ភ្នំពេញ៖ យុវជន ២នាក់ កំពុងតែជិះម៉ូតូ តាមផ្លូវ ស្រាប់តែយុវជនមួយក្រុមទៀត មានទាំងរថយន្ត និងម៉ូតូ បានធ្វើសកម្មភាពភាពដេញវាយ ហើយបើករថយន្ត​បំបុកម៉ូតូរបស់យុវជនរងគ្រោះ ធ្វើអោយរងរបួស ២នាក់។ ចំណែកក្រុមជនបង្ក បានរត់គេចខ្លួនបាត់ បន្សល់ទុកម៉ូតូមួយគ្រឿង នៅកន្លែងកើតហេតុ បង្កការភ្ញាក់ផ្អើល នៅវេលាម៉ោង ១១ និង ៤៥នាទីយប់ ថ្ងៃទី៣ ខែមីនា ឆ្នាំ២០២១ ទល់មុខច្រកចូល​ប៉ុស្តិ៍នគរបាលស្ទឹងមានជ័យ៣ ផ្លូវ២១៧ សង្កាត់ស្ទឹងមានជ័យ៣ ខណ្ឌមានជ័យ។ 

យុវជនរងគ្រោះ ២នាក់ មិនបានអោយស្គាល់អត្តសញ្ញាណ ហើយសមត្ថកិច្ច បានដកហូតម៉ូតូមួយគ្រឿងរបស់ជនមួយក្រុមទៀត ម៉ាកហុងដា ឌ្រីមស៊េរី ឆ្នាំ២០១៥ ពណ៌ខ្មៅ ពាក់ស្លាកលេខ បាត់ដំបង 1H9751 ព្រមទាំងខ្សែក្រវ៉ាត់១ យកទៅរក្សាទុក។ 

​​​យុវជនរងគ្រោះទាំង ២នាក់ បានអោយដឹងថា មុនពេលកើតហេតុ ពួកគេបានជិះម៉ូតូ​ម៉ាកហុងដា ឌ្រីមស៊េរីឆ្នាំ២០១៧ ពណ៌ក្រហម ពាក់ស្លាកលេខ ក្រចេះ 1D-2817 បានជិះចេញពីម្តុំទួលពង្រ សង្កាត់ចោមចៅ ខណ្ឌពោធិ៍សែនជ័យ គោលបំណងជូន​មិត្តភ័ក្ដិទៅផ្ទះ  ដោយធ្វើដំណើរតាមបណ្ដោយផ្លូវវេងស្រេង ក្នុងទិសដៅពីលិចទៅកើត លុះពួកគេបានជិះម៉ូតូដល់ពាក់កណ្ដាលផ្លូវ ក៏ស្រាប់តែមានក្រុមយុវជនមួយក្រុមទៀត មានគ្នា ៦ ទៅ ៧នាក់ មានទាំងម៉ូតូ និងរថយន្ត បានជិះដេញតាមវាយពួកគេ ដោយអ្នកជិះម៉ូតូ ប្រដាប់ដោយខ្សែក្រវ៉ាត់។ ពេលនោះដែរ ពួកគេជាជនរងគ្រោះ ភិតភ័យ ក៏បានជិះម៉ូតូរត់គេច រហូតមកដល់ចំនុចកើតហេតុ ក៏ស្រាប់តែទាក់ដៃចង្កូត​ជាមួយនឹងម៉ូតូរបស់ក្រុមជនបង្ក បណ្ដាលឲ្យដួលម៉ូតូ ហើយគាប់​ជួន​ពេល​នោះដែរ បក្សពួកក្រុមជនបង្ក ដែលមានរថយន្តបានបើករថយន្តមួយគ្រឿង មិនចាំ​ម៉ាកបំបុកម៉ូតូរបស់ពួកគេពីក្រោយ បណ្តាលអោយពួកគេទាំង ២នាក់ ទើរតាមរថយន្ត ៥០ម៉ែត្រ ទើបធ្លាក់មកវិញ ធ្វើអោយរងរបួសបែកក្បាលម្នាក់ និងរលាត់ដៃជើង​ម្នាក់។ ចំណែកម៉ូតូខ្ទេច ផ្នែកក្រោយ។ 

ដោយឡែក ក្រុមជនបង្កវិញ ភ្លាមៗនោះដែរ ក៏បានគ្នារត់ឡើងជិះរថយន្ត​របស់បក្សពួក គេចខ្លួនចេញទៅបាត់ ដោយបន្សល់ទុកម៉ូតូ ម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ​មួយ​គ្រឿង នៅកន្លែងកើតហេតុផងដែរ។ 

ក្នុងករណីនេះដែរ បន្តិចក្រោយមក ឃើញមានកម្លាំងសមត្ថកិច្ចមូលដ្ឋាន ចុះទៅកន្លែង​កើត​ហេតុ សាកសួរពីដំណើររឿង និងបានយកវត្ថុតាង មានខ្សែក្រវ៉ាត់១ និងម៉ូតូរបស់​ជន​បង្កមួយគ្រឿង ទៅរក្សាទុកនៅប៉ុស្តិ៍នគរបាលស្ទឹងមានជ័យ៣។ 

ដោយឡែក ក្រុមជនរងគ្រោះ ក្រោយកើតហេតុ មិនបានដាក់ពាក្យបណ្ដឹងនោះទេ គឺបាននាំគ្នា យកម៉ូតូជិះបន្តដំណើរទៅមុខជាបន្តទៀត៕  ដោយ៖ យឹម ឈឿន