ទីក្រុងវ៉ាស៊ីនតោន ៖ ប្រទេសឥណ្ឌូណេស៊ី និងសហរដ្ឋអាមេរិក បានព្រមព្រៀងគ្នាដោះស្រាយលើបញ្ហាសំខាន់ៗទាំងអស់លើកិច្ចព្រមព្រៀងពន្ធគយ ដែលបើកផ្លូវសម្រាប់ការចុះហត្ថលេខាលើកិច្ចព្រមព្រៀងមួយ ដោយប្រធានាធិបតី ប្រាបូវូ ស៊ូប៊ៀនតូ (Prabowo…
ទីក្រុងវ៉ាស៊ីនតោន ៖ ប្រទេសឥណ្ឌូណេស៊ី និងសហរដ្ឋអាមេរិក បានព្រមព្រៀងគ្នាដោះស្រាយលើបញ្ហាសំខាន់ៗទាំងអស់លើកិច្ចព្រមព្រៀងពន្ធគយ ដែលបើកផ្លូវសម្រាប់ការចុះហត្ថលេខាលើកិច្ចព្រមព្រៀងមួយ ដោយប្រធានាធិបតី ប្រាបូវូ ស៊ូប៊ៀនតូ (Prabowo Subianto) និងប្រធានាធិបតី ដូណាល់ ត្រាំ (Donald Trump) នៅចុងខែមករា ឆ្នាំ ២០២៦។ នេះបើតាមប្រភពពីទីភ្នាក់ងារសារព័ត៌មាន Reuters បានចេញផ្សាយនៅថ្ងៃទី២៣ ខែធ្នូ ឆ្នាំ២០២៥។
លោក Airlangga Hartarto រដ្ឋមន្ត្រីសម្របសម្រួលកិច្ចការសេដ្ឋកិច្ចឥណ្ឌូណេស៊ី ដែលថ្លែងពីទីក្រុងវ៉ាស៊ីនតោន សហរដ្ឋអាមេរិក កាលពីយប់ថ្ងៃទី២២ ខែធ្នូ កន្លងទៅ បន្ទាប់ពីបានជួបជាមួយលោក Jamieson Greer តំណាងពាណិជ្ជកម្មអាមេរិក បាននិយាយថា អាមេរិកចង់បានសិទ្ធិចូលប្រើប្រាស់រ៉ែសំខាន់ៗរបស់ឥណ្ឌូណេស៊ី ហើយក៏បានយល់ព្រមផ្តល់ការលើកលែងពន្ធលើប្រេងដូង តែ និងកាហ្វេរបស់ឥណ្ឌូណេស៊ី។ ដ្បិតឥណ្ឌូណេស៊ី គឺជាប្រទេសនាំចេញប្រេងដូងធំជាងគេបំផុតលើពិភពលោក ហើយក៏ជាប្រទេសផ្គត់ផ្គង់គ្រាប់កាហ្វេរ៉ូប៊ូស្តា (Robusta) ដ៏សំខាន់មួយរបស់ពិភពលោកផងដែរ។
គួររំលឹកថា ការចរចារវាងប្រទេសទាំងពីរ ហាក់ប្រឈមនឹងហានិភ័យនៃការបាត់បង់នៅដើមខែនេះ បន្ទាប់ពីអាមេរិកបានចោទឥណ្ឌូណេស៊ីថា ដើរថយក្រោយលើការប្តេជ្ញាចិត្តពីមុនរបស់ខ្លួន បើទោះបីជាប្រទេសសេដ្ឋកិច្ចធំជាងគេនៅអាស៊ីអាគ្នេយ៍បានអះអាងថា បុព្វហេតុរបស់ពួកគេគឺនៅធម្មតាដដែល។
ទោះយ៉ាងណាក៏ដោយ លោក Airlangga បានគូសបញ្ជាក់ម្តងទៀតថា អំឡុងពេលកិច្ចពិភាក្សា បញ្ហាសំខាន់ៗទាំងអស់ត្រូវបានដោះស្រាយ ហើយកិច្ចពិភាក្សាជុំចុងក្រោយនេះបានដំណើរការទៅដោយរលូន។ មន្ត្រីមកពីប្រទេសទាំងពីរ កំពុងស្វែងរកការរៀបចំកិច្ចប្រជុំកំពូលរវាងប្រធានាធិបតីឥណ្ឌូណេស៊ី និងប្រធានាធិបតីអាមេរិក នៅចុងខែមករា ឆ្នាំក្រោយ ដែលកិច្ចព្រមព្រៀងពាណិជ្ជកម្មអាចនឹងត្រូវបានចុះហត្ថលេខានៅទីនោះ។
លោក Airlangga បន្ថែមចុងក្រោយថា គ្មានគោលនយោបាយឥណ្ឌូណេស៊ីណាមួយត្រូវបានរឹតត្បិតដោយកិច្ចព្រមព្រៀងនេះទេ។ កិច្ចព្រមព្រៀងនេះមានលក្ខណៈពាណិជ្ជកម្ម និងយុទ្ធសាស្ត្រ ហើយផ្តល់អត្ថប្រយោជន៍ដល់សេដ្ឋកិច្ចរបស់ប្រទេសទាំងពីរ៕
ចែករំលែកព័តមាននេះ