ខេត្តព្រៃវែង-កណ្តាល ៖ បើទោះបីជាជំងឺកូវីដ១៩ កាចសាហាវខ្លាំង ហើយកំពុងឆ្លងរាលដាលច្រើននៅតាមបណ្តាប្រទេសផ្សេងៗ រួមទាំងកម្ពុជា និងវៀតណាមផងដែរ ប៉ុន្តែវាមិនបានធ្វើអោយមានការរាំងស្ទះដល់ការធ្វើពាណិជ្ជកម្មរវាងប្រទេសទាំង២នេះឡើយ ក្នុងនោះបូករួមទាំងការនាំខ្សាច់ចេញពីកម្ពុជា ចូលទៅប្រទេសវៀតណាមផងដែរទាំងយប់ទាំងថ្ងៃ។
គេបានសង្កេតឃើញថា ក្រុមសាឡង់របស់ឈ្មួញ នៅតែបន្តបូមខ្សាច់ពីក្នុងទន្លេមេគង្គ ក្នុងភូមិសាស្ត្រស្រុកលើកដែក ខេត្តកណ្តាល និងស្រុកពាមជរ ខេត្តព្រៃវែង លក់ចេញទៅប្រទេសវៀតណាម បានយ៉ាងរលូនទាំងថ្ងៃទាំងយប់។
គេនៅចាំបានថា កាលពីចុងឆ្នាំ២០២០ ក្រសួងរ៉ែ និងថាមពល បានចុះមកធ្វើវេទិកាសាធារណៈមួយនៅឃុំកោះចេក ស្រុកពាមជរ ខេត្តព្រៃវែង ដើម្បីផ្សព្វផ្សាយអោយប្រជាពលរដ្ឋបានដឹងអំពីការចេញអាជ្ញាបណ្ណ័អោយក្រុមហ៊ុនធ្វើអាជីវកម្មបូមខ្សាច់ នៅក្នុងទន្លេមេគង្គ ក្នុងភូមិសាស្ត្រស្រុកលើកដែក និងស្រុកពាមជរ ហើយក្រុមហ៊ុនដែលទទួលបានអាជ្ញាប័ណ្ណ គឺមានតែ១គត់ គឺក្រុមហ៊ុនចតុមុខរីសសសាប់ផ្លាយ ដែលក្នុងនោះអនុញ្ញាតិអោយបូមតែពេលថ្ងៃប៉ុណ្ណោះ ហើយខ្សាច់ដែលបូមបាន ត្រូវសល់ពីផ្គត់ផ្គង់ក្នុងស្រុករួច ទើបអាចនាំចេញទៅលក់នៅក្រៅប្រទេសបាន។
ប៉ុន្តែជាក់ស្តែង ចាប់តាំងពីក្រុមហ៊ុនចតុមុខ ចេញធ្វើសកម្មភាពមក ខ្សាច់ទាំងអស់ មិនត្រូវបានលក់នៅក្នុងស្រុកឡើយ គឺគេបូមលក់ទៅប្រទេសវៀតណាមទាំងអស់។
ប្រភពព័ត៌មានដ៏រស៊ើបមួយនេះ ដែលធ្លាយចេញពីអាជ្ញាធរមូលដ្ឋាន បានអោយដឹងថា ក្រោយពីក្រុមហ៊ុនចតុមុខ ចេញបូមខ្សាច់លក់ទៅវៀតណាមបានមួយរយៈ ស្រាប់តែលេចចេញក្រុមហ៊ុនមួយផ្សេងទៀត បានចេញមកបូមខ្សាច់នាំចេញទៅប្រទេសវៀតណាមដែរ ហើយរយៈពេលមិនដល់១ខែផង គឺនៅអំឡុងមុនថ្ងៃបុណ្យចូលឆ្នាំចិន ក៏ស្រាប់តែមានសមត្ថកិច្ចចំរុះមួយក្រុម បានឆ្មក់ចាប់ឃាត់សាឡង់ខ្សាច់របស់ក្រុមហ៊ុននេះ បានចំនួន៤សាឡង់ ដោយអះអាងថា ជាសាឡង់ដឹកខ្សាច់ខុសច្បាប់។
ហើយចាប់តាំងពីពេលនោះមក ក្រុមហ៊ុនមួយនេះក៏រលាយបាត់ខ្លួនឈឹង រហូតមកដល់ពេលនេះតែម្តង ព្រោះភ្នំមួយមិនអាចមានខ្លា២បានទេ ម្ល៉ោះហើយនៅសល់តែក្រុមហ៊ុនចតុមុខ១គត់ ដែលកំពុងធ្វើសកម្មភាពបូមខ្សាច់ ដឹកយកទៅលក់នៅប្រទេសវៀតណាម តាមច្រកព្រំដែនអន្តរជាតិក្អមសំណរ ព្រោះសាឡង់ជារបស់ឈ្មួញខ្សាច់វៀតណាម ម្ល៉ោះហើយបូមដាក់ពេញ គេនាំទៅស្រុកគេតែម្តង។
ជុំវិញរឿងរ៉ាវខាងលើនេះ លោក ម៉ិល គីរី មេឃុំកោះចេក បានអោយដឹងថា បច្ចុប្បន្ននេះក្រុមហ៊ុនចតុមុខ កំពុងតែធ្វើសកម្មភាពបូមខ្សាច់នាំចេញទៅប្រទេសវៀតណាមរាល់ថ្ងៃ ដោយបូមនៅខាងក្រោយសាលាស្រុកពាមជរ តែគេបូមនោះត្រឹមត្រូវចំហ្សូនដែលក្រសួងកំណត់ឬអត់នោះ លោកមិនដឹងទេ ព្រោះរាល់ការងារទាំងអស់ ខាងក្រុមហ៊ុនមិនដែលប្រាប់មកខាងលោកឡើយ និយាយយ៉ាងខ្លី គឺគេមិនខ្វល់នឹងអាជ្ញាធរឡើយ គេធ្វើអីស្រេចតែចិត្តគេ។
ហើយចំពោះប្រាក់ឧបត្ថម្ភសំរាប់អភិវឌ្ឍន៍សហគមន៍មូលដ្ឋាន ដែលក្រសួងតម្រួវអោយក្រុមហ៊ុន ជួយមកខាងឃុំនោះ ក៏មិនដែលឃើញគេអោយដែរ គឺអត់សោះតែម្តង។
ដោយឡែកលោក សេង ធា អភិបាលស្រុកពាមជរ ខេត្តព្រៃវែង បានអោយដឹងថា ក្រុមហ៊ុនធ្វើសកម្មភាពបូមខ្សាច់នាំចេញទៅវៀតណាម នៅក្នុងទឹកដីស្រុកពាមជរ មានតែ១ប៉ុណ្ណោះដែលមានអាជ្ញាបណ្ណ័ គឺក្រុមហ៊ុនចតុមុខ ក្រៅពីនោះលោកមិនបានដឹងទេ ហើយគេបូមខ្សាច់ចំហ្សូនកំណត់ឬអត់? ក្នុង១ថ្ងៃគេបូមប៉ុន្មានសាឡង់? លោកមិនបានដឹងទេ ព្រោះក្រុមហ៊ុនគេមិនបានសហការ ឬផ្តល់ពត៌មានមកអោយខាងស្រុកឡើយ គឺគេរាយការណ៍ទៅតែខាងក្រសួងរ៉ែ១ប៉ុណ្ណោះ តែអ្វីដែលខាងស្រុកដឹង គឺខ្សាច់ដែលក្រុមហ៊ុនចតុមុខបូមនោះ គឺគេនាំចេញទៅប្រទេសវៀតណាមទាំងអស់ អត់មានលក់នៅក្នុងស្រុកទេ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ