ADផ្ទាំងផ្សព្វផ្សាយពាណិជ្ជកម្ម

Picture

ចុះ​រាយ​មង​ក្នុង​​ទឹក​បឹង ស្រាប់តែ​ប្រទះ​ឃើញ​គ្រោងឆ្អឹង​មនុស្ស​ផ្អើល​ឆោឡោ

3 ឆ្នាំ មុន
  • កណ្តាល

ខេត្តកណ្ដាល ៖ បើ​តាម​សេចក្តីរាយការណ៍​បានឱ្យ​ដឹង​ថា មាន​អ្នកស្រុក​ម្នាក់​ដែល​ជា​អ្នក​ប្រកប​មុខរបរ​នេសាទ​ត្រី បាន​ទៅ​រាយ​មង​ក្នុង​បឹង ក៏​ស្រាប់តែ​ប្រទះ​ឃើញ​គ្រោងឆ្អឹង​សាកសព​មនុស្ស​មិន​ស្គាល់​អត្តសញ្ញាណ​ម្នាក់ បង្ក​ឱ្យ​មានការ​ភ្ញាក់ផ្អើល​កាលពី​រសៀល​ថ្ងៃ​ទី​១៦ ខែមីនា ឆ្នាំ​២០២១ នៅ​ចំណុច​ទឹក​បឹង​អន្លង់​យាយ​ម៉ែ​ន…

ខេត្តកណ្ដាល ៖ បើ​តាម​សេចក្តីរាយការណ៍​បានឱ្យ​ដឹង​ថា មាន​អ្នកស្រុក​ម្នាក់​ដែល​ជា​អ្នក​ប្រកប​មុខរបរ​នេសាទ​ត្រី បាន​ទៅ​រាយ​មង​ក្នុង​បឹង ក៏​ស្រាប់តែ​ប្រទះ​ឃើញ​គ្រោងឆ្អឹង​សាកសព​មនុស្ស​មិន​ស្គាល់​អត្តសញ្ញាណ​ម្នាក់ បង្ក​ឱ្យ​មានការ​ភ្ញាក់ផ្អើល​កាលពី​រសៀល​ថ្ងៃ​ទី​១៦ ខែមីនា ឆ្នាំ​២០២១ នៅ​ចំណុច​ទឹក​បឹង​អន្លង់​យាយ​ម៉ែ​ន ស្ថិត​ក្នុងភូមិ​ពុក​ឫស្សី​កណ្តាល ឃុំ​ពុក​ឫស្សី ស្រុក​ខ្សាច់កណ្តាល ខេត្តកណ្តាល ហើយ​ក្រោយមក​ក៏​បាន​ទៅ​រាយការណ៍​ប្រាប់​សមត្ថកិច្ច ដើម្បី​ចុះ​អន្តរាគមន៍​ផង​ដែរ​។

ទាក់ទិន​ករណី​ខាងលើ​នេះ បើ​តាម​បុរស​អ្នកនេសាទ​ត្រី​ឈ្មោះ សេង អឿ​ន អាយុ​៣៤​ឆ្នាំ រស់នៅ​ភូមិ​ពុក​ឫស្សី​កណ្តាល ឃុំ​ពុក​ឫស្សី បាន​រៀបរាប់​ប្រាប់​សមត្ថកិច្ច​ឲ្យ​ដឹង​ថា កាលពី​វេលា​រសៀល​ថ្ងៃ​ទី​១៦ ខែមីនា រូប​គាត់​បាន​ទៅ​រាយ​មង និង​ចង​សន្ទូច​នៅ​ចំណុច​ក្នុង​បឹង​អន្លង់​យាយ​ម៉ែ​ន ដូច​សព្វមួយដង ។

បុរស​អ្នកនេសាទ​រូប​នេះ​បន្ត​ថា ប៉ុន្តែ​ថ្ងៃនេះ គាត់​ក៏​បាន​ប្រទះ​ឃើញ​គ្រោងឆ្អឹង​មនុស្ស​ម្នាក់ ដែល​រលួយ​សាច់​អស់ពី​ខ្លួន​គ្មាន​ខោអាវ ក្នុង​ទឹក​បឹង​ជម្រៅ​ត្រឹម​ចង្កេះ ដែល​មិន​ស្គាល់​អត្តសញ្ញាណ​នោះ​ទេ ។ លុះ​រហូត​ដល់​ថ្ងៃ​ទី​១៧ ខែមីនា រូប​គាត់ (​សេង អឿ​ន​) ក៏​បាន​យក​រឿង​នេះ ទៅ​រាយការណ៍​ជូន​សមត្ថកិច្ច​នគរបាល​ប៉ុស្តិ៍​រដ្ឋបាល​ពុក​ឫស្សី ដើម្បី​ឲ្យ​បានដឹង និង​ស្វែងរក​សាច់ញាតិ​របស់​ជន​រង​គ្រោះ​តែ​ម្តង ។

លុះ​រហូត​ដល់​វេលា​ម៉ោង​៩​ព្រឹក ថ្ងៃ​ទី​១៨ ខែមីនា ឆ្នាំ​២០២១​នេះ សមត្ថកិច្ច​ជំនាញ​នគរបាល​បច្ចេកទេស និង​វិទ្យាសាស្ត្រ​ខេត្តកណ្តាល នាយការិយាល័យ​ព្រហ្មទណ្ឌ​កម្រិត​ធ្ងន់​ខេត្ត ជំនាញ​នគរបាល បាន​ចុះ​ទៅ​សហការ​ជាមួយ​អាជ្ញាធរ​មូលដ្ឋាន​ប៉ុស្តិ៍​រដ្ឋបាល​ពុក​ឫស្សី និង​គ្រូពេទ្យ រួម​ទាំង​ក្រុមប្រឹក្សា​ឃុំ បាន​ធ្វើការ​ពិនិត្យ​ទៅ​លើ​គ្រោងឆ្អឹង​រលួយ​សាច់​អស់​ដែល​ស្ថិត​នៅ​ក្នុង​ទឹក​បឹង​នោះ ។

ប៉ុន្តែ​ដោយសារ​តែ​គ្រោងឆ្អឹង​នៅ​ក្នុង​ទឹក ហើយ​មាន​ភាព​លំបាក​ក្នុង​ការ​ពិនិត្យ និង​ធ្វើ​កោសល្យវិច័យ​ផង​នោះ ទើប​សមត្ថកិច្ច​សម្រេច​ស្រង់​យក​គ្រោងឆ្អឹង​នោះ​មក​ពិនិត្យ​នៅ​លើគោក​វិញ ដោយ​បាន​រៀបចំ​ផ្គុំ​ឆ្អឹង​តាម​រូបរាង​មនុស្ស ។

ជា​លទ្ធផល​របស់​សមត្ថកិច្ច​ក្នុង​ការ​ពិនិត្យ​គ្រោងឆ្អឹង​សាកសព​នេះ គឺ​មាន​កម្ពស់​ប្រហែល​១.៧២​ម៉ែត្រ ហើយ​សាកសព​រលួយ​សាច់​អស់​នៅ​សល់​តែ​គ្រោងឆ្អឹង របេះ​ដាច់​ចេញពី​គ្នា ដែល​ក្នុង​ពេល​នោះ​ក៏​ឃើញ​មាន​អាវ​១​នៅ​ចម្ងាយ​ពី​គ្រោងឆ្អឹង​ប្រមាណ​១៥​ម៉ែត្រ អាវ​នោះ​ដៃ​វែង​ពណ៌​ទឹកសមុទ្រ ឆ្នូត​ពណ៌​ខៀវ ដាច់​ឡេវ​នៅ​សល់​៣ ។

ក្រោយ​ពី​ពេល​ពិនិត្យ​រួច សមត្ថកិច្ច​បាន​ធ្វើការ​សន្និដ្ឋាន​ថា ៖ សាកសព​ជរង​គ្រោះ​មាន​អាយុ​ប្រហែល​ចន្លោះ​ពី​៣០​ឆ្នាំទៅ​៤០​ឆ្នាំ នឹង​អាច​បាត់​បង់ជីវិត​ក្នុង​អំឡុង​ពី​១​ខែ ទៅ​២​ខែ​មុន​ម្ល៉េះ ហើយ​សាកសព​មាន​សភាព​រលួយ​សាច់​អស់​នៅ​សល់​តែ​គ្រោងឆ្អឹង ដូច្នេះ​មិន​អាច​វាយតម្លៃ​បាន​នោះ​ទេ ។

តែ​យ៉ាងណា​ក្តី សមត្ថកិច្ច​នគរបាល​ជំនាញ​ស្រុក​ខេត្ត កំពុង​តែ​បើក​ការ​ស្រាវជ្រាវ​រក​អត្តសញ្ញាណ​ជន​រង​គ្រោះ ហើយនឹង​បាន​ប្រគល់​គ្រោងឆ្អឹង​សព​ជូន​ក្រុមប្រឹក្សា​ឃុំ​ពុក​ឫស្សី ដើម្បី​យក​ទៅ​បញ្ចុះ​នៅ​ទួល​អ្នកតា​មួយ​កន្លែង ទុក​រក​សាច់ញាតិ​ផង​ដែរ ។ ហើយ​សមត្ថកិច្ច​ក៏​បាន​បន្ត​បើក​ការ​ស៊ើប​ស្រាវជ្រាវ​ស្វែងរក​អត្តសញ្ញាណ​ជន​រង​គ្រោះ ដើម្បី​ឈាន​រក​មូលហេតុ​នៃ​ការ​បាត់បង់​អាយុជីវិត​មនុស្ស​ម្នាក់​ដែល​នៅ​សល់​តែ​គ្រោងឆ្អឹង​នោះ​ឲ្យ​បានដឹង​ច្បាស់លាស់​ផង​ដែរ ៕

អត្ថបទសរសេរ ដោយ

កែសម្រួលដោយ