ខេត្តព្រះវិហារ ៖ ព្រៃឈើជាច្រើនហិកតានៅក្នុងតំបន់ឧទ្យានជាតិឬស្សីត្រឹប ស្ថិតក្នុងស្រុកឆែប ខេត្តព្រះវិហារ រងការឆាបឆេះអស់ជាច្រើន សង្ស័យមានជនខិលខូចលួចដុត កាលពីថ្ងៃទី១៤ ខែមីនា ឆ្នាំ២០២១ ។
ជុំវិញការឆាបឆេះនេះដែរ លោក ប្រាក់ សុវណ្ណ អភិបាលខេត្តព្រះវិហារ បានមានប្រសាសន៍ប្រាប់ តាមទូរស័ព្ទថា ករណីនេះ លោកនឹងចុះទៅពិនិត្យផ្ទាល់នៅទីតាំងឧទ្យានជាតិឬស្សីត្រឹបសម្តេចតេជោ និងចាត់ឲ្យមន្ត្រីជំនាញធ្វើការស្រាវជ្រាវ រកមូលហេតុដែលបណ្តាលឲ្យមានការឆាបឆេះព្រៃឈើអស់ជាច្រើន បែបនេះ ។
លោកបន្ថែមថា មកដល់ពេលនេះ ពុំទាន់មានរបាយការណ៍អំពីការឆាបឆេះព្រៃឈើទាំងនេះ អស់ប៉ុន្មាន ហិកតានៅឡើយទេ ។ ដោយឡែក បើយោងតាមការចុះផ្សាយតាមផេកហ្វេសបុកដែលមានឈ្មោះថា ឧទ្យាន ឬស្សីត្រឹប-Russey Treb Park បានបង្ហោះនៅថ្ងៃទី១៥ ខែមីនា ឆ្នាំ២០២១ នេះថា «ព្រៃក្នុងតំបន់ឧទ្យាន និងកូនឈើ ដែលបានដាំក្រោមអធិបតីភាពដ៏ខ្ពង់ខ្ពស់របស់សម្តេចតេជោ កាលពីឆ្នាំ២០១៨ ត្រូវបានជនខិលខូចដុតក្នុងពេលថ្មីៗនេះ ។ ផ្ទះឆេះអាចសង់ឡើងវិញបាន តែព្រៃឈើដែលឆេះមិនអាចដាំឡើងវិញភ្លាមបានទេ មានតែពាក្យសោកស្តាយតែ
ប៉ុណ្ណោះ»។
ព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ