អ៊ីតាលី ៖ កីឡាករ Cristiano Ronaldo កំពុងក្លាយជាប្រធានដ៏ក្តៅបំផុតលើបណ្តាញទំនាក់ទំនងសង្គម និងសារព័ត៌មានធំៗជុំវិញពិភពលោក បន្ទាប់ពីក្រុមសេះបង្កង់ Juventus ធ្លាក់ចេញពីពានរង្វាន់…
អ៊ីតាលី ៖ កីឡាករ Cristiano Ronaldo កំពុងក្លាយជាប្រធានដ៏ក្តៅបំផុតលើបណ្តាញទំនាក់ទំនងសង្គម និងសារព័ត៌មានធំៗជុំវិញពិភពលោក បន្ទាប់ពីក្រុមសេះបង្កង់ Juventus ធ្លាក់ចេញពីពានរង្វាន់ UEFA Champions League ត្រឹមវគ្គ១៦ក្រុមចុងក្រោយក្រោមថ្វីជើងក្រុម FC Porto ។
ខ្សែប្រយុទ្ធព័រទុយហ្គាល់វ័យ៣៦ឆ្នាំរូបនេះ ទទួលបានការស្តីបន្ទោសចំពោះការឈរជារនាំងការពារ ការស៊ុតបាល់ Free-Kick របស់កីឡាករ Sergio Oliveira ប៉ុន្តែ Ronaldo បែរជាបែរខ្នង និងលើកជើងធ្វើឱ្យបាល់ចូលទីយ៉ាងងាយស្រួល។ កត្តានេះហើយដែលធ្វើឱ្យមានការរិះគន់ដូចៗគ្នាជាច្រើនលើបណ្តាញសង្គម, សារព័ត៌មាន, អ្នកវិភាគបាល់ទាត់, អ្នកគាំទ្រ និងជាពិសេសអតីតថ្នាក់ដឹកនាំរបស់ក្លិប Juventus ផ្ទាល់តែម្តង។
ក្រោយបញ្ចប់ការប្រកួតកាសែត Corriere dello Sport របស់អ៊ីតាលីបានចេញផ្សាយលើកឡើងយ៉ាងដូច្នេះថា Cristiano Ronaldo បានក្បត់ក្លិប Juventus និងមិត្តរួមក្រុមរបស់គេ ដោយលើកយកខាងលើមកធ្វើការបកស្រាយ។
ជាបន្តបន្ទាប់ Ronaldo ក៏ត្រូវទទួលបានការរិះគន់ធ្ងន់ៗថែមទៀត ពីសំណាក់អ្នកវិភាគបាល់ទាត់ និងអ្នកគាំទ្រ។ រហូតដល់ចុងក្រោយគឺលោក Giovanni Cobolli អតីតប្រធានក្លិប Juventus ក៏បានចេញមុខមកនិយាយថា ក្លិបបានធ្វើខុសតាំងពីដំបូង ដែលហ៊ានចំណាយប្រាក់ ១០០លានអឺរ៉ូផ្ទេរ Ronaldo ពីក្លិប Real Madrid។
ហើយលោកថែមទាំងផ្តល់យោបល់សម្រាប់ក្លិប Juventus គួរតែលៃលកបញ្ចេញកីឡាករូបនេះ ដើម្បីចៀសវាងបញ្ហាទៅថ្ងៃក្រោយ ជាពិសេសគឺបញ្ហាសេដ្ឋកិច្ចរបស់ក្លិប ដែលបច្ចុប្បន្នកំពុងចំណាយយ៉ាងច្រើនលើសលប់លើប្រាក់ឈ្នួលរបស់ Ronaldo រហូតដល់ ៣០លានអឺរ៉ូក្នុងមួយឆ្នាំ៕ (ដកស្រង់ចេញពី Dailymail)
ចែករំលែកព័តមាននេះ