រាជធានីភ្នំពេញ ៖ ពហុកីឡដ្ឋានជាតិមរតកតេជោដែលមានទីតាំងស្ថិតនៅសង្កាត់ព្រែកតាសេក ខណ្ឌជ្រោយចង្វា គ្រោងបញ្ចប់ការសាងសង់ទាំងស្រុងនៅខែឧសភា ឆ្នាំ២០២១។ នេះបើតាមការអះអាងពីលោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាអគ្គលេខាធិការគណៈកម្មាធិការជាតិរៀបចំស៊ីហ្គេមឆ្នាំ២០២៣ ។
លោក វ៉ាត់ ចំរើន បានបញ្ជាក់ថា កៅអីសម្រាប់អង្គុយទស្សនាដែលមានចំនួនជាង៥០.០០០កៅអីនោះ ពេលនេះបំពាក់បានចំនួន១២.០០០កៅអីហើយនៅសល់តែជាង៤០.០០០កៅអីទៀតប៉ុណ្ណោះ ។ ក្នុងមួយថ្ងៃៗសមត្ថភាពក្នុងការបំពាក់កៅអីអាចធ្វើបានចាប់ពី៨០០ទៅជាង៩០០កៅអី ខណៈភាគីចិនបានអះអាងថា ការបំពាក់កៅអីនេះនឹងបញ្ចប់នៅអំឡុងខែមេសា ឆ្នាំនេះ ។ បើតាមការឲ្យដឹងបន្ថែម ស្មៅក្នុងទីលានបាល់ទាត់ក៏បានដាំរួចរាល់អស់ហើយដែរ និងកំពុងចាប់ផ្ដើមដុះដោយមានពណ៌ខៀវនៅតាមកន្លែងខ្លះៗហើយ ។
អ្វីដែលនៅសេសសល់នោះគឺការបំពាក់ទីលានសម្រាប់រត់អត្តពលកម្ម តែការងារនេះក៏នឹងបញ្ចប់ឲ្យបានឆាប់ៗដែរ ។ ពេលនេះភាគីចិនកំពុងតែបង្កើនការតុបតែងដើម្បីបញ្ចប់ឲ្យបានសព្វគ្រប់នាពេលឆាប់ៗនេះ ។ ក្នុងខណៈដែលជំងឺកូវីដ-១៩កំពុងតែបន្តរាតត្បាតនោះ ទាំងវិស្វករចិន និងកម្មករខ្មែរបានអនុវត្តតាមការណែនាំរបស់រាជរដ្ឋាភិបាលគឺមិនអនុញ្ញាតឲ្យចេញទៅខាងក្រៅ ហើយបើចេញទៅខាងក្រៅមិនអនុញ្ញាតឲ្យចូលមកក្នុងការដ្ឋានវិញនោះទេ ។
គួរបញ្ជាក់ថា ពហុកីឡដ្ឋានដ៏ធំមួយនេះកំពុងតែសាងសង់ដោយក្រុមហ៊ុនចិនChina State Canstruction Engineering Corporation លើផ្ទៃដីជាង៩៤ហិកតា ស្ថិតក្នុងសង្កាត់ព្រែកតាសេក ខណ្ឌជ្រោយចង្វា ក្រោមជំនួយឥតសំណងរបស់ចិនចំនួន១៦០លានដុល្លារ ។ ពហុកីឡដ្ឋាននេះបានចាប់ផ្ដើមសាងសង់កាលពីអំឡុងខែមេសា ឆ្នាំ២០១៧ ក្រោយបញ្ចប់ការសាងសង់ពហុកីឡដ្ឋាននេះមានសមត្ថភាពផ្ទុកអ្នកអង្គុយទស្សនាបានចំនួនជាង៦០.០០០នាក់ហើយទីនេះក៏ជាកន្លែងសម្រាប់ការប្រកួត និងប្រារព្ធពិធីបើក និងបិទការប្រកួតកីឡាស៊ីហ្គេមលើកទី៣២ឆ្នាំ៣០២៣ដែលកម្ពុជាធ្វើជាម្ចាស់ផ្ទះផងដែរ ។
នៅទីនោះក៏មានរៀបចំជាភូមិកីឡា ឬបុរីកីឡាដែលជាកន្លែងស្នាក់នៅហូបចុករបស់កីឡាករ កីឡាការិនីក្នុងអំឡុងនៃការប្រកួតកីឡាស៊ីហ្គេមឆ្នាំ២០២៣ទៀតផង ។ គម្រោងនៃការសាងសង់ភូមិកីឡាគឺជាការសហការគ្នាជាមួយក្រុមហ៊ុនឯកជនមួយឈ្មោះថាWorld Bridge Sports Village ដែលជាក្រុមហុ៊នមានបទពិសោធន៍ក្នុងការកសាងអគារខ្ពស់ៗនៅរាជធានីភ្នំពេញ ។ ភូមិកីឡានេះគឺត្រូវមានសោភ័ណភាព និងរចនាបថគោរពតាមនិយាមនៃពហុកីឡដ្ឋានជាតិមរតកតេជោដោយត្រូវសាងសង់លើផ្ទៃដីទំហំប្រមាណ៨ហិកតានៅផ្នែកខាងក្រោយពហុកីឡដ្ឋានមរតកតេជោ ។ភូមិកីឡាគឺជាកន្លែងស្នាក់នៅហូបចុករបស់កីឡាករ កីឡាការិនី ក្នុងអំឡុងស៊ីហ្គេមដែលអាចរក្សាបាននូវសុវត្ថិភាពនិងការគ្រប់គ្រងជាដើម ។ ភូមិកីឡានេះមានអគារស្នាក់នៅ វីឡាមួយចំនួនសម្រាប់មន្ត្រី អាជ្ញាកណ្ដាល ចៅក្រម ដោយមានបន្ទប់ស្នាក់នៅជាង១.៧០០បន្ទប់ ដែលក្នុងនោះបន្ទប់ខ្លះមានគ្រែ១ ដល់គ្រែ៥ដែលមានបំពាក់នូវសម្ភារដើម្បីផ្ដល់នូវផាសុកភាពដល់កីឡាករ កីឡាការិនី ។
ក្នុងភូមិកីឡានេះរៀបចំឲ្យមានសារៈមន្ទីរតាំងវត្ថុអនុស្សាវរីយ៍ទាំងឡាយក្នុងស៊ីហ្គេម និងសម្រាប់ការស្រាវជ្រាវរបស់សិស្ស និស្សិតទាំងឡាយក៏ដូចជាអ្នកជំនាន់ក្រោយដែលចង់ស្រាវជ្រាវពីស៊ីហ្គេម ។ ភូមិកីឡានេះនឹងបញ្ចប់ការសាងសង់នៅឆ្នាំ២០២២ហើយស៊ីហ្គេម
ឆ្នាំ២០២៣នឹងអាចមានអត្តពលិកស្នាក់នៅសរុបចំនួន៧.០០០នាក់ រួមជាមួយមន្ត្រី គ្រូបង្វឹក ប្រតិភូប្រមាណ៣.០០០នាក់ទៀត ។ ស៊ីហ្គេមលើកទី៣២នឹងធ្វើចន្លោះពីថ្ងៃទី៥ដល់១៦ឧសភាឆ្នាំ២០២៣ ៕
ចែករំលែកព័តមាននេះ