ខេត្ដឧត្ដរមានជ័យ ៖ កាលពីព្រឹកថ្ងៃទី ១ មករា ឆ្នាំ២០១០ កន្លងទៅនេះ លោកឧត្ដមសេនីយ៍ឯក ជា តារា អគ្គមេ បញ្ជាការរងនៃកងយោធពលខេមរភូមិន្ទ នាយរងទីមួយសេនាធិការចំរុះ និងជាមេបញ្ជាការសមរភូមិទិសយោធភូមិភាគទី៤ តំណាងដ៏ខ្ពង់ខ្ពស់របស់លោកជំទាវប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បាននាំយក អំណោយផ្ទាល់របស់លោកជំទាវទៅចែកជូនគ្រួសារកងទ័ពវរៈលេខ៣៨២ចំនួន៣៣០គ្រួសារ ចំណុះកងពលតូចអន្ដរាគមន៍លេខ៨ ។ ក្នុងពិធីចែកអំណោយជូនគ្រួសារកងទ័ពនាព្រឹក នោះក៏មានវត្ដមានលោកឧត្ដមសេនីយ៍ឯក ឈិន ចាន់ពណ៌ លោកឧត្ដមសេនីយ៍ទោ ស្រី ឌឹក មេបញ្ជាការកងពលធំអន្ដរាគមន៍លេខ៣ លោកឧត្ដមសេនីយ៍ទោយូ សិរីវុឌ្ឈ លោក ឧត្ដមសេនីយ៍ទោ ស ថាវី ព្រមទាំងនាយ ទាហាន នាយទាហានរង និងពលទាហាន ជាច្រើនរូបទៀត ។
ការផ្ដល់អំណោយរបស់លោកជំទាវដល់គ្រួសារកងទ័ពចំនួន៣៣០គ្រួសារនាពេលនេះ គឺបន្ទាប់ពីគ្រួសារកងទ័ពទទួលបានការអនុញាតពីរាជរដ្ឋាភិបាលឱ្យបង្កើតភូមិចំនួន៣ នៅតាមបណ្ដោយជួរភ្នំដងរែក រួមមាន ភូមិត្រញំងចំបក់សុខសែនជ័យ ភូមិចំបក់ សែនជ័យ និងភូមិអភិវឌ្ឍន៍ស្ទឹងខៀវប៊ុន រ៉ានី ហ៊ុន សែន ស្ថិតក្នុងឃុំព្រះប្រឡាយ ស្រុក ត្រញំងប្រាសាទ ខេត្ដឧត្ដរមានជ័យ ។ ចំពោះអំណោយដែលនាំយកទៅប្រគល់ជូនគ្រួសារកងទ័ពវរៈលេខ៣៨២ ចំនួន៣៣០គ្រួសារ នេះគឺក្នុងមួយគ្រួសារៗទទួលបានអង្ករ២២ គីឡូក្រាម សារុង១ ក្រមា១ នំ១ថង់ និងថវិកា១ម៉ឺនរៀល ។
ប្រជាពលរដ្ឋជាគ្រួសារកងទ័ពចំនួន៣៣០គ្រួសារ ក៏បានការឧបត្ថមជាអណ្ដូងទឹ សំរាប់ប្រើប្រាស់បន្ថែមទៀតចំនួន៥ផងដែរ។ ការឧបត្ថម្ភអំណោយរបស់លោកជំទាវប៊ុន រ៉ានី ហ៊ុន សែន ដល់គ្រួសារកងទ័ពចំនួន៣៣០គ្រួសារនេះ គឺបន្ទាប់ពីភូមិទាំង៣ ខាងលើទើបតែបង្កើតបានអាយុកាល១០ខែប៉ុណ្ណោះមកដល់ពេលនេះ ដែលវគ្គដំបូងនេះមានលំនៅឋានរួចជាស្រេចឧបត្ថម្ភដោយសម្ដេចតេជោហ៊ុន សែន និងលោកជំទាវ ។ មេភូមិម្នាក់តំណាងឱ្យភូមិទាំង៣ខាងលើបានឡើងថ្លែងអំណរគុណនិងសេចក្ដីគោរពដោយស្មោះស្ម័គ្រដល់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រនៃព្រះរាជាណាចក្រកម្ពុជា ព្រមទាំងលោកជំទាវ ប៊ុន រ៉ានី ហ៊ុន សែន ដែលបានយកចិត្ដទុកដាក់ជួយឧបត្ថម្ភគាំទ្រដល់ការរស់នៅរបស់ពួកគាត់ជាគ្រួសារកងទ័ពទាំងអស់គ្នាឱ្យមាន ភាពធូរស្រាលមួយកំរិត ។
លោកឧត្ដមសេនីយ៍ត្រីយឹម ពឹម មេបញ្ជាការកងពលតូចអន្ដរាគមន៍លេខ៨ បានឡើងថ្លែងនូវការដឹងគុណដ៏ជ្រាល ជ្រៅចំពោះសម្ដេចតេជោ ហ៊ុន សែន និងលោកជំទាវ ប៊ុន រ៉ានី ហ៊ុន សែន ដែលសម្ដេច និងលោកជំទាវបានដឹកនាំប្រទេសជាតិឱ្យវិលមករកការជួបជុំគ្នាក្នុងរង្វង់គ្រួសារជាតិខ្មែរតែមួយ។ លោកឧត្ដមសេនីយ៍បានបញ្ជាក់ថា ជាក់ ស្ដែងគ្រួសារកងទ័ពដែលបានធ្វើសមាហរណកម្ម ជាមួយរដ្ឋាភិបាលដែលមានសម្ដេចអគ្គមហាសេនាបតីតេជោហ៊ុន សែន ជានាយករដ្ឋមន្ដ្រី គឺដោយសារគោលនយោបាយឈ្នះ=ឈ្នះនា ឆ្នាំ១៩៩៨ ទើបមានការជួបជុំគ្នាមកទល់ពេលនេះរហូតបានសម្ដេចនិងលោកជំទាវយកចិត្ដទុកដាក់បង្កើតបានជាភូមិឋាន លំនៅឋាន សាលារៀន មន្ទីរពេទ្យ វត្ដអារាម អណ្ដូងទឹក និងហេដ្ឋារចនាសម្ព័ន្ធផ្លូវថ្នល់ផ្លូវលំជាច្រើនទៀតធ្វើឱ្យគ្រួសារកងទ័ពមានលំនឹង និងមានសង្ឃឹម លើវាសនានៃអនាគតរបស់គ្រួសារកងទ័ព ក៏ដូចជាកងទ័ពទាំងអស់គ្នាដែរ ។
លោកឧត្ដមសេនីយ៍ឯកជា តារា បានមានប្រសាន៍សំណេះសំណាលទៅកាន់ប្រជាពលរដ្ឋជាគ្រួសារកងទ័ព ដោយញំនាំប្រសាសន៍ផ្ដាំផ្ញើសាកសួរសុខទុក្ខ និងនឹករលឹកពីសំណាក់សម្ដេចតេជោនិងលោកជំទាវដែលគ្រប់ពេលវេលាសម្ដេចនិងលោកជំទាវតែងតែនឹករលឹកនិងយកចិត្ដទុកដាក់ដល់ប្រជាពលរដ្ឋទាំងអស់ ។ អ្វីៗដែលបានកើតមាននូវការជួបជុំគ្នារវាងជាតិខ្មែរយើងនិងមានសន្ដិភាពយ៉ាងពេញលេញក្នុងប្រទេសកម្ពុជាយើងទាំងមូល ក៏ជាភ័ព្វសំណាងរបស់ប្រជាជនកម្ពុជាយើងដែលមានសម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រីនៃព្រះរាជណាចក្រកម្ពុជា និងលោកជំទាវប៊ុន រ៉ានី ហ៊ុន សែន ជាអ្នកដឹកនាំដែលមានគុណធម៌ និងព្រហ្មវិហារធម៌ក្នុងការដឹកនាំប្រទេស ជាតិប្រកបដោយគតិបណ្ឌិត ។
លោកឧត្ដមសេនីយ៍ឯកជា តារា ក៏បានបញ្ជាក់ប្រាប់ប្រជាពលរដ្ឋទៀតថា អ្វីៗដែលកើតឡើងនៅប្រទេសកម្ពុជា និយាយឱ្យចំទីណាជួបការលំបាក គឺទីនោះមានសម្ដេច តេជោហ៊ុន សែន និងលោកជំទាវប៊ុន រ៉ានី ហ៊ុន សែន ជាអ្នកចុះជាប់ជាមួយប្រជាពលរដ្ឋ។ ដូច្នេះសូមឱ្យប្រជាពលរដ្ឋទាំងអស់ត្រូវមានសុទិដ្ឋិនិយមឡើង ដរាបណាមានសម្ដេច តេជោ ហ៊ុន សែន និងលោកជំទាវប៊ុន រ៉ានី ហ៊ុន សែន ជាអ្នកដឹកនាំប្រទេសជាតិប្រជាពលរដ្ឋត្រូវតែមានក្ដីសង្ឃឹម ៕
ចែករំលែកព័តមាននេះ