សង្គ្រាមអ៊ុយក្រែន ៖ ប្រធានាធិបតីអាមេរិកលោកដូណាល់ត្រាំថ្លែង កាលពីថ្ងៃទី១៥ ធ្នូ ថា កិច្ចព្រមព្រៀងមួយស្ដីពីអ៊ុយក្រែន ហាក់កាន់តែជិតឈានទៅសម្រេចហើយ បន្ទាប់ពីលោកពិភាក្សាជាមួយប្រធានាធិបតីអ៊ុយក្រែនលោកវ៉ូឡូឌីមៀរហ្សេឡេនស្គី និងមេដឹកនាំអឺរ៉ុបច្រើនរូបទៀត…
សង្គ្រាមអ៊ុយក្រែន ៖ ប្រធានាធិបតីអាមេរិកលោកដូណាល់ត្រាំថ្លែង កាលពីថ្ងៃទី១៥ ធ្នូ ថា កិច្ចព្រមព្រៀងមួយស្ដីពីអ៊ុយក្រែន ហាក់កាន់តែជិតឈានទៅសម្រេចហើយ បន្ទាប់ពីលោកពិភាក្សាជាមួយប្រធានាធិបតីអ៊ុយក្រែនលោកវ៉ូឡូឌីមៀរហ្សេឡេនស្គី និងមេដឹកនាំអឺរ៉ុបច្រើនរូបទៀត ប៉ុន្តែអនុរដ្ឋមន្ត្រីការបរទេសរុស្ស៊ីលោកស័រហ្គេយរីយ៉ាបកូវថ្លែងនាថ្ងៃទី១៦ធ្នូថា រុស្ស៊ីនឹងមិនទទួលយកការសម្របសម្រួលណាមួយ ទាក់ទិននឹងបណ្ដាដែនដីអ៊ុយក្រែនកាន់កាប់ឡើយ។
អនុរដ្ឋមន្ត្រីរូបនោះបន្តថា ក្រុងមូស្គូចង់រក្សាការត្រួតត្រាតំបន់៥របស់អ៊ុយក្រែនគឺ តំបន់គ្រីមេ ដូណេតស្ក៍ លូហ្គានស្ក៍ ហ្សាប៉ូរីហ្ស៊ីយ៉ានិងឃ័រសុន។ មុននេះលោកត្រាំថ្លែងថា យើងពិតជាខិតទៅក្បែរពុំធ្លាប់មាន កិច្ចព្រមព្រៀងមួយដែលបញ្ចប់សង្គ្រាមជាមួយរុស្ស៊ី។
រីឯប្រធានាធិបតីអ៊ុយក្រែនលោកហ្សេឡេនស្គីវិញបានសរសើរ ដល់ការរីកចម្រើនលើការធានាសន្តិសុខរបស់អាមេរិកសម្រាប់ប្រទេសលោក។ លោកបន្តថានៅមានបញ្ហាស្មុគ្រស្មាញបំផុតនានា ពិសេសបញ្ហាទាក់ទិននឹងដែនដី។ និយាយដោយត្រង់ទៅយើងនៅមានបញ្ហាខ្វែងគំនិតគ្នានានា ជាមួយសហរដ្ឋអាមេរិក។
ខណៈមេដឹកនាំអឺរ៉ុបសន្យាការពារអ៊ុយក្រែន ប្រឆាំងរស្ស៊ីនាពេលអនាគត ក្នុងនោះរួមទាំងមធ្យោបាយយោធាផង វិមានក្រឹមឡាំងនាពេលនេះទាមទារឲ្យមានការធានាសន្តិសុខសម្រាប់រុស្ស៊ីដែរ ។ អ្នកនាំពាក្យវិមានក្រឹមឡាំងលោកឌីមីឌ្រីប៉េស្កូវថ្លែងថា ក្រុងមូស្កូនឹងមិនទទួលយកឡើយ ដែលក្រុងគៀវចុះហត្ថលេខាលើកិច្ចព្រមព្រៀងសន្តិភាព ហើយបន្ទាប់មកបំផ្លាញកិច្ចព្រមព្រៀងនោះវិញ។ អ៊ុយក្រែនដាច់ខាតមិនត្រូវប្រព្រឹត្តអំពើឈ្លានពានប្រឆាំងរុស្ស៊ីឡើយ ។
វិមានក្រឹមឡាំងក៏ថ្លែងនាថ្ងៃទី១៦ធ្នូដែរថា រុស្ស៊ីប្រហែលជាមិនចូលរួមក្នុងបទឈប់បាញ់គ្នាជាយថាហេតុមួយ អំឡុងពេលបុណ្យណូអែលទេ ។ អធិការបតីអាល្លឺម៉ង់លោកលោកហ្វ្រីអ៊ីឌ្រីកម័រស្នើកាលពីថ្ងៃទី១៥ធ្នូនៅក្រុងប៊ែរឡាំងថា រុស្ស៊ីអាចផ្អាកការវាយប្រហារក្នុងឱកាសបុណ្យណូអែល ដោយបែបនេះអាចនាំជាយថាហេតុ ដល់ការបើកកិច្ចចរចាសម្រាប់បទឈប់បាញ់គ្នាដ៏ពិតប្រាកដមួយ ។
ចំណែកលោកហ្សេឡេនស្គីវិញថ្លែងថា ក្រុងគៀវគាំទ្រគំនិតបទឈប់បាញ់គ្នាមួយ ក្នុងនោះរួមទាំងការវាយប្រហារ លើបណ្ដាហេដ្ឋារចនាសម្ព័ន្ធថាមពលអំឡុងពេលបុណ្យណូអែលផង៕
ចែករំលែកព័តមាននេះ