អន្តរជាតិ ៖ នេះជាដំណឹងដ៏ក្រៀមក្រំ និងសោកស្តាយបំផុត ខណៈបុគ្គលឆ្នើមដ៏ល្បីល្បាញ២រូបក្នុងវិស័យកីឡាបានទទួលមរណភាពក្នុងថ្ងៃតែ១ ពោលគឺកាលពីថ្ងៃទី១៣ ខែមីនា ឆ្នាំ២០២១ ។ អតីតម្ចាស់ខ្សែក្រវាត់…
អន្តរជាតិ ៖ នេះជាដំណឹងដ៏ក្រៀមក្រំ និងសោកស្តាយបំផុត ខណៈបុគ្គលឆ្នើមដ៏ល្បីល្បាញ២រូបក្នុងវិស័យកីឡាបានទទួលមរណភាពក្នុងថ្ងៃតែ១ ពោលគឺកាលពីថ្ងៃទី១៣ ខែមីនា ឆ្នាំ២០២១ ។
អតីតម្ចាស់ខ្សែក្រវាត់ WBA ពិភពលោកប្រភេទទម្ងន់មធ្យម Marvelous Marvin Hagler បានទទួលមរណភាពហើយក្នុងអាយុ ៦៦ឆ្នាំ។ ពុំមានការបញ្ជាក់ពីមូលហេតុនៃការស្លាប់របស់កំពូលអ្នកប្រដាល់អាមេរិករូបនេះឡើយ។ ដោយភរិយាលោកគ្រាន់តែប្រកាសថា ស្វាមីលោកស្រីបានទទួលមរណភាពដោយមិននឹកស្មានដល់នៅឯផ្ទះរបស់ពួកគាត់ក្នុងរដ្ឋ New Hampshire។
ក្នុងអាជីពរយៈពេល១៤ឆ្នាំរបស់លោក Hagler ធា្លប់ឡើងសង្វៀនប្រកួត ៦៧លើក ឈ្នះ៦២ ស្មើ២ និងចាញ់៣ ដោយបានផ្តួលគូប្រកួតឱ្យសន្លប់ និងបោះបង់ការប្រកួតចំនួន៥២លើក។
ដោយឡែកដំណឹងដ៏ក្រៀមក្រំមួយទៀតគឺ អតីតអ្នកអត្ថាធិប្បាយការប្រកួតប្រណាំងរថយន្ត Formula 1 ដ៏ល្បីល្បាញបំផុតរបស់ចក្រភពអង់គ្លេសគឺលោក Murray Walker ក៏បានទទួលមរណភាពផងដែរ ក្នុងអាយុ៩៧ឆ្នាំ។
លោក Walker បានចាប់ផ្តើមអាជីពជាអ្នកអត្ថាធិប្បាយលើកដំបូងនៅក្នុងឆ្នាំ ១៩៤៩ ហើយបានក្លាយជាអ្នកអត្ថាធិប្បាយពេញម៉ោងសម្រាប់ការប្រកួតប្រណាំងរថយន្ត Formula 1 នៅឆ្នាំ ១៩៧៨ និងសាងកេរ្តិ៍ឈ្មោះបោះសំលេង រហូតដល់ពេលលោកចូលនិវត្តន៍នៅឆ្នាំ ២០០១។
មរណភាពលោកទាំង២ បានធ្វើឱ្យគ្រប់គ្នាសម្តែងការចូលរួមសោកស្តាយជាទីបំផុត ចំពោះការបាត់បង់បុគ្គលឆ្នើមដ៏មានទេពកោសល្យ ដែលគ្រប់គ្នាបានកោតស្ងាប់ស្ងែងកន្លងមក៕ (ដកស្រង់ចេញពី BBC)
ចែករំលែកព័តមាននេះ