ពិធីបុណ្យចូលឆ្នាំថ្មីប្រពណីជាតិកាន់តែខិតចូលមកដល់ហើយ ជាបុណ្យប្រពៃណីជាតិដ៏ធំមួយត្រូវបានរៀបចំធ្វើជារៀងរាល់ឆ្នាំមិនថាតែនៅកម្ពុជានោះទេ រីឯនៅតាមប្រទេសជិតខាងមួយចំនួនទៀតក៏តែងប្រារព្ធនូវពិធីបុណ្យធ៏ធំនេះដែរ ទៅតាមបែបបទ លាយនឹងជំនឿផ្សេងៗដូចគ្នាខ្លះ ខុសគ្នា ។ ប៉ុន្តែអ្វីដែលពិសេសនោះគឺព្រះនាមទេវតាថ្មី ដែលជាទេពនៃសិរីសួស្តី ក្នុងឆ្នាំថ្មីនោះគឺជាតួអង្គសំខាន់បំផុតត្រូវបានប្រើប្រាស់នាមទេវតាដូចៗគ្នា ។
នៅក្នុងពិធីបុណ្យចូលឆ្នាំខ្មែររយៈពេលបីថ្ងៃគឺថ្ងៃទី១ជាថ្ងៃមហាសង្ក្រាន្ត ថ្ងៃទី២វារៈវ័នបត និងថ្ងៃទី៣ ថ្ងៃឡើងស័ក បើទោះជាសប្បាយនឹងការលេងល្បែងប្រជាប្រិយទៅតាមប្រពៃណីទំនៀមទម្លាប់យ៉ាងក៏ដោយ ក៏ជនជាតិខ្មែរយើងមិនភ្លេចពីរឿងធ្វើបុណ្យបំពេញទានក្នុងកំឡុងពេលបីថ្ងៃនេះដែរ ឃើញមានបុរសនារីទាំងចាស់ទាំងក្មេងក្នុងសម្លៀកបំពាក់ស្អាតៗយកចង្ហាន់ទៅវត្តដើម្បីឧទ្ទិសបុណ្យកុសលដល់បុព្វការីជនផង ដើម្បីសុំសុខចម្រើនដល់ដំណើរជីវិតខ្លួនចាប់តាំងពីឆ្នាំថ្មីនេះតរៀងទៅ ក្រោមទឹកមុខសប្បាយរីករាយ ។
បុណ្យចូលឆ្នាំខ្មែរក៏មានរឿងព្រេងនិទានទាក់ទងពិធីបុណ្យនេះផងដែរ ដែលជាការនិពន្ធដោយជនជាតិខ្មែរផ្ទាល់ក្នុងការផ្សារភ្ជាប់ទៅនឹងពុទ្ធសាសនា ដែលនិពន្ធនៅឆ្នាំ ១៩៤៧ ដោយលោកឧកញ៉ា ហោរាធិបតី ញឹមប៉ែន នៃព្រះរាជបណ្ណាល័យជាតិខ្មែរ ដែលបានចុះផ្សាយពីរឿងព្រេងទេវៈកថានេះទៅក្នុងសៀវភៅ ប្រតិទិនកម្ពុជា ឆ្នាំទី១ នៃសូរិយាត្រីឡើងស័ក ដែលនិយាយពីការភ្នាល់ប្រស្នា ៣ខ រវាងអាទិទេព មហាព្រហ្មជាមួយនិងធម្មបាលកុមារ ជាអវតារបស់ព្រះឥន្ទ្រ ។
ផ្អែកទៅតាមជំនឿ ទំនាយនៃព្រះស្ងោយ ទំនាយព្រះភិរុណ ទំនាយការធ្វើស្រែចម្ការ និងទំនាយផ្សេងៗទៀតសុទ្ធសឹងតែសម្ដែងអំពីភោគផលដែលនឹងសម្រេចបានរយៈពេលពេញមួយឆ្នាំ ។ ជាក់ស្តែងក្នុងឆ្នាំថ្មីនេះ គឺពិធីបុណ្យចូលឆ្នាំថ្មី ឬហៅថាថ្ងៃមហាសង្ក្រាន្តនឹងប្រារព្ធធ្វើនៅថ្ងៃពុធ ៣កើត ខែពិសាខ ឆ្នាំឆ្លូវ ដែលត្រូវនឹងថ្ងៃទី១៤ ខែមេសា គ្រិស្តសករាជ២០២១ វេលាម៉ោង ៤:០០នាទីទៀបភ្លឺ ។ យោងទៅតាមពេលវេលានេះ យើងក៏អាចកំណត់បាននូវព្រះនាមទេពធីតាសង្ក្រាន្ត អាការ: និងព្រះស្ងោយទេវតាបានទៅតាមក្បួនតម្រាពីបរមបុរាណជាក់ប្រាកដ ។
សប្បិ ប្រែថាទឹកដោះថ្លា គឺជាក្រយាព្រះស្ងោយរបស់ទេព្តាឆ្នាំថ្មី ឆ្នាំឆ្លូវ ព្រះនាមមណ្ឌាទេវី ។ ទឹកដោះថ្លា គឺពិតជាមានអត្ថន័យដ៏វិសេសវិសាលណាស់ ពោលគឺជាប្រស្នានៃការដឹងនូវឧបការគុណរបស់មាតាពិតៗ ។
បើតាមប្រផ្នូលក្នុងឆ្នាំនេះ គឺសំដៅដល់ការលើករក្សា ការលើកតម្កើងនូវគុណមាតាគ្រប់រូប ។ កូនណាដឹងគុណមាតា នោះគឺជាកូនដែលតាមដោយគន្លង កូនណាសំពះបម្រើមាតាបិតា កូនណាដឹកនាំម្តាយឪពុកឱ្យតាំងមាំក្នុងធម៌ កូននោះឈ្មោះថាជាអតិជាតិបុត្រ ជាកូនលុះដោយធម៌ ជាកូនដែលបានតម្កល់នូវព្រះរស់ក្នុងផ្ទះ នោះទេវតានឹងឱ្យសព្វសាធុការពរបវររុងរឿងដល់កូនចៅប្រុសស្រីទាំងឡាយនោះតាំងពីឆ្នាំថ្មីចូលមកនេះ ឱ្យបានសុខសាន្ត បរិបូណ៌ដោយកម្លាំង ពលំ និងភោគទ្រព្យ សុខកាយសប្បាយចិត្តចម្រុងចម្រើនតរៀងទៅ ៕ សាន សារិន
ចែករំលែកព័តមាននេះ