រាជធានីភ្នំពេញ ៖ បើទោះជាមកដល់ពេលនេះ អ្នកស្រី កែ ឡេង ម្ចាស់មេដាយមាសពិភពលោកកីឡាប៉េតង់ បានសម្រេចចិត្តបោះបង់ការប្រកួត ដោយមិនអាចបកស្រាយ និងបានទទួលតំណែង ជាមន្ត្រីផ្កាយលើស្មា តែអ្នកស្រីនៅតែបង្ហាញសកម្មភាពហ្វឹកហាត់ជាប្រចាំ ដោយគ្រាន់តែប្ដូរពីការហ្វឹកហាត់ដើម្បីត្រៀមប្រកួត ទៅជាហ្វឹកហាត់ដើម្បីសុខភាព និងបានចំណាយពេលបង្វឹកកីឡាករកីឡាការិនីទាំងឡាយដើម្បីឱ្យមានទំនួលខុសត្រូវខ្ពស់។ ជាមួយនឹងការប្រឹងប្រែងនេះ បានធ្វើឱ្យអ្នកស្រីនៅតែត្រូវបានសហព័ន្ធចាត់ទុកថាជាគំរូ សម្រាប់កីឡាករកីឡាការិនីជំនាន់ក្រោយ ស្របពេលដែលអ្នកជំនាន់ក្រោយ ក៏ពិបាកស្វែងរកអ្នកមានសមត្ថភាព និងស្នាដៃមកជំនួសអ្នកស្រីនៅក្នុងពេលនេះ។
នៅតែមានការសរសើរមិនតិចនៅឡើយទេ ចំពោះស្នាដៃកន្លងមក និងការទទួលខុសត្រូវខ្ពស់របស់អ្នកស្រី កែ ឡេង ដោយសារតែអ្នកស្រីក្រៅពីមានសមត្ថភាពខ្លាំង ក៏មានឆន្ទៈនិងទំនួលខុសត្រូវខ្ពស់ ទើបអាចធ្វើឱ្យអ្នកស្រី នៅតែបន្តឈរជើងជាកីឡាការិនីដែលមានប្រជាប្រិយភាព និងមានកេរ្តិ៍ឈ្មោះយូរអង្វែង។ វីរភាព និងស្នាដៃរបស់អ្នកស្រី សូម្បីតែលោក ហ៊ុន ម៉ានី ក៏បង្ហាញនូវការសរសើរផងដែរ។ លោក ហ៊ុន ម៉ានី បានប្រកាសជាសាធារណៈថា «ត្រឹមការហ្វឹកហាត់ប្រកួតប្រជែងក្នុងក្រុមខ្លួនឯង ក្នុងក្លិបខ្លួនឯង បើយើងមិនយកមកសាកល្បងប្រកួតប្រជែងជាមួយក្រុម និងក្លិបដទៃទេ យើងមិនអាចថ្លឹងថ្លែងសមត្ថភាពខ្លួនឯងបាននោះទេ ។
ទោះបីបានលទ្ធផលយ៉ាងណា ខ្ញុំសូមលើកទឹកចិត្តឲ្យខិតខំប្រឹងប្រែង និងដកស្រង់បទពិសោធបន្ថែម ។ គ្រប់វេទិកាដែលមានការប្រកួតប្រជែង សូមធ្វើយ៉ាងណាឲ្យបានចូលរួម ដើម្បីសាកល្បងសមត្ថភាព និងស្វែងរកចំណុចខ្សោយសម្រាប់កែប្រែឲ្យកាន់តែប្រសើរឡើង ហើយខ្ញុំនៅតែកោតសរសើរចំពោះការលះបង់ និងវីរភាពកន្លងមករបស់អ្នកស្រី កែ ឡេង ដែលខ្ញុំនៅតែចាត់ទុកថា អ្នកស្រីគឺជាគំរូរបស់កីឡាករកីឡាការិនីគ្រប់រូប»។
លោកបន្តថា អ្វីដែលលោកនៅតែសរសើរ គឺអ្នកស្រី កែ ឡេង ជាកីឡាការិនី ដែលនៅតែមានឆន្ទៈ ដោយសូម្បីតែអ្នកស្រីបានចូលនិវត្តន៍ទៅហើយ ក៏នៅតែបន្តជួយដល់សហព័ន្ធ ដើម្បីឱ្យសហព័ន្ធ នៅតែមានធនធានឆ្នើមជួយជាមតិយោបល់ពង្រឹងដល់សហព័ន្ធបន្តទៀត ។ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានលើកឡើង និងកោតសរសើរពីវីរភាពរបស់កីឡាការិនី កែ ឡេង ចំពោះការជួយលើកស្ទួយវិស័យកីឡាប៉េតង់ និងកិត្តិយសប្រទេសជាតិលើឆាកអន្តរជាតិ ។ ប្រធានគណៈកម្មការទី៧នៃរដ្ឋសភារូបនេះ ជំរុញឲ្យកីឡាករកីឡាការិនី យកអ្នកស្រី កែ ឡេងម្ចាស់មេដាយមាសពិភពលោក៤ជំនាន់ជាប់គ្នា ធ្វើជាគំរូក្នុងការហ្វឹកហាត់ពង្រឹងសមត្ថភាពរបស់ខ្លួន។
មិនខុសគ្នាដែរ លោក ស សុខា ប្រធានសហព័ន្ធកីឡាប៊ូល និងប៉េតង់កម្ពុជា បានកោតសើរ និងវាយតម្លៃខ្ពស់ចំពោះការខិតខំរបស់ អ្នកស្រី កែ ឡេង ផងដែរ ដោយលោកបញ្ជាក់ថា អ្នកស្រី និងគណៈកម្មការរៀបចំសុទ្ធតែជួយជំរុញឱ្យសហព័ន្ធទាំងមូលមានការឈានឡើង។
ជាក់ស្ដែង ការប្រកួតជើងឯកថ្នាក់ជាតិប្រចាំឆ្នាំ២០២០ ដែលបានបញ្ចប់ទៅដោយរលូន និងជោគជ័យកាលពីពេលថ្មីៗកន្លងទៅនេះ គឺបង្ហាញយ៉ាងច្បាស់ថា ជាលទ្ធផលដែលកើតចេញពីការប្រឹងប្រែងជារួម ។ ជាមួយគ្នានេះ លោកចាត់ទុកការប្រកួតនេះ ជាសមិទ្ធផលថ្មីមួយទៀតរបស់សហព័ន្ធ និងជាប្រវត្តិសាស្ត្រផងដែរ ព្រោះវាជាលើកទី១ហើយដែលការប្រកួតជើងឯកថ្នាក់ជាតិមានក្លិបសមាគមរហូតជិត៦០ចូលរួមប្រកួត៕
ចែករំលែកព័តមាននេះ