះបោះសំឡេង មួយរូបដែលមានបទពិសោធន៍ប្រកួតនៅលើសង្វៀនយូឆ្នាំមកហើយ មានល្បិចប្រយុទ្ធក្រាស់ពេញខ្លួនតែម្ដង។ប៉ុន្តែដោយសាតែគេមានវ័យរាងជ្រេបន្តិចទៅហើយនោះ កម្លាំងសុហ្វរបស់គេក៏រាងចុះខ្សោយបន្តិចទៅហើយដែរ។តែកំមើលស្រាលឱ្យសោះគេគឺជាខ្លាចាស់កំពូលល្បិចមួយរូបដែលមិនងាយស្រួលនឹងផ្ដួលនោះឡើយ។
នៅមានអ្នកប្រដាល់ជើងខ្លាំងចំនួន២គូទៀតដែលត្រូវឡើងមកងបង្ហាញខ្លួនលើសង្វៀននាចុងសប្ដាហ៍នេះ។ហើយក៏ជាគូប្រកួតដែលធ្វើឱ្យអ្នកនិយមតាមដានការប្រកួតមានការចាប់អារម្មណ៍ផងដែរ។កីឡាករសូត្រ ខេវិនមកពីក្លិបបក្សីស្លាបដែកប្រកួតជាមួយកីឡាករសេក គឹមរួនក្លិបពុទ្ធសេរីវង្សពោធិសែនជ័យ ខណៈកីឡាករវ៉ាន់ វឿនអ្នកប្រដាល់ជើងខ្លាំងមកពីក្លិបឃ្លាំងមឿកីឡាប្រកួតជាមួយកីឡាករយ៉ន ពិសីក្លិបសាលវ័ន្តកីឡា៕
ចែករំលែកព័តមាននេះ