ភ្នំពេញ៖ កម្មវិធីអភិវឌ្ឍន៍សហប្រជាជាតិ ប្រចាំកម្ពុជា UNDP បានប្រកាសនៅល្ងាចថ្ងៃទី១៧ ខែមីនានេះថា ក្រោមកិច្ចសហការជាមួយនឹងធនាគារពិភពលោក និងអង្គការសុខភាពពិភពលោក យូអិនឌីភី ប្រចាំកម្ពុជា បានជួយគាំទ្រដល់ក្រសួងសុខាភិបាលកម្ពុជា ក្នុងការបញ្ជា​ទិញ​រថយន្ត​សង្គ្រោះបន្ទាន់ចំនួន ៦០ គ្រឿង ម៉ាស៊ីនជំនួយផ្លូវដង្ហើមចំនួន ៥០ គ្រឿង និងបរិក្ខារ​ពេទ្យបន្ទាន់ផ្សេងៗ ដើម្បីជួយរាជរដ្ឋាភិបាល ក្នុងការពង្រឹងកិច្ចឆ្លើយតបនឹងជំងឺកូវីដ-១៩ និងដើម្បីស្តារឡើងវិញពីជំងឺរាតត្បាតនេះ។

ដំណឹង​នៃការបង្កើនចំនួន​ឡានពេទ្យ​សង្គ្រោះបន្ទាន់ ម៉ាស៊ីនជំនួយផ្លូវដង្ហើម និងបរិក្ខារពេទ្យបន្ទាន់ជាច្រើននេះ ត្រូវបានធ្វើឡើង ខណៈដែល​កម្ពុជា កំពុងប្រឈមនឹងការឆ្លងរាលដាលដ៏ឆាប់រហ័សនៃជំងឺកូវីដ១៩ ក្នុងព្រឹត្តិការណ៍ឆ្លងសហគមន៍ថ្ងៃ២០កុម្ភៈ។

មកដល់ថ្ងៃទី១៧ ខែមីនា នៅទូទាំងប្រទេសកម្ពុជា​ បានរកឃើញអ្នកឆ្លងជំងឺកូវីដ១៩ សរុបចំនួន ១៥០៥​ ​នាក់។ ក្នុងនោះ ព្រឹត្តិការណ៍សហគមន៍ ២០កុម្ភៈ មានអ្នកឆ្លងកូវីដ ចំនួន ​​៩៩០នាក់​។

រីឯ​ចំនួនអ្នកព្យាបាលជាសះស្បើយ សរុប​មានចំនួន ​​​៨៤០នាក់ ដែលក្នុងនោះ អ្នកពាក់ព័ន្ធទៅព្រឹត្តិការណ៍សហគមន៍២០កុម្ភៈ បាន​ជាសះស្បើយ ​​៣៤០នាក់​ និង​ស្លាប់ម្នាក់។

មកដល់ថ្ងៃទី១៧មីនានេះ អ្នកកំពុងសម្រាកព្យាបាលជំងឺកូវីដ នៅមន្ទីរពេទ្យ មានចំនួន ​៦៦២នាក់។ ក្នុងនោះ មានអ្នកជំងឺកូវីដ១៩ ចំនួន ៣២នាក់ រង់ចាំបញ្ជូនទៅកន្លែងសម្រាក​៕