រាជធានីភ្នំពេញ ៖ តារាចម្រៀងនាង អ៊ីវ៉ា បានសម្តែងការហួសចិត្តយ៉ាងខ្លាំង ក្នុងពេលដែលនាងបានឃើញមានជនអនាមិកម្នាក់ បង្កើតប្រព័ន្ធបណ្តាញសង្គមក្លែងក្លាយដោយយកឈ្មោះរបស់នាង ដើម្បីជាការគៀងគររកជំនួយជួយជនភៀសសឹក ក្នុងរូបភាពក្លែងបន្លំមហាជន ។…
រាជធានីភ្នំពេញ ៖ តារាចម្រៀងនាង អ៊ីវ៉ា បានសម្តែងការហួសចិត្តយ៉ាងខ្លាំង ក្នុងពេលដែលនាងបានឃើញមានជនអនាមិកម្នាក់ បង្កើតប្រព័ន្ធបណ្តាញសង្គមក្លែងក្លាយដោយយកឈ្មោះរបស់នាង ដើម្បីជាការគៀងគររកជំនួយជួយជនភៀសសឹក ក្នុងរូបភាពក្លែងបន្លំមហាជន ។
យ៉ាងណា តារាចម្រៀងស្រីរូបនេះ បានស្នើដល់មហាជនកុំឲ្យមានការយល់ច្រឡំ និងចាញ់បោកគណនេយ្យបណ្តាញសង្គមក្លែងក្លាយដែលដាក់ឈ្មោះនាងនេះ ដ្បិតក្រុមការងារនាងមិនមានការទាក់ទង Telegram ឬ អោយវេរលុយអ្វីៗផ្សេងនោះឡើយ ។
តាមរយៈសំណេរបង្ហោះលើបណ្តាញសង្គមតារាចម្រៀងនាង អ៊ីវ៉ា បានអះអាងថា ខ្ញុំឆ្ងល់អើយឆ្ងល់ តើជនដែលព្យាយាមក្លែងបន្លំ បោកប្រាស់ទាំងអស់នេះ ពួកគាត់មានឈាមជាខ្មែរ មានបេះដូងបរិសុទ្ធជាខ្មែរដែលអត់ណ៎…? ។
នាងបន្តថា ប្រទេសជាតិយើងកំពុងជួបបញ្ហា ត្រូវបានចោរជាប់ផ្ទះឈ្លានពានហើយ ឥឡូវត្រូវចោរគ្នាឯងឆ្លៀត បន្លំបោកប្រាស់ ដើម្បីយកថវិកាជំនួយពីពុកម៉ែបងប្អូនសប្បុរសជនទៀត ហ៊ឺអត់ដឹងត្រូវនិយាយបែបមិចទើបសមទេ ។ 🥺😰🙏
📌នាងបញ្ជាក់ថា ប្រសិនមានជនណា ខល ឬ Chat តាម Telegram ដែលមានឈ្មោះ ឬ ប្រហាក់ប្រហែល ខាងក្រោយទាក់ទងទៅ សុំអោយវេរលុយជំនួយ ឬ លុយអ្វីផ្សេងៗ នោះសូមកុំចាញ់បោកអោយសោះ ព្រោះក្រុមការងារយើងខ្ញុំមិនមានការទាក់ទង Telegram ឬ អោយវេលុយអ្វីៗផ្សេងនោះទេណា ។
គួរបញ្ជាក់ថា តារាចម្រៀងនាង អ៊ីវ៉ាគឺជាអ្នកសិល្បៈមួយរូបក៏ដូចជាអ្នកសិល្បៈជាច្រើនទៀតបានចូលរួមយ៉ាងសស្រាក់ស្រស្រាំនៅក្នុងចូលរួមបង្កើតជាមូលនិធិស្វែងរកថវិកាពីសប្បុរសជននានា ដើម្បីជួយដល់ជនភៀសសឹកដែលបានគេចពីការវាយប្រហារពីការឈ្លានពានរបស់ប្រទេស
ថៃ ។
មូលនិធិរបស់តារាស្រីរូបនេះ ក៏បានទទួលការគាំទ្រ និងមានសប្បុរសជាច្រើនបានចូលរួមជាមួយរូបនាង ខណៈពេលដែលជំនួយរបស់នាងក៏ត្រូវបានធ្វើការបែងចែក និងចែកចាយទៅដល់ដៃជនភៀសសឹកនៅតំបន់មួយចំនួនជាបន្តបន្ទាប់ផងដែរ ។
នៅក្នុងអំឡុងពេលចុះចែកអំណោយជូនភៀសសឹកនៅក្នុងទីតាំងមួយតារាចម្រៀង អ៊ីវ៉ា បានលើកឡើងតាមរយៈបទសម្ភាសន៍ជាមួយស្ថានីយទូរទស្សន៍ក្នុងស្រុកមួយថា ក្នុងពេលដែលនាងបានមកដល់ទីតាំងជនភៀសសឹកផ្ទាល់នាងមានអារម្មណ៍ស្រណោះស្រណោកខ្លាំង ដោយពួកគាត់ទាំងអស់ធ្លាប់ស្នាក់នៅក្នុងផ្ទះយ៉ាងកក់ក្តៅ បែជាត្រូវមកស្នាក់ក្នុងរួមគ្នាបែបនេះ ។
នាងថា ក្នុងពេលដែលកងទ័ពសៀមបាញ់ប្រហារដោយការឈ្លានពានមកលើប្រទេសកម្ពុជាយើង ពួកគាត់ទាំងអស់បានរត់ភៀសខ្លួន ដោយអ្នកខ្លះមកតែខ្លួនប៉ុណ្ណោះ ហើយនាងមកឃើញទុកលំបាករបស់ពួកគាត់ នាងពិតជាពិបាកទទួលយកមែនទែន ។
នាងបញ្ជាក់ថា កន្លងមកនាងបាននាំយកអំណោយមកជូនបងប្អូនភៀសសឹកនៅក្នុងខេត្តព្រះវិហារ ហើយពេលនេះនាងបានយកមកដល់ខេត្តបន្ទាយមានជ័យខ្លះ និងខេត្តសៀមរាបខ្លះ ខណះពេលដែលអំណោយដែលនាងជួយនេះ គឺធ្វើតាមលទ្ធភាពដែលខ្លួនមាន ។
យ៉ាងណា បើតាមតារាចម្រៀងនាង អ៊ីវ៉ា ស្ថិតក្នុងស្ថានភាពនេះនាងសូមអំពាវនាវដល់ប្រជាពលរដ្ឋគ្រប់ទិសទីត្រូវមានការរួបរួមគ្នា ហើយជួយគ្នាទៅតាមលទ្ធភាពដែលខ្លួនមានក្នុងនាមជាអ្នកជួរក្រោយ ក្នុងពេលដែលកងទ័ពជួរមុខកំពុងឈរការពារទឹកដីកម្ពុជាយ៉ាងមុះមុត ៕
ចែករំលែកព័តមាននេះ