រាជធានីភ្នំពេញ ៖ ព្រឹទ្ធសភាកម្ពុជាបានថ្កោលទោសចំពោះសភាអឺរ៉ុបពី ការជំនុំជម្រះក្តីប្រឆាំង និងជនល្មើសច្បាប់នៅកម្ពុជាថា គ្មានមូលដ្ឋានច្បាប់ ។ យោងតាមសេចក្តីថ្លែងការណ៍របស់ព្រឹទ្ធសភានៃព្រះរាជាណាចក្រកម្ពុជា នៅថ្ងៃទី១៧ មីនា…
រាជធានីភ្នំពេញ ៖ ព្រឹទ្ធសភាកម្ពុជាបានថ្កោលទោសចំពោះសភាអឺរ៉ុបពី ការជំនុំជម្រះក្តីប្រឆាំង និងជនល្មើសច្បាប់នៅកម្ពុជាថា គ្មានមូលដ្ឋានច្បាប់ ។
យោងតាមសេចក្តីថ្លែងការណ៍របស់ព្រឹទ្ធសភានៃព្រះរាជាណាចក្រកម្ពុជា នៅថ្ងៃទី១៧ មីនា ឆ្នាំ២០២១ បានលើកឡើងថា ព្រឹទ្ធសភានៃព្រះរាជាណាចក្រកម្ពុជា សូមសម្តែងនូវការខកចិត្ត និងសោកស្តាយបំផុតចំពោះសេចក្តីសម្រេចរបស់សភាអឺរ៉ុប នៅថ្ងៃទី១១ ខែមីនា ឆ្នាំ២០២១ ស្តីពីការជំនុំជម្រះក្តីប្រឆាំងនិងជនល្មើសច្បាប់ នៅកម្ពុជា (២០២១/២៥៧៩(RSP)) ។
ព្រឹទ្ធសភាបន្តថា សេចក្តីសម្រេចនេះធ្វើឡើងដោយគ្មានមូលដ្ឋានច្បាប់ មានចរិតលំអៀង និងក្រោមហេតុផលនយោបាយ និងលើកទឹកចិត្តឱ្យក្រុមឧក្រិដ្ឋជនប្រឆាំងជាមួយរាជរដ្ឋាភិបាលស្របច្បាប់តាមរយៈការបម្រើរបៀបវារៈនយោបាយរបស់បរទេសប្រឆាំងជាតិឯង ។ ព្រឹទ្ធសភាលើកឡើងថា ការទាមទារឱ្យទម្លាក់ការចោទប្រកាន់លើជនជាប់ចោទ និងលុបចោលការផ្ដន្ទាទោស និងការកាត់ទោសជនល្មើសដោយតុលាការកម្ពុជា គឺជាការជ្រៀតជ្រែកចូលកិច្ចការផ្ទៃក្នុងរបស់កម្ពុជាដែលជារដ្ឋ អធិបតេយ្យ និងជាការរំលោភលើឯករាជ្យភាពរបស់តុលាការកម្ពុជា ដែលមិនអាចជ្រៀតជ្រែកបានជាដាច់ខាត ។
ការជំនុំជម្រះក្តីលើបុគ្គលដែលជាអតីតមេដឹកនាំ និងសកម្មជនប្រឆាំង ព្រមទាំងមន្ត្រីសង្គមស៊ីវិល ដែលបានរំលោភបំពានច្បាប់កន្លងមកត្រូវបានធ្វើឡើងដោយផ្អែកលើមូលដ្ឋានអង្គហេតុ (ភស្តុតាងរឹងមាំ) និងស្របតាមច្បាប់ជាធរមានរបស់កម្ពុជា ។ សិទ្ធិរបស់ជនជាប់ចោទក្នុងការការពារខ្លួននីតិវិធីសវនាការ ប្រព្រឹត្តទៅត្រឹមត្រូវ ធានាយ៉ាងពេញលេញដោយច្បាប់ ហើយការជំនុំជម្រះត្រូវបានធ្វើឡើងជាសាធារណៈ ។
ដោយមានវត្តមានមេធាវីការពារចុងចោទ អង្គទូត និងអង្គការសង្គមស៊ីវិល នៅក្នុងបន្ទប់សវនាការ។ ព្រឹទ្ធសភាបន្ថែមថា ដូចគ្នាទៅនឹងប្រទេសប្រជាធិបតេយ្យដទៃទៀតដែរ ការអនុវត្តច្បាប់ទៅលើបុគ្គលដែលប្រើប្រាស់ សិទ្ធិសេរីភាពហួសដែនកំណត់ដោយច្បាប់ ដែលធ្វើឱ្យប៉ះពាល់ធ្ងន់ធ្ងរដល់សណ្តាប់ធ្នាប់សាធារណៈ និង សន្តិសុខជាតិ មិនត្រូវចាត់ទុកជាការរឹតត្បិតខាងនយោបាយ ឬលំហប្រជាធិបតេយ្យនោះទេ ។
ប្រភពបន្តថា ព្រះរាជាណាចក្រកម្ពុជា ប្តេជ្ញាបន្តគោរពគោលការណ៍នីតិរដ្ឋ ប្រជាធិបតេយ្យ សេរីពហុបក្ស និងធានានូវការអនុវត្តសិទ្ធិសេរីភាពទាំងឡាយ ស្របតាមរដ្ឋធម្មនុញ្ញ និងច្បាប់ ស្ថិរភាព និងសុខុមាលភាពរបស់ប្រជាជន ៕
ចែករំលែកព័តមាននេះ