មួយរាត្រីខណ្ឌមានជ័យមានអ្នកកើតកូវីដយ៉ាងហោច៧នាក់
- ភ្នំពេញ
រាជធានីភ្នំពេញ ៖ គិតតាំងពីវេលាម៉ោង៦ល្ងាច ថ្ងៃទី១៦ មិនា ឆ្នាំ២០២១ រហូតដល់វេលាម៉ោង៦ព្រឹក ថ្ងៃទី១៧ ខែឆ្នាំដដែលនេះ យ៉ាងហោចណាស់មានមនុស្សប្រុសស្រីចំនួន៧នាក់…
រាជធានីភ្នំពេញ ៖ គិតតាំងពីវេលាម៉ោង៦ល្ងាច ថ្ងៃទី១៦ មិនា ឆ្នាំ២០២១ រហូតដល់វេលាម៉ោង៦ព្រឹក ថ្ងៃទី១៧ ខែឆ្នាំដដែលនេះ យ៉ាងហោចណាស់មានមនុស្សប្រុសស្រីចំនួន៧នាក់ ត្រូវបានរកឃើញថា មានផ្ទុកវីរុសកូវីដ១៩ ក្នុងភូមិសាស្ត្រខណ្ឌមានជ័យទាំងមូល ។
អ្នកជម្ងឺទាំង៧នាក់ មានស្រី៣នាក់ ត្រូវបានក្រុមគ្រូពេទ្យ សហការជាមួយកម្លាំងអាជ្ញាធរមូលដ្ឋាន បើករថយន្តពេទ្យចុះទៅដល់តាមលំនៅឋាននីមួយៗរបស់ពួកគេ បន្ទាប់ពីពួកគេត្រូវបានក្រុមគ្រូពេទ្យបានយកសំណាកកាលពីពេលកន្លងទៅ ហើយតេស្តិ៍ឃើញថា មានផ្ទុះនូវវីរុសកូវីដ១៩ ។
សូមបញ្ជាក់ថា អ្នកជម្ងឺទាំង៧នាក់ ត្រូវក្រុមគ្រូពេទ្យ ចុះទៅយកនៅទីតាំងផ្សេងៗគ្នា ក្នុងនោះរួមាន ៖ គោលដៅទី១ ៖ នៅវេលាម៉ោង២០និង៣០នាទីយប់ អ្នកជម្ងឺ២នាក់ ភេទប្រុស អាយុ២០ឆ្នាំម្នាក់ និង៧២ឆ្នាំម្នាក់ ត្រូវបានក្រុមគ្រូពេទ្យចុះទៅទទួលដើម្បីយក នៅចំណុចភូមិថ្មី និងភូមិមានជ័យ ក្នុងសង្កាត់ស្ទឹងមានជ័យទី១ ខណ្ឌមានជ័យ ។
គោលដៅទី២ ៖ នៅវេលាម៉ោង២១ យប់ថ្ងៃខែខាងលើ អ្នកជម្ងឺភេទប្រុស វ័យ៣០ឆ្នាំ ត្រូវបានក្រុមគ្រូពេទ្យចុះទៅទទួលដើម្បីយក នៅចំណុចផ្ទះលេខ9B ផ្លូវ31BT ( ក្បែរវត្តសន្សំកុសល ) ក្នុងភូមិសន្សំកុសល៣ សង្កាត់បឹងទំពន់ទី១ ខណ្ឌមានជ័យ ។ គោលដៅទី៣ ៖ វេលាម៉ោងយប់រំលងអាធ្រាត្រ ឈានចូលថ្ងៃទី១៧ ខែឆ្នាំដដែល អ្នកជម្ងឺភេទប្រុស អាយុ២៨ឆ្នាំ ត្រូវបានក្រុមគ្រូពេទ្យចុះទៅទទួលដើម្បីយក នៅចំណុចផ្ទះលេខ៣៥០ តាមបណ្តោយផ្លូវលេខ៣៧១ ក្នុងសង្កាត់បឹងទំពន់ទី២ ខណ្ឌមានជ័យ ។
គោលដៅទី៤ ៖ នៅវេលាម៉ោង ១ និង២០នាទីរំលងអាធ្រាត្រ ឈានចូលថ្ងៃទី១៧ ខែឆ្នាំដដែល អ្នកជម្ងឺភេទស្រី៣នាក់ ជាសិស្ស ត្រូវបានក្រុមគ្រូពេទ្យចុះទៅទទួលដើម្បីយក នៅចំណុចផ្ទះលេខ 1NZ ផ្លូវលេខ៣ ភូមិដំណាក់ធំ៥ សង្កាត់ស្ទឹងមានជ័យទី៣ ខណ្ឌមានជ័យ ។
គួរបញ្ជាក់ថា អ្នកជម្ងឺទាំង៧នាក់ ត្រូវបានក្រុមគ្រូពេទ្យ បញ្ចូនទៅព្យាបាល នៅសណ្ឋាគារ The Great Duke ( អតីតសណ្ឋាគារ អ៊ីនធើរ ) ។ ដោយឡែកចំពោះសមាជិកគ្រួសារដែលរស់នៅជាមួយ ឬអ្នកដែលបានប៉ះពាល់ផ្ទាល់ ឬប្រយោលជាមួយអ្នកជម្ងឺ ក្រុមគ្រូពេទ្យតម្រូវអោយមានការធ្វើចត្តាឡីស័កនៅផ្ទះ ដោយចាំបាច់មានកងកម្លាំងសាធារណៈចូលរួមការពារពង្រឹងសន្តិសុខ នៅតាមលំនៅឋាន ឬបន្ទប់ផ្ទះជួលរបស់អ្នកជម្ងឺនីមួយៗផងដែរ ។
សូមបញ្ជាក់បន្ថែមថា គិតចាប់តាំងពីកើតមាននូវព្រឹត្តិការណ៍សហគមន៍២០ កុម្ភៈមក សម្រាប់ភូមិសាស្ត្រខណ្ឌមានជ័យទាំងមូល គឺមានអ្នកកើតនូវជម្ងឺកូវីដ១៩ សរុប៣០នាក់ហើយ នេះបើបូកបញ្ចូលទាំងអ្នកជម្ងឺ៧នាក់ខាងលើដែរ ។
ក្នុង៣០នាក់នោះ ក៏មានអ្នកជម្ងឺម្នាក់ ភេទប្រុស អាយុ៥០ឆ្នាំ បានស្លាប់ផងដែរ កាលពីថ្ងៃ១១ ខែមិនា ឆ្នាំ២០២១កន្លងទៅ ដែលគាត់រស់នៅក្នុងភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ ៕
ចែករំលែកព័តមាននេះ