ខេត្តបន្ទាយមានជ័យ ៖ ខ្ទឹមបារាំងដែលអត់ទីផ្សារកន្លងមកនៅសហគមន៍បន្លែបៃតងពង្រកងវ៉ា ស្ថិតនៅភូមិពង្រនិងភូមិកងវ៉ាសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ឥឡូវនេះមានការទិញបោះដុំ ជាបណ្តើរៗហើយ ។ លោកដុំ…
ខេត្តបន្ទាយមានជ័យ ៖ ខ្ទឹមបារាំងដែលអត់ទីផ្សារកន្លងមកនៅសហគមន៍បន្លែបៃតងពង្រកងវ៉ា ស្ថិតនៅភូមិពង្រនិងភូមិកងវ៉ាសង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ឥឡូវនេះមានការទិញបោះដុំ ជាបណ្តើរៗហើយ ។
លោកដុំ វណ្ណឌី អនុប្រធានមន្ទីរពាណិជ្ជកម្មខេត្តបន្ទាយមានជ័យ ប្រាប់ឲ្យដឹងថា ៖ បន្ទាប់ពីមានឧប្បត្តិហេតុ ខ្ទឹមបារាំងនៅសហគមន៍បន្លែបៃតងពង្រ កងវ៉ា ជួបការលំបាកឬអត់ទីផ្សារលោក និងមន្ត្រីបានសហការនឹងម្ចាស់ផ្សារ និងអាជីវករដើម្បីទៅជួយទិញដុំពីកសិករ ហើយលក់រាយ និងលក់បោះដុំបន្ត ។
ចំណែកលោក ហ៊ុល សាវេត ប្រធានសហគមន៍បន្លែបៃតងពង្រ កងវ៉ាបានប្រាប់នៅថ្ងៃទី១៦ ខែមីនានេះថា ៖ មើមខ្ទឹមបារាំងរបស់លោកមានចំនួនជាង១០តោន មកទល់ថ្ងៃនេះលក់ដុំបាន១តោនដែរ ។ ឯកសិករផ្សេងទៀតក្នុងសហគមន៍លក់បោះដុំ សរុបបានប្រមាណ៦ទៅ៧តោនដែរក្នុងចំណោមមើមខ្ទឹមបារាំងនៅសល់ចាក់ធារក្រោមផ្ទះសរុបជាង១០០តោន ។
លោកបានបន្តថា ៖ ចំពោះការលក់ គឺចុះថោកជាខ្លាំងបើប្រៀបធៀបនឹងឆ្នាំ២០២០កន្លងមក ។ គឺកាលពីឆ្នាំ២០២០ លក់ដុំបាន១ដុល្លាឬ៤.០០០រៀល/១គក្រ ។ តែពេលអត់ទីផ្សារនះលក់បានតែពី១.២០០ទៅ១.៥០០រៀល/១គក្រប៉ុណ្ណោះ ។ ហើយបើជ្រាវរើសយកតែខ្ទឹមណាល្អបំផុត អាចលក់បានពី១.៥០០រៀលទៅ២.៥០០រៀល/គក្រដែរ ប៉ុន្តែមានចំនួនសរុបជ្រើសរើសបានត្រឹមតែខ្ទង់រយគីឡូក្រាមប៉ុណ្ណោះ ក្នុងចំណោមសរុប១០០ប្លាយតោននោះ ។ លោកបន្តថា ៖ ទោះយ៉ាងណាតម្លៃប៉ុណ្ណាក៏លក់ដែរ ធ្វើម៉េចកុំអោយតែត្រូវខូចគ្រវាត់ចោលទាំងស្រុង ។
លោកនិយាយដែរថា ៖ សម្រាប់អ្នកស្រី សុភក្តិ នៃទីផ្សារបន្លែធម្មជាតិរបស់ធនាគារអភិវឌ្ឍន៍ជនបទ ដែលបានទិញមុន២០០គក្រ បានទូរទាត់លុយហើយ ។ ឥឡូវបានយក២០០គ.ក្រទៀត ក្នុងតម្លៃ២.៥០០រៀល/គក្រ ។ ប៉ុន្តែកសិករត្រូវបង់ថ្លៃដឹកជញ្ជូនពីបន្ទាយមានជ័យទៅភ្នំពេញ ។
លោកហ៊ុល សាវេត បានបញ្ជាក់ថា ៖ ក្នុងនោះ លោក និងកសិករក្នុងសហគមន៍នេះក៏ត្រូវបានសម្អាត និងបកស្រទាប់និងរើសចេញខ្ទឹមណាមិនល្អ ឬខូចខាតដោយសារទុកយូរពេក អត់ទីផ្សារនោះក្នុងចំនួនច្រើនតោនដែរ ហើយយកទៅបោះចោលនៅក្នុងដីចម្ការ ។ ទោះយ៉ាងណា កសិករនៃសហគមន៍ខាងលើបានថ្លែងអំណគុណមន្ត្រីដែលជួយអន្តរាគមន៍អរគុណទីផ្សារបន្លៃសុវត្ថិភពនៃធនាគារអភិវឌ្ឍន៍ជនបទ និងជាពិសេសផ្សារហ៊ុយ ឡេង ដែលជាផ្សារបោះដុំបន្លែ ផ្លែឈើ ម្ហូបអាហារ ដែលបានអោយឈ្មួញទៅជួយទិញលើកដុំ ។ ហេតុនេះចំពោះមុខ ត្រូវរកលុយសងបំណុលចាស់ដែលជំពាក់គេក្នុងការដាំខ្ទឹមបារាំងដែលមានបញ្ហាទីផ្សារនេះសិន ។
សូមបញ្ជាក់ថា ៖ សហគមន៍បន្លែបៃតងពង្រ កងវ៉ានៅសង្កាត់កំពង់ស្វាយក្រុងសិរីសោភ័ណនេះមានកសិករ២០គ្រួសារ ដែលបានអនុវត្តកម្មវិធីអាសស្ព៉ាយ (ASPIRE) ដែលឧបត្ថម្ភដោយអង្គការអាយហ្វាដ(IFAD) ។ ក្នុងនោះ កសិករបានដាំបន្លែធម្មតាដូចជា ស្ពៃចង្កឹះ ស្ពៃក្រញ៉ាញ់ ស្ពៃផ្លក់ចយ ត្រសក់ ខាត់ណាផ្កា ម្ទេសដៃនាង ប៉េងប៉ោះ ប៉េងប៉ោះឆឺរី ត្រឡាច ត្រប់ស្រួយ ប៉ិកគក់ ខ្តឹមស្លឹក……ជាដើម ។ ប៉ុន្តែកសិករ នៅបានពុះពារដាំដំណាំបន្លែដែលពិបាកដាំ ដែលកន្លងមក ខ្មែរយើងកម្រនឹងដាំដុះ ដូចជាខ្លឺមបារាំង ខ្ទឹមស ដាំលើផ្ទៃដីប្រមាណ៧,៥ហិចតា ។ ដាំការ៉ុត ,ដាំលមើ ចំនួនជាង២ហិចតាផងដែរ ៕
ចែករំលែកព័តមាននេះ