រាជធានីភ្នំពេញ ៖ សហព័ន្ធកីឡាបាល់ទាត់កម្ពុជា FFC បានប្រកាសពីកិច្ចសន្យាថ្មីជាមួយលោក Keisuke HONDA អ្នកចាត់ការទូទៅក្រុមជម្រើសជាតិកម្ពុជា(ក្រុមគោព្រៃកម្ពុជា) និងសហការីរបស់ខ្លួនជាផ្លូវការហើយ ដោយអតីតកីឡាករជម្រើសជាតិជប៉ុនខាងលើ…
រាជធានីភ្នំពេញ ៖ សហព័ន្ធកីឡាបាល់ទាត់កម្ពុជា FFC បានប្រកាសពីកិច្ចសន្យាថ្មីជាមួយលោក Keisuke HONDA អ្នកចាត់ការទូទៅក្រុមជម្រើសជាតិកម្ពុជា(ក្រុមគោព្រៃកម្ពុជា) និងសហការីរបស់ខ្លួនជាផ្លូវការហើយ ដោយអតីតកីឡាករជម្រើសជាតិជប៉ុនខាងលើ នឹងបន្ដដឹកនាំក្រុមគោព្រៃកម្ពុជារហូតដល់ SEA Games ឆ្នាំ២០២៣ ។
យោងតាមការប្រកាសលើទំព័រហ្វេសប៊ុកផ្លូវការរបស់សហព័ន្ធកីឡាបាល់ទាត់កម្ពុជា កាលពីព្រឹកថ្ងៃទី២៤ ខែមីនា ម្សិលមិញនេះបានបញ្ជាក់ថា «សហព័ន្ធកីឡាបាល់ទាត់កម្ពុជា និងលោក Keisuke HONDA រួមជាមួយសហការីរបស់គាត់ បានព្រមព្រៀងបន្តកុងត្រាថ្មី ដើម្បីដឹកនាំក្រុមជម្រើសជាតិកម្ពុជា ទាំងឈុតធំ និងអាយុក្រោម២៣ឆ្នាំ ឆ្ពោះទៅស៊ីហ្គេមឆ្នាំ២០២៣ ដែលកម្ពុជានឹងត្រូវធ្វើជាម្ចាស់ផ្ទះ»។
ផ្អែកលើការជូនដំណឹងនេះមានន័យថា លោក HONDA រួមទាំងសហការីដែលមានលោក Filex Dalmas ជាគ្រូបង្វឹក បានបន្ដកុងត្រាជិត៣ឆ្នាំទៀត បន្ថែមលើកុងត្រាចាស់ ដែលផុតកំណត់កាលពីខែសីហា ឆ្នាំ២០២០ ដ្បិតបុរសវ័យ៣៤ឆ្នាំខាងលើបានចុះកុងត្រាជាមួយសហព័ន្ធកីឡាបាល់ទាត់កម្ពុជា ដើម្បីដឹកនាំក្រុមជម្រើសជាតិកម្ពុជាដំបូងកាលពីថ្ងៃទី១២ ខែសីហា ឆ្នាំ២០១៨ បន្ទាប់ពីសហព័ន្ធកីឡាបាល់ទាត់កម្ពុជា បានប្រកាសបន្ដកុងត្រាថ្មីជាមួយលោក និងសហការីរបស់ខ្លួន កាលពីព្រឹកថ្ងៃទី២៤ ខែមីនា ម្សិលមិញនេះ ។
យ៉ាងណាក៏ដោយមានព័ត៌មានដ៏រសើបមួយទៀត គឺកៅអីគ្រូបង្វឹកក្រុមជម្រើសជាតិកម្ពុជា ត្រូវបានផ្លាស់ប្ដូរថ្មីមិនមែនដឹកនាំដោយបុរសសញ្ជាតិអាហ្សង់ទីនលោក Felix Dalmas ទៀតឡើយ។
លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជាបានបញ្ជាក់ថា «លោក Felix អត់មានឈ្មោះបង្ហាត់ដូចមុនទេ ដោយសារមានលក្ខខណ្ឌខ្លះ អត់ត្រូវគ្នា…។ ចឹងមានគ្រូបង្វឹកថ្មីដែលមកបង្ហាត់ហ្នឹង គឺកំពុងធ្វើចត្ដាឡីស័ក ប្រហែលម៉ោង១១ថ្ងៃត្រង់នេះ ទើបក្រសួងសុខាភិបាល គេផ្ដល់ព័ត៌មានមកថា គាត់ចេញបាន ឬមិនបាន ព្រោះគាត់ធ្វើចត្ដាឡីស័កគ្រប់១៤ថ្ងៃហើយថ្ងៃនេះ។ ចឹងគ្រូបង្វឹកថ្មី ដែលតំណាងឲ្យ Honda ក៏ជាជនជាតិជប៉ុនដែរ»។
អគ្គលេខាធិការសហព័ន្ធដដែលបន្ដថា ចំពោះព័ត៌មានផ្លូវការ សហព័ន្ធនឹងធ្វើការប្រកាស បន្ទាប់ពីគ្រូបង្វឹកថ្មីខាងលើបញ្ចប់ការធ្វើចត្ដាឡីស័ក ហើយសហព័ន្ធនឹងជជែកលើការងារជាបន្ដបន្ទាប់ ពិសេសពាក់ព័ន្ធនឹងផែនការជ្រើសរើសកីឡាករជម្រើសជាតិ ដើម្បីហ្វឹកហាត់ត្រៀមការប្រកួតផ្សេងៗ នាពេលខាងមុខ។
គួរឱ្យដឹងដែរថា លោក Felix បានមកដឹកនាំក្រុមគោព្រៃកម្ពុជា ក្នុងនាមដៃស្ដាំរបស់លោក Keisuke Honda ក្រោយចុះកុងត្រា ២ឆ្នាំ ជាមួយសហព័ន្ធកីឡាបាល់ទាត់កម្ពុជាកាលពីខែសីហា ឆ្នាំ២០១៨ ដល់ខែសីហា ឆ្នាំ២០២០។
ក្រោមការដឹកនាំរបស់លោក បានបន្សល់នូវស្នាដៃជាប្រវត្តិសាស្ដ្រមួយជូនកម្ពុជា គឺការជួយក្រុម U22 កម្ពុជា ឡើងវគ្គពាក់កណ្ដាលផ្ដាច់ព្រ័ត្រលើកដំបូងក្នុងការប្រកួតកីឡាស៊ីហ្គេម ឆ្នាំ២០១៩ នៅហ្វីលីពីន ហើយបញ្ចប់ត្រឹមចំណាត់ថ្នាក់លេខ៤ ក្រោយប្រកួតចាញ់ក្រុម U22 មីយ៉ាន់ម៉ា ដោយបាល់១១ម៉ែត្រកាត់សេចក្ដី ៥-៤ ៕
ចែករំលែកព័តមាននេះ