ខេត្តកំពង់ឆ្នាំង ៖ មកដល់ពេលនេះ បើទោះជាស្ថានភាពក្នុងខេត្តកំពង់ឆ្នាំងនៅមិនទាន់មានអ្នកវិជ្ជមានកូវីត១៩ក៏ពិតមែន ក៏ប៉ុន្តែសម្រាប់មន្ទីរសុខាភិបាលខេត្តកំពង់ឆ្នាំងបានយកចិត្តទុកដាក់ ដោយបានរៀបចំកន្លែងធ្វើចត្តាឡីស័កតាមបណ្តាស្រុកចំនួន៤កន្លែង និងកំពុងទទួលអ្នក ដែលពាក់ព័ន្ធមកពីប្រទេសថៃនិងអ្នកពាក់ព័ន្ធសហគមន៍ 20 កុម្ភៈ…
ខេត្តកំពង់ឆ្នាំង ៖ មកដល់ពេលនេះ បើទោះជាស្ថានភាពក្នុងខេត្តកំពង់ឆ្នាំងនៅមិនទាន់មានអ្នកវិជ្ជមានកូវីត១៩ក៏ពិតមែន ក៏ប៉ុន្តែសម្រាប់មន្ទីរសុខាភិបាលខេត្តកំពង់ឆ្នាំងបានយកចិត្តទុកដាក់ ដោយបានរៀបចំកន្លែងធ្វើចត្តាឡីស័កតាមបណ្តាស្រុកចំនួន៤កន្លែង និងកំពុងទទួលអ្នក ដែលពាក់ព័ន្ធមកពីប្រទេសថៃនិងអ្នកពាក់ព័ន្ធសហគមន៍ 20 កុម្ភៈ ចូលមកស្នាក់នៅធ្វើចត្តាឡីស័កជាបណ្តើរហើយ ។ នេះបើតាមការបញ្ជាក់របស់ប្រធានមន្ទីរសុខាភិបាលខេត្តកំពង់ឆ្នាំង ដែលបានបញ្ជាក់ប្រាប់ភ្នាក់ងារយើង នៅរសៀលថ្ងៃទី១៦ ខែមីនាឆ្នាំ ២០២១ នេះ ។
លោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានឲ្យដឹងថា៖ កន្លងទៅ យើងបានរៀបចំកន្លែងធ្វើចត្តាឡីស័ក នៅសាលាគំរូក្រុងកំពង់ឆ្នាំង ។ ប៉ុន្តែក្រោយមកសាលាមានសិស្សចូលរៀន ទើបយើងរៀបចំកន្លែងធ្វើចត្តាឡីស័កនៅតាមបណ្ដាស្រុកចំនួន៤កន្លែង គឺមាននៅស្រុកទឹកផុស, ស្រុកបរិបូណ៌, ស្រុកកំពង់ត្រឡាច, និងស្រុករលាប្អៀរ ។ កន្លែងដែលត្រូវធ្វើមណ្ឌលចត្តាឡីស័កទាំង នេះគឺយកសាលារៀន ដែលមិនពាក់ព័ន្ធ មានសិស្សចូលរៀន ដូចជាសាលាទើបសាងសង់ហើយជាដើម ។ លោក ប្រាក់ វ៉ុន បានបញ្ជាក់ទៀតថាគ្រប់កន្លែង ទាំង៤ ដែលកំណត់ធ្វើមណ្ឌលចត្តាឡីស័ក គឺសុទ្ធតែបានរៀបចំបំពាក់នូវប្រព័ន្ធទឹក និងភ្លើងអគ្គីសនី បន្ទប់ទឹក រួមផ្សំនឹងកន្លែងដេកយ៉ាងត្រឹមត្រូវ ដោយមានឃីតរបស់ក្រសួងមាន កន្ទេល មុង និងខ្នើយ ជាដើម ។
បើគិតមកដល់ពេលនេះ មណ្ឌលទាំង៤ ដែលរៀបចំធ្វើ ចត្តាឡីស័កគឺបានទទួលអ្នកដែល ពាក់ព័ន្ធទាំង២ប្រភេទគឺសហគមន៍ ២០ កុម្ភៈ និងពលករមកពីប្រទេសថៃសរុបមាន ចំនួន១៨០ នាក់ ។ ដោយឡែកសម្រាប់ការចាក់វ៉ាក់សាំង ការពារជំងឺកូវីដ-១៩ នេះផងដែរ ត្រូវបាន ប្រធានមន្ទីរសុខាភិបាល ខេត្តកំពង់ឆ្នាំង បញ្ជាក់ថា៖គិតត្រឹមរសៀលថ្ងៃទី ១៥ ខែមិនា ការចាក់វ៉ាក់សាំងសរុប ទាំង៣មណ្ឌល គឺ មន្ទីរពេទ្យបង្អែកខេត្តកំពង់ឆ្នាំង , ស្រុកបរិបូរណ៌ និងស្រុកកំពង់ត្រឡាច បានចំនួន ៤២៥៦ នាក់ហើយ។ បើតាមផែនការនឹងបញ្ចប់ការចាក់វ៉ាក់សាំងលើកទី១ នៅថ្ងៃទី ១៧ ខែមិនាស្អែកនេះ ព្រោះអាចនឹងគ្រប់៥ ពាន់នាក់ ស្មើនឹង៥ពាន់ដុស៍ ដែលបានកំណត់ ។
ជាមួយនឹងការព្រួយបារម្ភណ៍ ការរីករាលដាលនៃជំងឺកូវីដ១៩នេះដែរ អាជ្ញាធរខេត្តកំពង់ឆ្នាំង ក៏បានចេញលិខិតជូនដំណឹង ដល់តាមបណ្ដាស្រុក ក្រុង ទាំងអស់ សូមបិទកម្មវិធីជួបជុំ ដូចជាពិធីមង្គលការ, ពិធីបុណ្យទាន និងជប់លៀងផ្សេងៗ ហើយជាងនេះទៀត អាជ្ញាធរខេត្តកំពង់ឆ្នាំង ក៏បានរៀប ចំវត្ត ក្នុងស្រុក ចំនួន ៤ កន្លែង សម្រាប់ធ្វើពិធីបូជាសព បើសិនមានអ្នកស្លាប់ដោយសារ covid-19 ។
សូមបញ្ជាក់ដែរថា នៅតាមមណ្ឌលធ្វើ ចត្តាឡីស័ក ក៏មានសប្បុរសជន អាជ្ញាធរមូលដ្ឋាន ពិសេស ព្រះសង្ឃក៏បានយកអំណោយមានគ្រឿងឧបភោគបរិភោគទៅផ្ដល់ជូនតាមបងប្អូនដែលកំពុងធ្វើចតាឡីស័កនៅតាមណ្ឌលទាំង 4 នេះផងដែរ យ៉ាងនេះក្តីគិតមកដល់ពេលនេះ សម្រាប់ខេត្តកំពង់ឆ្នាំង មិនទាន់មានអ្នកមានវិជ្ជមានកូវីដ19 នៅឡើយនោះទេ៕
ចែករំលែកព័តមាននេះ