រាជធានីភ្នំពេញ ៖ ក្រោយរកឃើញនាយទាហានម្នាក់ ដែលជាសិក្ខាកាមនៅសាកលវិទ្យាល័យការពារជាតិ បានឆ្លងកូវីដ១៩ បើទោះបីជានាយទាហាននោះ បានចាក់វ៉ាក់សាំងប្រឆាំងវីរុសកូវីដ ១៩ បានចំនួន ២លើករួចហើយនោះ…
រាជធានីភ្នំពេញ ៖ ក្រោយរកឃើញនាយទាហានម្នាក់ ដែលជាសិក្ខាកាមនៅសាកលវិទ្យាល័យការពារជាតិ បានឆ្លងកូវីដ១៩ បើទោះបីជានាយទាហាននោះ បានចាក់វ៉ាក់សាំងប្រឆាំងវីរុសកូវីដ ១៩ បានចំនួន ២លើករួចហើយនោះ លោក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក បានចេញនូវបទបញ្ជាណែនាំដល់មេបញ្ជាការយោធភូមិភាគ កងកាំភ្លើងធំ កងឯកភាពចំណុះបញ្ជាការដ្ឋានកងទ័ពជើងគោកទាំងអស់ ត្រូវដាស់តឿនយោធិនទាំងអស់ និងត្រូវពង្រឹងការប្រុងប្រយ័ត្ន ។
ការណែនាំរបស់លោកឧត្តមសេនីយ៍ឯក ហ៊ុន ម៉ាណែត បានធ្វើឡើងបន្ទាប់ពីមានករណីឆ្លងជំងឺកូវីដ១៩ទៅលើ ទាហានម្នាក់ ឈ្មោះ ដារ៉ា សកល នៅអគ្គបញ្ជាការដ្ឋានកងយោធពលខេមរភូមិន្ទ ដែលជាសិក្ខាកាមនៅសាកលវិទ្យាល័យ ការពារជាតិ ទោះបីជាបានចាក់វ៉ាក់សាំង បង្ការជំងឺកូវីដ១៩ ចំនួន២លើករួចរាល់ហើយក៏ដោយ។
លោក ហ៊ុន ម៉ាណែត កូនប្រុសច្បងសម្តេចតេជោ ហ៊ុន សែន នាយករដ្ឋមន្ត្រីកម្ពុជា តាមរយៈសារសម្លេងនៃការចេញបញ្ជាខាងលើនេះបានមានប្រសាសន៍បញ្ជាក់ថា វាជារឿងចាំបាច់បំផុត «ដោយសារតែមកដល់ពេលនេះ ការឆ្លងរាតត្បាតកូវីដ១៩ គឺឆ្លងក្នុងទ្រង់ទ្រាយធំ ពីមួយថ្ងៃ ទៅមួយថ្ងៃ កាន់តែឃើញមុខសញ្ញាថ្មី ទីកន្លែងថ្មី រួមទាំងកងទ័ពយើងក៏មាន ហើយលើកនេះ ចូលទៅដល់ក្នុងបន្ទាយតែម្តង គឺចូលទៅដល់សាលាសាកលវិទ្យាល័យការពារជាតិ» ។
តាមរយៈសារសម្លេងនៅរាត្រីថ្ងៃទី១៧ ខែមីនា លោក ហ៊ុន ម៉ាណែត បានបញ្ជាក់ច្បាស់ៗថា «ឯកឧត្តម មេបញ្ជាការទាំងអស់ គ្រប់ស្ថាប័ន អង្គភាពទាំងអស់ សូមបង្កើននូវវិធានសុខាភិបាល និងដាស់តឿនយោធិនទាំងអស់ ឲ្យអនុវត្តឲ្យបានខ្ជាប់ខ្ជួននូវវិធានសុខាភិបាល»។ លោក ហ៊ុន ម៉ាណែត ក៏បានដាក់បទបញ្ជា ឲ្យរៀបចំទីតាំងធ្វើចត្តាឡីស័ក ដាច់ដោយឡែក និងពេទ្យ នៅក្នុងបន្ទាយកងទ័ព ក្នុងអង្គភាពតែម្តង សម្រាប់យោធិន និងគ្រួសារ ត្រូវធ្វើចត្តាឡីស័ក ក្នុងករណីចាំបាច់ ឬក៏មានយោធិនណាម្នាក់ឆ្លង នៅក្នុងបន្ទាយមានរបស់យើង ហើយដែលត្រូវធ្វើការ Lockdown ឬមួយក៏ត្រូវធ្វើតេស្តយោធិនទាំងអស់ នៅក្នុងអង្គភាព៕
ចែករំលែកព័តមាននេះ