អង់គ្លេស ៖ កីឡាករ Wilfried Zaha ខ្សែប្រយុទ្ធ​ឆ្នើម​របស់​ក្រុម Crystal Palace បាន​ក្លាយជា​កីឡាករ​ដំបូង​គេ​នៅ​ក្រប​ខណ្ឌ English Premier League ដែល​បដិសេធ​មិន​លុតជង្គង់ ដើម្បី​ប្រយុទ្ធ​ប្រឆាំង​នឹង​ការ​រើសអើង​ជាតិ​សាសន៍ មុន​ពេល​ការ​ប្រកួត​ចាប់ផ្តើម​។

ក្នុង​ជំនួប​ដែល​ម្ចាស់ផ្ទះ Crystal យកឈ្នះ​លើ​ក្រុម West Brom ដោយ​លទ្ធផល ១-០ កាលពី​យប់​ម្សិលមិញ គេ​ឃើញ​គ្រប់​គ្នា​ដែល​មាន​វត្តមាន​លើ​ទីលាន​ប្រកួត​ទាំងអស់​សុទ្ធតែ​លុតជង្គង់ លើកលែងតែ Zaha តែ​ប៉ុណ្ណោះ​ដែល​ឈរ​តែ​ម្នាក់ឯង​។

នៅ​ក្នុង​សេចក្តីថ្លែងការណ៍​មួយ ខ្សែប្រយុទ្ធ​កូដ​ឌី​វ័​រវ័យ​២៨​ឆ្នាំ​រូប​នេះ បាន​លើក​ឡើង​ថា «​មិន​មានការ​សម្រេចចិត្ត​ត្រូវ​ឬ​ខុស​នោះ​ទេ ប៉ុន្តែ​សម្រាប់​ខ្ញុំ​ផ្ទាល់ ខ្ញុំ​មាន​អារម្មណ៍​ថា​ការ​លុតជង្គង់​គ្រាន់តែ​ជា​ផ្នែក​មួយ​នៃ​ទម្លាប់​មុន​ការ​ប្រកួត​ប៉ុណ្ណោះ​។ ខណៈ​ការ​រើសអើង​ជាតិ​សាសន៍​នៅ​តែ​កើត​មាន​ដដែល »​។

កីឡាករ​រូប​នេះ​បាន​បន្ត​ទៀត​ថា «​ក្នុង​នាម​ជា​សង្គម​មួយ ខ្ញុំ​មាន​អារម្មណ៍​ថា យើង​គួរតែ​ជំរុញ​ឱ្យ​មានការ​អប់រំ​ប្រសើរ​ជាង​មុន​នៅ​ក្នុង​សាលារៀន​។ ហើយ​សហគមន៍​មួយ​ឬ​ប្រព័ន្ធ​ផ្សព្វផ្សាយ​សង្គម គួរតែ​ចាត់វិធានការ​យ៉ាង​ម៉ឺងម៉ាត់​ប្រឆាំង​នឹង​មនុស្ស​ដែល​រំលោភ​បំពាន​សិទ្ធិ​អ្នក​ដទៃ​តាម​ប្រព័ន្ធ​អ៊ីនធឺណិត​។ ដោយ​វា​មិន​ត្រឹមតែ​សម្រាប់​កីឡាករ​បាល់ទាត់​តែ​ប៉ុណ្ណោះ​ទេ​»​។

សូម​រំលឹក​ថា ក្លិប​ទាំងអស់​នៅ​ក្រប​ខណ្ឌ Premier League បាន​ចាប់ផ្តើម​អនុវត្ត​យុទ្ធនាការ​លុតជង្គង់​មុន​ចាប់ផ្តើម​ការ​ប្រកួត​ដើម្បី​គាំទ្រ​ចលនា «Black Lives Matter» ដែល​ត្រូវ​បាន​បង្កើត​ឡើង បន្ទាប់​ពី​មរណភាព​របស់​បុរស​ស្បែក​ខ្មៅ គឺ​លោក George Floyd កាលពី​ថ្ងៃ​ទី ២៥ ខែឧសភា ឆ្នាំ​២០២០ កន្លង​ទៅ បន្ទាប់​ពី​ត្រូវ​ប៉ូលិស​ស្បែក​សម្នាក់​នៅ​រដ្ឋ​មី​នី​សូ​តា (Minnesota) សហរដ្ឋអាមេរិក យក​ជង្គង់​សង្កត់ក​ជាប់​រហូត​ដាច់ខ្យល់​ស្លាប់​បាត់បង់​ជីវិត​៕ (​ដកស្រង់​ចេញពី BBC)