រាជធានីភ្នំពេញ ៖ រដ្ឋមន្ត្រីទេសចរណ៍ កម្ពុជា-វៀតណាម បានចុះហត្ថលេខាលើអនុស្សារណៈយោគយល់គ្នាស្តីពីកិច្ចសហប្រតិបត្តិការទេសចរណ៍រវាងប្រទេសទាំងពីរដើម្បីជំរុញឱ្យមានកំណើនក្នុងវិស័យទេសចរណ៍ទៅវិញទៅមក ។
លោក ថោង ខុន រដ្ឋមន្ត្រីក្រសួងទេសចរណ៍កម្ពុជា និងលោក Hoang Tuan Anh រដ្ឋមន្ត្រីក្រសួងវប្បធម៌ កីឡា និងទេសចរណ៍វៀតណាមបានចុះហត្ថលេខាលើអនុស្សារណៈយោគយល់គ្នានោះ កាលពីរសៀលថ្ងៃទី៩ កញ្ញា ២០១៥ នៅក្នុងសណ្ឋាគារ REX Hotel ក្នុងទីក្រុងហូជីមីញ។
អនុស្សារណៈយោគយល់គ្នានេះ ផ្តោតលើការពង្រឹង និងពង្រីកកិច្ចសហការ និងសហប្រតិបត្តិការរយៈពេលវែង សម្តៅធានាផលប្រយោជន៍ទៅវិញទៅមកតាមរយៈការជំរុញឲ្យមានលំហូរភ្ញៀវទេសចររវាងប្រទេសទាំងពីរ (កម្ពុជា-វៀតណាម) ដែលក្នុងនោះកិច្ចសហការ និងសហប្រតិបត្តិការក្នុងការសម្រួលការធ្វើដំណើរ និងដឹកជញ្ជូនទេសចរឆ្លងកាត់ព្រំដែន គឺជាបញ្ហាសំខាន់មួយ រួមចំណែកបង្កើនប្រសិទ្ធភាពក្នុងការជំរុញការតភ្ជាប់នៅក្នុងតំបន់អាស៊ាន ដោយជំរុញឲ្យមានកំណើនភ្ញៀវទេសចរនៃប្រជាជាតិទាំងពីរ ព្រមទាំងភ្ញៀវទេសចរមកប្រទេសទី៣។
ទន្ទឹមនោះដើម្បីធានាឲ្យបាននូវកំណើនទេសចរប្រកបដោយនិរន្តរភាព ភាគីទាំងពីរនឹងបន្តជំរុញការអភិវឌ្ឍធនធានមនុស្ស និងការអភិវឌ្ឍសមត្ថភាពជំនាញ ដោយជំរុញការផ្លាស់ប្តូរដំណើរទស្សនកិច្ចផ្លូវការ និងដំណើរទស្សនកិច្ចស្វែងយល់ ការចូលរួមសិក្ខាសាលា សន្និសីទ និងអង្គប្រជុំផ្សេងៗ សម្រាប់ស្ថាប័នរដ្ឋ និងឯកជនព្រមទាំងអ្នកសារព័ត៌មាន។ល។
សូមបញ្ជាក់ថា កាលពីឆ្នាំ២០១៤ កម្ពុជាទទួលបានទេសចរណ៍អន្តរជាតិសរុបចំនួន ៤.៥លាននាក់ ក្នុងកំណើន ៧% (ធៀបនឹងឆ្នាំ២០១៣) ក្នុងនោះទេសចរវៀតណាមមានជាង៩០ម៉ឺននាក់ ឈរក្នុងលំដាប់ថ្នាក់ទី១ (ក្នុងកំណើន ៦,១% ) បើប្រៀបនឹងភ្ញៀវទេសចរផ្សេងៗ។
ដោយឡែក ក្នុងរយៈពេល០៧ខែ ដើមឆ្នាំ២០១៥នេះ ទេសចរអន្តរជាតិមកទស្សនាកម្ពុជា មានជាង២,៦លាននាក់ ក្នុងនោះទេសចរវៀតណាមមានជាង៥៦ម៉ឺននាក់ ឈរនៅលំដាប់ទី១ (ក្នុងកំណើន ២១,១%) ធៀបនឹងរយៈពេលដូចគ្នានៅឆ្នាំ២០១៤៕
ចែករំលែកព័តមាននេះ