ខេត្តស្វាយរៀង ៖ សោកនាដកម្មត្រឹមមួយប៉ប្រិចភ្នែក ដោយសារអ្នកបើកបរខ្វះការប្រុងប្រយ័ត្នបើកវ៉ាជែងរថយន្តដឹកកម្មករដូចគ្នា ក៏ជ្រុលចង្កូតទៅបុកគូថរថយន្តនៅខាងមុខ ហើយក៏ក្រឡាប់ផ្ងារជើងឡើងលើ រួចចាក់ចោលកម្មករ កម្មការិនីទៅលើចិញ្ចើមផ្លូវ បណ្តាលឲ្យដួលសង្កត់លើគ្នា របួសធ្ងន់-ស្រាលសន្លប់ពេញផ្លូវចំនួន៦៤នាក់…
ខេត្តស្វាយរៀង ៖ សោកនាដកម្មត្រឹមមួយប៉ប្រិចភ្នែក ដោយសារអ្នកបើកបរខ្វះការប្រុងប្រយ័ត្នបើកវ៉ាជែងរថយន្តដឹកកម្មករដូចគ្នា ក៏ជ្រុលចង្កូតទៅបុកគូថរថយន្តនៅខាងមុខ ហើយក៏ក្រឡាប់ផ្ងារជើងឡើងលើ រួចចាក់ចោលកម្មករ កម្មការិនីទៅលើចិញ្ចើមផ្លូវ បណ្តាលឲ្យដួលសង្កត់លើគ្នា របួសធ្ងន់-ស្រាលសន្លប់ពេញផ្លូវចំនួន៦៤នាក់ និងស្រាល២១នាក់។ ករណីនេះបានកើតឡើងនៅកាលពីម៉ោង៦និង៤០នាទីព្រឹក នៅថ្ងៃទី១២ ខែមីនាឆ្នាំ២០២១ នៅលើកំណាត់ផ្លូវជាតិលេខ១ ស្ថិតក្នុងភូមិព្រៃផ្តៅ សង្កាត់ច្រកម្ទេស ក្រុងបាវិត។
បើតាមសមត្ថកិច្ចបានឲ្យដឹងថា មុនពេលកើតហេតុ គេឃើញរថយន្ត១គ្រឿងម៉ាកហ៊ីយ៉ាន់ដាយ ពាក់ស្លាកលេខ 3Q-0976 បើកបរពីលិចទៅកើត យ៉ាងលឿន លុះមកដល់ចំណុចកើតហេតុ ស្រាប់តែវ៉ាជែងរថយន្តដឹកកម្មករដូចគ្នាបីទៅបួនគ្រឿង រួចក៏ជ្រុលទៅបុកគូថរថយន្តដឹកកម្មករដូចគ្នាពីក្រោយ បន្ទាប់មកក៏រេចង្កូតទៅខាងឆ្វេងដៃ ធ្លាក់ផ្លូវក្រឡាប់ផ្ងាជើងឡើងលើតែម្តង បណ្តាលឱ្យកម្មករកម្មការិនីដែលជិះនៅលើរថយន្តនោះ ដួលសង្កត់ពីលើគ្នា ធ្វើឱ្យរងរបួសធ្ងន់-ស្រាល និងសន្លប់ដេករដូករណែលពេញផ្លូវតែម្តង។
ប្រភពដដែលបន្តថា បន្ទាប់ពីកើតហេតុ ត្រូវបានប្រជាពលរដ្ឋ និងកម្មករជិះរថយន្តផ្សេងទៀត បាននាំគ្នាចុះមកជួយលើក និងគាស់រថយន្ត រួចសែងអ្នករបួសចេញ មានទាំងអ្នកមានផ្ទៃពោះជាប់នៅក្នុងកាប៊ីនរថយន្តម្នាក់ផងដែរ។
បន្ទាប់មកសមត្ថកិច្ចក៏បានហៅរថយន្យសាមុយ និងរថយន្តដឹកកម្មករដូចគ្នា ឲ្យមកជួយដឹកជញ្ជូនជនរងគ្រោះយកទៅសង្គ្រោះ នៅមន្ទីរសម្រាកព្យាបាលពន្លឺបូព៌ា ចំនួន១១នាក់ ក្នុងនោះស្រី១០នាក់ មានទាំងស្ត្រីពោះធំម្នាក់ផងដែរ។ ចំណែកនៅមន្ទីរពេទ្យបង្អែកជីភូ មានកម្មកររងគ្រោះចំនួន៦០នាក់ ក្នុងនោះស្រី៣៤នាក់, នៅមន្ទីរពេទ្យខេត្តស្វាយរៀង មានកម្មករចំនួន១៤នាក់ (ស្រី) ដែលមានចំនួនសរុបទាំងអស់៨៥នាក់ ប្រុស៣០នាក់ ហើយរបួសធ្ងន់៦៥នាក់ និងស្រាល២០នាក់។
ប្រភពដដែលបន្តទៀតថា ក្រុមកម្មករ កម្មការិនីរងគ្រោះទាំង៨៥នាក់ គឺ មកពីព្រៃរំដួល ភូមិអង្គស្វាយ ភូមិអង្គតាមោក និងភូមិពោធិវង្ស ក្នុងឃុំប្រសូត្រ ស្រុកស្វាយទាប ខេត្តស្វាយរៀង។
ក្រោយពេលកើតហេតុ លោក ម៉ែន វិបុល អភិបាលខេត្តស្វាយរៀង, លោកជំទាវ ដួង វណ្ណា តំណាងរាស្ត្រមណ្ឌលស្វាយរៀង, លោកជំទាវ ពៅ សភាព តំណាងរាស្ត្រមណ្ឌលស្វាយរៀង និងមន្ត្រីរាជការ បានចុះទៅសួរសុខទុក្ខ និងនាំយកអំណោយកាកបាទក្រហមកម្ពុជាសាខាខេត្តស្វាយរៀង ទៅចែកជូនកម្មករ កម្មការិនីដែលរងគ្រោះផងដែរ។
គួរបញ្ជាក់ថា ចំពោះមូលហេតុ គឺបណ្តាលមកពីអ្នកបើកបរ បានបើករថយន្តក្នុងល្បឿនលឿន ថែមទាំងវ៉ាជែងក្នុងស្ថានភាពគ្រោះថ្នាក់ទៀត បណ្តាលឱ្យជួបគ្រោះក្រឡាប់រថយន្តតែម្តង។
ក្រោយកើតហេតុនោះ អ្នកបើកបរក៏បានរត់គេចខ្លួនបាត់ស្រមោលភ្លាមៗផងដែរ ក៏ប៉ុន្តែសមត្ថកិច្ចបានប្រាប់ថា បានស្គាល់អត្តសញ្ញាណអ្នកបើកបរហើយ និងកំពុងតាមចាប់ខ្លួនឲ្យមកទទួលខុសត្រូវចំពោះមុខច្បាប់។ ចំណែករថយន្តវិញ ត្រូវបានសមត្ថកិច្ចស្ទូចយកមករក្សាទុកនៅការិយាល័យចរាចរណ៍ស្នងការដ្ឋាននគបាលខេត្ត ដើម្បីដោះស្រាយតាមនីតិវិធី។
សមត្ថកិច្ចបង្ហើបឲ្យដឹងថា រថយន្តបង្កខាងលើនេះ គឺមានចំណុះ២តោនកន្លះ ប៉ុន្តែបានកែទ្រុង៣តោន ដែលដាក់កម្មករ៧៥នាក់ ក៏ប៉ុន្តែជាក់ស្តែងរថយន្តនេះ គឺដឹកមនុស្សដល់៨៥នាក់ដែលនាំគ្នាឈរច្រូងច្រាង ចង្អៀតណែន ទើបមានគ្រោះថ្នាក់ក្រឡាប់បែបនេះតែម្តង៕
ចែករំលែកព័តមាននេះ